Baćki znajšli źnikłaha syna, paznaŭšy jaho na fota bamža ŭ haziecie
Kažuć, što časam adzin malunak varta tysiačy słoŭ. Dla adnoj amierykanskaj siamji fatahrafija, zroblenaja supracoŭnicaj Associated Press, była adkazam na tysiačy malitvaŭ. Pracaŭnica infarmahiencyi sfatahrafavała biazdomnaha na vulicy. Vałacuham apynuŭsia małady čałaviek, jakoha šukali rodnyja. Kali jaho fota źjaviłasia ŭ vydańni USA Today, svajaki, narešcie, znajšli źnikłaha.
20-hadovy Nikałas Simans pajšoŭ z domu ŭ pačatku studzienia. Jaho baćki stvaryli staronku ŭ Facebook, na jakoj pieradali infarmacyju ab źnikłym. Adzin ź internet-karystalnikaŭ 5 studzienia paviedamiŭ im, što bačyŭ fota padobnaha maładoha čałavieka ŭ haziecie. Fatahrafija, była apublikavana ŭ jakaści ilustracyi da repartažu pra nievierahodnyja chałady ŭ ZŠA. Na zdymku byŭ małady čałaviek, jaki chutaŭsia ŭ koŭdru za niekalki kvartałaŭ ad vašynhtonskaha Kapitolija.
Ubačyŭšy zdymak, baćki chłopca źviazalisia z aŭtarkaj fota, Žaklin Marcin, a taksama z žurnalistami USA Today. Nieŭzabavie palicyjantam udałosia vyjavić maładoha čałavieka niedaloka ad miesca, dzie jaho sfatahrafavali. Jaho dastavili ŭ špital.
Sama Žaklin Marcin paźniej raspaviała, što ŭbačyła biazdomnaha pobač ź vientylacyjnymi kratami, dzie jon hreŭsia, i ździviłasia, jak mołada jon vyhladaŭ. Jana pavinna była pracavać u Biełym domie, ale vypraviłasia hulać pa Vašynhtonie, kab zrabić repartaž pra marazy.
«Ja pradstaviłasia i pacisnuła jamu ruku, a jon adkazaŭ tolki, što jaho zavuć Nik. Ja skazała, što, kali jon dazvolić padać na fota jaho poŭnaje imia, heta dapamoža jamu źviazacca ź siamjoj. Jon skazaŭ: «Nie, dziakuj, sa mnoj usio ŭ paradku. Prosta padpišycie, što mianie kličuć Nik», — uspaminaje jana.
U lakarniu da Simans pryjechali jaho baćka i brat. U palicyi paźniej adznačyli, što ŭ ich nie było nijakich začepak ŭ pošuku maładoha čałavieka — akramia hetaha fota. Palicyjanty adznačajuć, što heta vialikaja ŭdača — znajści čałavieka pa adnoj kartačcy. Varta adznačyć, što redaktary adabrali fota Simansa z bolš čym sotni inšych zdymkaŭ.
Kamientary