Piać faktaŭ pra Tea — biełaruskaha ŭdzielnika Jeŭrabačańnia-2014 — i jaho pieśniu Cheesecake

Biełaruś na mižnarodnym konkursie «Jeŭrabačańnie-2014», što projdzie z 6 pa 10 maja ŭ Danii, budzie pradstaŭlać vykanaŭca Tea (Juryj Vaščuk) ź pieśniaj Cheesecake.

Heta stała viadoma pa vynikach hałasavańnia hledačoŭ i žury paśla biełaruskaha finału adboru na konkurs, što prajšoŭ viečaram 10 studzienia ŭ Minsku. U finale ŭdzielničali 14 kankursantaŭ.

Hledačy prahałasavali za Łorensa i DziDziulu, žury — pieravažna za Tea (Juryja Vaščuka), aproč Łanskoj i Rainčyka.

U vyniku sumavańnia hałasoŭ hledačoŭ i žury Łorens i DziDziula i Tea nabrali adnolkavuju kolkaść bałaŭ (pa 20). Ale žury ŭ vyniku addało pieravahu Tea.

Juryj Vaščuk naradziŭsia ŭ 1983 h. u Minsku. Muzykaj zajmajecca z 4 hadoŭ, pačynaŭ z bajana, byŭ łaŭreatam konkursu «Praleski», udzielničaŭ u teleprajekcie «Zornaja rostań».

U 2000 hodzie byŭ zaprošany na pracu ŭ Nacyjanalny kancertny arkiestr pad kiraŭnictvam M. Finbierha. U 2008 hodzie skončyŭ Biełaruski dziaržaŭny univiersitet kultury i mastactvaŭ.

Pracuje z mnohimi biełaruskimi i zamiežnymi vykanaŭcami jak aranžyroŭščyk i kampazitar. Napisaŭ muzyku da dvuch rasijskich filmaŭ.

Juryj (Juraś) Vaščuk razam z Aksanaj Viečar viadzie na Biełaruś-3 prahramu «Napierad u minułaje», dzie aŭtary jeździać pa biełaruskich rehijonach i zapisvajuć biełaruski falkłor.

«Tvorčaja hrupa adpraŭlajecca ŭ biełaruskuju hłybinku, dzie jašče zachavałasia spradviečnaja piesiennaja spadčyna, u kampanii z adnym z sučasnych artystaŭ. Nośbity aŭtentyčnaj kultury — babuli ŭ vioskach vykonvajuć niekalki piesień, vybirajecca adna. Na jaje stvarajecca aryhinalnaja sučasnaja aranžyroŭka ŭ tvorčaj maniery artysta z vykarystańniem aryhinalnych hałasoŭ. Paralelna idzie apoviad ab dadzienaj miascovaści — pra narodnuju piesiennuju tvorčaści, abrady, narodnyja promysły. Finałam prahramy stanovicca novaja viersija narodnaj pieśni ŭ vykanańni sučasnych artystaŭ». Prahrama idzie ŭ niadzieli u 13:00.

Adna z prahram «Napierad u minułaje»

Biełaruś udzielničaje ŭ Jeŭrabačańni z 2004 hoda, u finał prachodziła trojčy (2007, 2010, 2013).

Pieršymi pradstaŭnikami krainy staŭ duet «Alaksandra & Kanstancin», jaki vykanaŭ pieśniu «My Galileo». Kraina vystupała ŭ paŭfinale nabrała 10 bałaŭ i zaniała 19 miesca.

Samaje vysokaje miesca – 6-je ŭ 2007 h. (Chielsinki, udzielnik Dźmitryj Kałdun). Najhoršy vystup — 22-je miesca ŭ 2006 (Afiny, Palina Smołava, 22-je miesca ŭ paŭfinale).

2004 – «Alaksandra i Kanstancin» (paŭfinał, 19-je miesca, 10 bałaŭ)
2005 – Anžalika Ahurbaš (paŭfinał, 13-je miesca, 57 bałaŭ)
2006 – Palina Smołava (paŭfinał, 22-je miesca, 10 bałaŭ)
2007 – Dźmitryj Kałdun (finał, 6-je miesca, 145 bałaŭ)
2008 – Rusłan Alachno (paŭfinał, 17-je miesca, 27 bałaŭ)
2009 – Piotr Jałfimaŭ (paŭfinał, 13-je miesca, 25 bałaŭ)
2010 – prajekt 3+2 (finał, 24-je miesca, 18 bałaŭ)
2011 – Anastasija Vińnikava (paŭfinał, 14-je miesca, 45 bałaŭ)
2012 – Litesound (paŭfinał, 16-je miesca, 35 bałaŭ)
2013 – Alona Łanskaja (finał, 16-je miesca, 48 bałaŭ)

• 0
• 0
• 0
• 0
• 0
• 0
• 0
• 0