Łukašenka — redaktaram ŚMI: Nie chaciełasia b, kab vy zadavali pytańni, a ja adkazvaŭ
Alaksandr Łukašenka čakaje, što padčas sustrečy z kiraŭnikami najbujniejšych biełaruskich ŚMI adbudziecca adkryty dyjałoh pa aktualnych dla hramadstva temach.
Ab hetym jon zajaviŭ siońnia, adkryvajučy sustreču, paviedamlaje karespandent BiełTA.
Łukašenka adznačyŭ, što takija sustrečy z pradstaŭnikami ŚMI pravodziacca ŭ Biełarusi płanava, adnak raniej jany prachodzili ŭ bolš pašyranym składzie.
«Ščyra skažu: mnie davodzicca pravodzić u takim maštabie mierapryjemstvy z žurnalistami, ale jany mnie nie vielmi padabajucca, bo heta padobna na niejkuju lekcyju, — skazaŭ Łukašenka.
— Usio-taki ŭ vuzkim kole zacikaŭlenych i daśviedčanych ludziej možna bolš padrabiazna abmierkavać tyja ci inšyja pytańni, jakija siońnia chvalujuć ludziej, i pasprabavać, kali heta atrymajecca, zazirnuć u niedalokuju budučyniu».
Pavodle inf. BiełaPAN na sustreču zaprošany staršynia NDTRK Hienadź Davydźka, hiendyrektar telekanała STV Juryj Kazijatka, kiraŭnik telekanała ANT Ryhor Kisiel, hiendyrektar dziaržaŭnaha infarmacyjnaha ahienctva BiełTA Dźmitryj Žuk, dyrektar niedziaržaŭnaj infarmacyjnaj kampanii BiełaPAN Aleś Lipaj, zasnavalnik partała TUT.BY Juryj Zisier, hałoŭnyja redaktary «Sovietskoj Biełoruśsii» Pavieł Jakubovič, vydavieckaha doma «Źviazda» Alaksandr Karlukievič, niedziaržaŭnaj haziety «Priessboł» Uładzimir Bieražkoŭ, štotydniovika «Arhumienty i fakty» v Biełarusi» Ihar Sakałoŭ, dyrektar pradstaŭnictva ŭ Biełarusi miždziaržaŭnaj teleradyjokampanii «Mir» Uładzimir Piercaŭ.
Pavodle słovaŭ Łukašenki, hałoŭnym kryteryjem byŭ upłyŭ i aŭtarytet taho ci inšaha ŚMI ŭ hramadstvie.
«Kali vyznačalisia, ja skazaŭ, što my pavinny hladzieć na toje, jak narod reahuje na toj ci inšy srodak masavaj infarmacyi. Pa mnohich kryteryjach my ŭbačyli, što heta viadučyja srodki masavaj infarmacyi Biełarusi, padabajecca heta kamuści ci nie, ale tak atrymałasia», — skazaŭ jon.
«Ja hatovy da razmovy. Formu hetaj razmovy nie budziem vyznačać, budziem ličyć, što ŭ nas siońnia adbudziecca dyjałoh.
Vielmi nie chaciełasia b, kab vy zadavali pytańni, a ja, jak samy razumny i prasunuty, adkazvaŭ na vašyja pytańni — hetaha nam treba paźbiehnuć. Davajcie pahavorym pra tyja prablemy, jakija chvalujuć ludziej», — reziumavaŭ Alaksandr Łukašenka.
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary