Knihaj Karbaleviča «Alaksandr Łukašenka. Palityčny partret» zaniałosia KDB
Ašmianskaja mytnia nakiravała vydańnie ŭ rehijanalny adździeł Upraŭleńnia KDB (ROU KDB) pa Hrodzienskaj vobłaści h. Ašmiany, kab daśledavać na pradmiet adniasieńnia da Pieraliku zabaronienych da ŭvozu ci vyvazu z terytoryi Mytnaha sajuzu tavaraŭ.
Pra heta paviedamlajecca ŭ aficyjnym liście, jaki atrymaŭ salihorski aktyvist Abjadnanaj hramadzianskaj partyi Alaksandr Małočka ad načalnika mytni Ivana Niviarkieviča. Pasłańnie datavana 18-m lutaha.
Ź lista vynikaje, što papiaredniaja ekśpiertyza, jakuju pravodziła Hałoŭnaje ŭpraŭleńnie ideałahičnaj pracy, kultury i pa spravach moładzi Hrodzienskaha abłvykankama, kahości nie zadavoliła.
Načalnik mytni «prosić ličyć niesapraŭdnym» papiaredni list z Ašmianskaj mytni ad 23 studzienia: u im sp-ra Małočku infarmavali, što ekstremizmu ŭ knizie Karbaleviča niama, i što ŭładalnik moža zabrać jaje.
«Na ŭsie pytańni, pastaŭlenyja Ašmianskaj mytniaj pierad mytnym ekśpiertam, adkazy atrymanyja nie byli, – piša ciapier načalnik mytni. – U dadzieny momant vyznačajecca inšaja ekśpiertnaja arhanizacyja z metaj atrymańnia adkazaŭ na pastaŭlenyja Ašmianskaj mytniaj pytańni».
Nahadajem, što 14 vieraśnia pry viartańni ź Litvy ŭ Biełaruś u salihorskaha aktyvista AHP Alaksandra Małočki na mytni zabrali adzin asobnik knihi Valera Karbaleviča «Alaksandr Łukašenka. Palityčny partret» – dla pravierki na ekstremizm.
Pračakaŭčy adkazu 4 miesiacy, sp. Małočka vyrašyŭ sam paturbavać mytnikaŭ i nakiravaŭ im list z prośbaj narešcie aznajomić jaho z ekśpiertnym zaklučeńniem. Ekśpiertnaha zaklučeńnia jamu nie dasłali, ale paviedamili, što knihu jon moža zabrać «pa miescy zachoŭvańnia».
1 lutaha jon nakiravaŭ mytnikam zajavu, u jakoj prasiŭ usio ž aznajomić jaho z vysnovami ekśpiertaŭ, dasłaŭšy kopiju. A taksama prasiŭ viarnuć jamu knihu, nie vymušajučy jechać pa jaje z Salihorska ŭ Ašmiany.
Admietna, što prykładna pa takim scenary raźvivalisia padziei vakoł fotaalboma «Pres-fota Biełarusi-2011». Spačatku Hrodzienskija ideołahi ekstremizmu ŭ knizie taksama nie ŭhledzieli, i mytnia pisała HA «BAŽ», što fotaalbomy źbirajucca viarnuć uładalnikam. Miž tym, litaralna praź miesiac vyśvietliłasia, što knihi pieradali ŭ KDB.
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ3
Kamientary