«Skidvańnie da zavodskich naładaŭ». Vašynhton patrabuje ad NATA zasiarodzicca tolki na abaronie samoha aljansu
Administracyja prezidenta ZŠA Donalda Trampa nastojvaje na pierahladzie roli NATA i viartańni aljansu da jaho pieršapačatkovaj funkcyi — abarony terytoryj krain-členaŭ u miežach jeŭraatłantyčnaj prastory. Pra heta paviedamlaje Politico sa spasyłkaj na čatyroch dypłamataŭ krain aljansu.
Pavodle krynic vydańnia, Vašynhton vystupaje za zhortvańnie abo istotnaje abmiežavańnie zamiežnych misij NATA, u tym liku zaviaršeńnie adnoj z klučavych apieracyj u Iraku. Akramia taho, ZŠA ŭ apošnija miesiacy padtrymlivali ideju skaračeńnia miratvorčaj misii ŭ Kosavie, a taksama vystupali suprać udziełu Ukrainy i partnioraŭ ź Inda-Cichaakijanskaha rehijonu ŭ aficyjnaj častcy štohadovaha samitu aljansu, jaki maje adbycca ŭ lipieni ŭ Ankary.
Taki padychod unutry arhanizacyi ŭžo niefarmalna nazyvajuć «skidyańniem da zavodskich naład». Jon praduhledžvaje admovu ad šyrejšych zadač, jakija NATA vykonvała ciaham apošnich dziesiacihodździaŭ, u tym liku ŭ śfiery antykryzisnaha kiravańnia, hłabalnych partniorstvaŭ i inicyjatyŭ, zasnavanych na ahulnych kaštoŭnaściach.
Namieśnik kiraŭnika Pientahona Ełbrydž Kołbi, vystupajučy pierad ministrami abarony krain aljansu, vykłaŭ bačańnie administracyi adnosna tak zvanaj kancepcyi «NATA 3.0». Pavodle jaho słoŭ, nie ŭsie misii mohuć być pryjarytetnymi, a hałoŭnym kryteryjem pavinna stać zdolnaść jeŭrapiejskich vojskaŭ vajavać, vyžyvać i pieramahać u scenaryjach, jakija majuć klučavoje značeńnie dla abarony aljansu.
Častka krain NATA stavicca da takoj inicyjatyvy krytyčna. Adzin z dypłamataŭ nazvaŭ admovu ad zamiežnych inicyjatyŭ pamyłkovaj, padkreśliŭšy, što partniorstvy majuć vyrašalnaje značeńnie dla strymlivańnia i abarony.
Pavodle infarmacyi Politico, ZŠA nastojvajuć na tym, kab nie zaprašać Ukrainu, Aŭstraliju, Novuju Ziełandyju, Japoniju i Paŭdniovuju Kareju da ŭdziełu ŭ aficyjnych pasiadžeńniach samitu ŭ Ankary, choć ich pradstaŭniki mohuć pryniać udzieł u inšych mierapryjemstvach u jaho miežach. Analityki adznačajuć, što taki krok stanie sihnałam ab kancentracyi aljansu vyklučna na jaho bazavych zadačach.
Viarchoŭny sud ZŠA pryniaŭ rašeńnie ab admienie bolšaści taryfaŭ, uviedzienych Donaldam Trampam
Premjerka Danii: Treba dazvolić nanosić udary ŭhłyb Rasii, bo ŭ Rasii razumiejuć tolki siłu
NATA rychtujecca da vajny ŭ Arktycy
«Jeŭropie treba skazać Donaldu «chopić!». U jeŭrapiejskim vydańni źjaviŭsia prahramny artykuł
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ2
Kamientary