Rasijskija kamunisty zaklikajuć admianić kancert viadomaha biełaruskaha hurtu «Lapis Trubiacki», jaki pavinien adbycca 14 sakavika ŭ adnym z kłubaŭ Pskova.
Ab hetym havorycca na aficyjnym sajcie Pskoŭskaha abłasnoha adździaleńnia Kamunistyčnaj partyi Rasijskaj Fiederacyi (KPRF).
Pavodle źviestak pres-słužby hetaha rehijanalnaha adździaleńnia KPRF, 5 sakavika da kiraŭnikoŭ centralnaha i rehijanalnaha aparataŭ Usierasijskaha ruchu «Ruski ład» źviarnuŭsia adnadumiec, jaki raskazaŭ, što biełaruski pank-rok-hurt źbirajecca pradstavić u Pskovie svoj novy albom «Matroška».
«Asobnaj uvahi zasłuhoŭvaje zahałoŭnaja pieśnia alboma — «Matroška» — i videaklip da jaje, — napisaŭ prychilnik KPRF.
— Videarad uklučaje vidarysy Rasii (cacka matroška, dreva biaroza, karta krainy i h.d.), vyjavy histaryčnych dziejačaŭ (U.I.Lenin, naprykład), ruskaha naroda i ruskaj pravasłaŭnaj carkvy ŭ samym niepryvabnym vyhladzie, padčas razbureńnia ci zabićcia: siakiera ŭ biarozcy, ź jakoj idzie kroŭ; niačyścik topča kartu krainy i da t.p. Heta vidovišča vyklikaje tolki ahidu i abražaje pačućci narmalnaha čałavieka, patryjota Rasii».
«Rolik i tekst pieśni jaŭna rusafobskaha źmiestu, ukaraniaje ŭ śviadomaść čałavieka złość, nianaviść da svajoj krainy, niasie idei anarchii i buntu suprać lehitymnaj ułady», — dadaje aŭtar zvarotu.
Jon ličyć, što «na fonie palityčnaj situacyi ŭ śviecie i składanaha stanovišča na miežach Rasii i ŭ jaje miežach niedazvolna i navat złačynna dazvalać kancerty takich «muzykantaŭ». «Tym bolš u našym vydatnym i staražytnym horadzie, dzie zaŭsiody była vydatnaja kulturnaja tradycyja i mocnaja dziaržaŭnaść», — adznačyŭ zaniepakojeny kamunist, dadaŭšy, što kancert «Lapisa Trubiackoha» budzie «plaŭkom u tvar pskavičam i abniasłaŭleńniem usiaho śviatoha dla ruskaha naroda».
Aŭtar zvarotu taksama źviarnuŭ uvahu pradstaŭnikoŭ KPRF na toje, što hurt Siarhieja Michałka «aktyŭna padtrymaŭ dziaržaŭny pieravarot, padahravajučy publiku na kijeŭskim «majdanie».
Kamientary