Расійскія камуністы заклікаюць адмяніць канцэрт вядомага беларускага гурту «Ляпіс Трубяцкі», які павінен адбыцца 14 сакавіка ў адным з клубаў Пскова.
Аб гэтым гаворыцца на афіцыйным сайце Пскоўскага абласнога аддзялення Камуністычнай партыі Расійскай Федэрацыі (КПРФ).
Паводле звестак прэс-службы гэтага рэгіянальнага аддзялення КПРФ, 5 сакавіка да кіраўнікоў цэнтральнага і рэгіянальнага апаратаў Усерасійскага руху «Рускі лад» звярнуўся аднадумец, які расказаў, што беларускі панк-рок-гурт збіраецца прадставіць у Пскове свой новы альбом «Матрошка».
«Асобнай увагі заслугоўвае загалоўная песня альбома — «Матрошка» — і відэакліп да яе, — напісаў прыхільнік КПРФ.
— Відэарад уключае відарысы Расіі (цацка матрошка, дрэва бяроза, карта краіны і г.д.), выявы гістарычных дзеячаў (У.І.Ленін, напрыклад), рускага народа і рускай праваслаўнай царквы ў самым непрывабным выглядзе, падчас разбурэння ці забіцця: сякера ў бярозцы, з якой ідзе кроў; нячысцік топча карту краіны і да т.п. Гэта відовішча выклікае толькі агіду і абражае пачуцці нармальнага чалавека, патрыёта Расіі».
«Ролік і тэкст песні яўна русафобскага зместу, укараняе ў свядомасць чалавека злосць, нянавісць да сваёй краіны, нясе ідэі анархіі і бунту супраць легітымнай улады», — дадае аўтар звароту.
Ён лічыць, што «на фоне палітычнай сітуацыі ў свеце і складанага становішча на межах Расіі і ў яе межах недазвольна і нават злачынна дазваляць канцэрты такіх «музыкантаў». «Тым больш у нашым выдатным і старажытным горадзе, дзе заўсёды была выдатная культурная традыцыя і моцная дзяржаўнасць», — адзначыў занепакоены камуніст, дадаўшы, што канцэрт «Ляпіса Трубяцкога» будзе «пляўком у твар пскавічам і абняслаўленнем усяго святога для рускага народа».
Аўтар звароту таксама звярнуў увагу прадстаўнікоў КПРФ на тое, што гурт Сяргея Міхалка «актыўна падтрымаў дзяржаўны пераварот, падаграваючы публіку на кіеўскім «майдане».
Цяпер чытаюць
Вынеслі прысуд Паліне Зыль — блогерцы, якая стала нулявым пацыентам справы Гаюна, бо ў яе знайшлі тую самую спасылку ад Матолькі15
Каментары