Aŭstryjskaja palicyja aryštavała ŭ Vienie 48-hadovaha ŭkrainskaha pradprymalnika Dźmitryja Firtaša, paviedamlajuć infarmacyjnyja ahienctvy.
Jak paviedamlajecca, biźniesmien aryštavany pa zapycie FBR pa padazreńni ŭ dačynieńni da stvareńnia arhanizavanaj złačynnaj hrupy i chabarnictvie.
Jak paviedamlajecca, jon znachodziŭsia pad śledstvam FBR z 2006 hoda.
Firtaša zajmaje 4-je miesca ŭ rejtynhu samych bahatych ludziej Ukrainy (2013). Jahonaje bahaćcie aceńvajecca ŭ $ 3,5 młrd. Jahonyja aktyvy abjadnanyja ŭ mižnarodnuju hrupu kampanij «Group DF», asnoŭnymi kirunkami dziejnaści jakoj źjaŭlajucca azotny, tytanavy, hazavy i bankaŭski biznesy. Jon uznačalvaje Fiederacyju pracadaŭcaŭ Ukrainy, jakaja abjadnoŭvaje ŭvieś bujny ŭkrainski biznes.
Vialiki rezanans u pačatku 2013 hoda vyklikała nabyćcio hrupaj Firtaša kampanii Inter Media Group, u jakuju ŭvachodziać telekanały «Inter», NTN, K1, «Mieha», «Enter-film», K2, «Piksiel» i MTV.
Jaho telekanały byli klučavymi ŭ prapahandzie Janukoviča. Napiaredadni ŭciokaŭ Janukoviča «Inter» rezka pamianiaŭ ton.
Ličycca, što Firtaš źviazany cienievymi suviaziami z Uładzimiram Pucinym. Prynamsi, mienavita z udziełam prezidenta Pucina było vyrašana, što pastaŭki hazu va Ukrainu «Hazprom» budzie ažyćciaŭlać nie naŭprost, a praz struktury Firtaša.
Dla hetaha ŭ 2004 hodzie ŭkrainski biznesmen supolna z «Hazpromam» stvaryŭ kampaniju «Rasukrenierha» dla ažyćciaŭleńnia tranzitu hazu va Ukrainu i ŭ krainy Jeŭrasajuza. U tym ža hodzie była nabyta aŭstryjskaja kampanija Zangas Hoch-und Tiefbau GmbH, jakaja śpiecyjalizujecca na budaŭnictvie hazapravodaŭ.
Kansalidavanaja vyručka Group DF za 2012 hod składała prykładna $6 młrd, a EBITDA — $ 1,3 młrd.
Biźniesmiena zatrymali na prajeznaj častcy niedaloka ad miesca pražyvańnia ŭ rajonie Vieny Marharet. Firtaš i jahonyja ciełaachoŭniki nie supraciŭlalisia. Ciapier Firtaš znachodzicca ŭ turmie rajona Jozefštat.
Ciapier čytajuć
Baćka sa Słucka paprasiŭ dziaržavu zabrać jaho dziaciej dziela adnaŭleńnia maralnych sił1
Kamientary