Urad Jaje Vialikaści adkazaŭ Pucinu

Refierendum u Krymie prajšoŭ z šmatlikimi parušeńniami, a adzinaj destabilizujučaj siłaj va Ukrainie siońnia źjaŭlajecca Rasija. Pra heta havorycca ŭ kamientary ŭrada Vialikabrytanii ŭ adkaz na zajavy prezidenta RF Uładzimira Pucina, zroblenyja 18 sakavika. 

Prezident Pucin: 16 sakavika ŭ Krymie adbyŭsia refierendum. Jon prajšoŭ u poŭnaj adpaviednaści z demakratyčnymi pracedurami i mižnarodnymi normami prava. U hałasavańni pryniali ŭdzieł bolš za 82% vybarščykaŭ. Bolš za 96% vykazalisia za ŭźjadnańnie z Rasijaj. Ličby bolš čym pierakanaŭčyja. 

Urad Jaje Vialikaści: Refierendum prajšoŭ nie tolki ŭ parušeńnie kanstytucyi Ukrainy, ale i mižnarodnych demakratyčnych pracedur i ŭrazrez ź lepšym nazapašanym dośviedam. Na praciahu niekalkich tydniaŭ u Krymie znachodzilisia rasijskija ŭzbrojenyja siły. Jany ŭstalavali prarasijski maryjanietkavy ŭrad, jaki na zakrytaj parłamienckaj siesii pad kantrolem zamiežnych uzbrojenych sił prahałasavaŭ za praviadzieńnie refierendumu. Siabry parłamienta, jakija vystupili suprać prarasijskaj prahramy, byli vyklučanyja z parłamienta. 

Ab refierendumie było abvieščana ŭsiaho tolki za 10 dzion da jaho praviadzieńnia. Charakternymi rysami padrychtoŭčaj raboty da refierendumu źjaŭlajecca poŭnaja adsutnaść prazrystaści. Heta adnosicca i da składu vybarčych kamisij, i da śpisaŭ vybarščykaŭ, i kolkaści vypuščanych vybarčych biuleteniaŭ. Akramia taho, na refierendumie nie prysutničali niejtralnyja naziralniki. 

Dva pytańni, pastaŭlenyja na hałasavańnie, byli sfarmulavany takim čynam, što ŭ vybarščykaŭ nie było mahčymaści prahałasavać za isnujučy status Kryma ŭ składzie Ŭkrainy. Akramia taho, nichto nie patłumačyŭ pytańni, uklučanyja ŭ vybarčyja biuleteni. Napiaredadni refierendumu ŭ Krymie nie pravodzilisia debaty. Isnujuć peŭnyja paviedamleńni ab zapałochvańni vybarščykaŭ. 

Vyniki refierendumu — 96,7% — značna pieraŭzychodziać vyniki apytańnia hramadskaj dumki, praviedzienaha niezaležnym navukova-daśledčym instytutam Ukrainy ŭ lutym 2014 hoda. Pavodle apytańnia, tolki 41% krymčan padtrymlivajuć ŭźjadnańnie Krymu z Rasijaj. Bolš za toje, uličvajučy bajkatavańnie refierendumu z boku apazicyi, atrymanyja vyniki taksama źjaŭlajucca padazrona vysokimi. 

Prezident Pucin: Ja dobra razumieju tych, chto ź mirnymi łozunhami vyjšaŭ na Majdan, vystupajučy suprać karupcyi, nieefiektyŭnaha dziaržkiravańnia, biednaści. Pravy na mirny pratest, demakratyčnyja pracedury, vybary dla taho i isnujuć, kab mianiać uładu, jakaja nie zadavalniaje ludziej. Ale tyja, chto stajaŭ za apošnimi padziejami va Ukrainie, pieraśledvali inšyja mety. Jany rychtavali dziaržaŭny pieravarot, płanavali zachapić uładu, nie spyniajučysia ni pierad čym. U chod byli puščanyja i teror, i zabojstvy, i pahromy. Hałoŭnymi vykanaŭcami pieravarotu stali antysiemity, rusafoby, nacyjanalisty i nieanacysty. Mienavita jany šmat u čym vyznačajuć i siońnia žyćcio va Ukrainie. 

Urad Jaje Vialikaści: Paśla sychodu prezidenta Janukoviča sa svajoj pasady Viarchoŭnaja Rada i časovy ŭrad Ukrainy robiać dziejańni ŭ adpaviednaści z Kanstytucyjaj Ukrainy. Šmatlikija arhanizacyi, u tym liku AAN, ABSIE, a taksama Asacyjacyja habrejskich supołak i arhanizacyj Ukrainy, nie sutykalisia z šmatlikimi vypadkami parušeńnia pravoŭ čałavieka ci antysiemickimi pahromami va Ukrainie. Partyja rehijonaŭ, jakuju ŭznačalvaŭ były prezident Janukovič, padtrymała stvareńnie časovaha ŭrada Ukrainy i praviadzieńnie novych vybaraŭ. U ciapierašni čas adzinaj destabilizujučaj siłaj va Ukrainie źjaŭlajecca Rasija. 

U Jeŭramajdanie ŭdzielničali pradstaŭniki roznych słajoŭ nasielnictva Ukrainy. Abjadnanyja ahulnaj metaj, jany prademanstravali supraciŭ złoŭžyvańniam ułady i smahu pieramienaŭ. Usie ŭdzielniki Jeŭramajdana byli dyscyplinavanyja i strymanyja. Dziejańni, jakija jany rabidi, nasili tolki abarončy charaktar u adkaz na hvałt z boku ŭładaŭ pad kiraŭnictvam byłoha prezidenta Janukoviča. 

Prezident Pucin: Pierš za ŭsio tak zvanyja «ŭłady » ŭnieśli skandalny zakonaprajekt ab pierahladzie moŭnaj palityki. 

Urad Jaje Vialikaści: Časova vykonvajučy abaviazki prezidenta Ukrainy admoviŭsia prymać zakon, jaki abmiažoŭvaje ŭžyvańnie ruskaj movy na rehijanalnym uzroŭni. Premjer-ministr Ukrainy Jacaniuk zajaviŭ ab tym, što hety zakon pryniaty nie budzie. 

Prezident Pucin: Jasna i toje, što lehitymnaj vykanaŭčaj ułady na Ukrainie da hetaha času niama. 

Urad Jaje Vialikaści: Va Ukrainie jość lehitymnaja vykanaŭčaja ŭłada. Adchileńnie Janukoviča ad pasady prezidenta Ukrainy paćviardžajecca hałasavańniem, jakoje było praviedziena ŭ Viarchoŭnaj Radzie Ukrainy ŭ adpaviednaści z Kanstytucyjaj Ukrainy. Viarchoŭnaja Rada była abrana na padstavie volnaha hałasavańnia naroda Ukrainy, a časovy ŭrad adobrany pieravažnaj bolšaściu Viarchoŭnaj Rady ŭ chodzie volnaha hałasavańnia, uklučajučy i pradstaŭnikoŭ Partyi rehijonaŭ, jakuju ŭznačalvaŭ Janukovič. 

Prezident Pucin: Tym, chto supraciŭlaŭsia putču, adrazu pačali pahražać represijami i karnymi apieracyjami. I pieršym na čarzie byŭ, viadoma, Krym, ruskamoŭny Krym. U suviazi z hetym žychary Kryma i Sievastopala źviarnulisia z zaklikam da Rasii abaranić ich pravy i samo žyćcio, nie dapuścić taho, što adbyvałasia, dy j adbyvajecca i ŭ Kijevie, i ŭ Daniecku, u Charkavie i inšych haradach Rasii. 

Urad Jaje Vialikaści: Viarchoŭny kamisar ABSIE, jakaja naviedała Krym, zajaviła, što nie znajšła nijakich dokazaŭ hvałtu suprać ruskamoŭnaha nasielnictva ci pryciaśnieńnia ich pravoŭ. Upaŭnavažany Viarchoŭnaj Rady pa pravach čałavieka Valeryja Łutkoŭskaja taksama zajaviła, što nie było vypadkaŭ zvarotu da jaje z boku hramadzian Kryma, pravy jakich byli parušanyja. 

Nie było pradstaŭlena nijakich dokazaŭ taho, što ruskamoŭnamu nasielnictvu ŭ Krymie, albo inšych haradach Ukrainy pahražajuć. My nie atrymali nijakich dokazaŭ napadaŭ na cerkvy, raźmieščanyja va Uschodniaj Ukrainie, jak zajaŭlajuć ruskija. Časova vykonvajučy abaviazki prezidenta Ukrainy admoviŭsia prymać zakon, jaki abmiažoŭvaje ŭžyvańnie ruskaj movy na rehijanalnym uzroŭni. 

Prezident Pucin: Uzbrojenyja siły Rasii nie ŭvachodzili ŭ Krym, jany tam užo i tak znachodzilisia ŭ adpaviednaści ź mižnarodnaj damovaj. 

Urad Jaje Vialikaści: Heta niapraŭda. Abmundziravańnie, ŭzbrajeńnie i padrychtoŭka zusim jasna pakazvajuć na toje, što heta rasijskija vajennyja. Naprykład, vajennyja transpartnyja srodki z rasijskimi numarami. Kali heta miascovyja milicyjanty, čamu jany adkryta nie kažuć pra heta? Parušajučy damoŭlenaści, vajennyja Čarnamorskaha fłotu robiać dziejańni za miežami svaich baz. 

Pa paviedamleńniach z Hienieralnaha štaba ŭzbrojenych sił Ukrainy, 1-y motastrałkovy bataljon «Uschod» 18-y asobnaj motastrałkovaj bryhady, raźmieščanaj u nasielenym punkcie Kalinaŭka ŭ Čačenskaj Respublicy, u ciapierašni čas dysłakavałasia ŭ horad Džankoj ŭ Krymie. Vajennyja 31-j asobnaj desantna-šturmavoj bryhady PDV, raźmieščanyja ŭ horadzie Uljanaŭsku ŭ Rasii, i 22-ja asobnaja bryhada śpiecyjalnaha pryznačeńnia z Krasnadarskaha kraju taksama dysłakavanyja ŭ Krymie. 

Isnuje šmat inšych padobnych prykładaŭ, kali vajskoŭcy nazyvajuć siabie pradstaŭnikami sił biaśpieki Rasii. Naprykład, vajskoŭcy ŭ aeraportach Bielbieka i Simfieropala. 

Prezident Pucin:… krymskija ŭłady abapiralisia i na viadomy kosaŭski precedent, precedent, jaki našy zachodnija partniory stvaryli sami, što nazyvajecca, ułasnymi rukami, u situacyi, absalutna anałahičnaj krymskaj, pryznali adździaleńnie Kosava ad Sierbii lehitymnym… 

Urad Jaje Vialikaści: Nielha paraŭnoŭvać situacyi ŭ Krymie i Kosava. Niezaležnaść Kosava rušyła ŭśled paśla dzieviaci hadoŭ znachodžańnia dadzienaj terytoryi pad kiravańniem AAN. Na refierendumie ŭ Krymie sprabujuć pryznać zakonnym adnabakovyja dziejańni adnoj dziaržavy, jakija, jak było skazana na pasiadžeńni Rady biaśpieki na minułym tydni, byli ździejsienyja va ŭmovach poŭnaj dypłamatyčnaj izalacyi. 

Niama nijakich sumnievaŭ, što pazicyja Rasii pa Kosavie źjaŭlajecca supiarečlivaj. Na pasiadžeńni Rady biaśpieki AAN pa Kosava 18 lutaha 2008 hoda pradstaŭnik RF Vital Čurkin zajaviŭ: «Pryznańnie dekłaracyi ab niezaležnaści Kosava, jakaja była pryniataja ŭ adnabakovym paradku, supiarečyć pałažeńniami Chielsinskaha Zaklučnaha Akta. U im jasna praduhledžany pryncypy nieparušnaści miežaŭ i terytaryjalnaj cełasnaści dziaržaŭ».

• 0
• 0
• 0
• 0
• 0
• 0
• 0
• 0