Šunievič: Takoha termina, jak «palitviazień», u zakonie ab amnistyi niama i być nie moža

Deputaty pałaty pradstaŭnikoŭ na pasiadžeńni 14 maja pryniali ŭ pieršym čytańni zakonaprajekt «Ab amnistyi ŭ suviazi z 70-hodździem vyzvaleńnia Biełarusi ad niamiecka-fašysckich zachopnikaŭ». Jak adznačyŭ ministr unutranych spraŭ Ihar Šunievič, u Biełarusi «zaŭsiody prymianiajecca pryncyp humanizmu da asob, jakija adbyvajuć roznyja vidy pakarańniaŭ». «Dziaržava nie tolki karaje, ale i daje vypravicca, vyjści raniej ź miescaŭ pazbaŭleńnia voli», — skazaŭ jon. 

Miarkujecca, što z papraŭčych ustanoŭ zakrytaha typu (papraŭčyja kałonii, vychavaŭčyja kałonii, aryštnyja damy, SIZA) buduć vyzvalenyja kala 2,1 tys. čałaviek, z papraŭčych ustanoŭ ahulnaha typu — kala 630. 

Ad pakarańnia ŭ vyhladzie aryštu, abmiežavańnia abo pazbaŭleńnia voli buduć vyzvalenyja asoby, jakija adbyvajuć pakarańnie za złačynstvy, jakija nie ŭjaŭlajuć vialikaj hramadskaj niebiaśpieki: 

- asudžanyja na aryšt — niezaležna ad terminu adbytaha pakarańnia; 

- za mienš ciažkija złačynstvy — pry adbyćci nie mienš čym čverci terminu; 

- za niekatoryja ciažkija i asabliva ciažkija złačynstvy suprać ułasnaści i paradku ažyćciaŭleńnia ekanamičnaj dziejnaści (prysvajeńnie, rastrata, kradziež šlacham vykarystańnia kamp`iutarnaj techniki, uchileńnie ad vypłaty sum padatkaŭ, zboraŭ, niezakonnaja pradprymalnickaja dziejnaść) — pry adbyćci nie mienš čym traciny terminu pakarańnia (za vyklučeńniem tych, chto ŭčyniŭ złačynstvy ŭ składzie arhanizavanaj hrupy); 

- za inšyja złačynstvy — kali da zakančeńnia terminu adbyćcia pakarańnia zastałosia mienš čym hod. 

U zakonaprajekcie pašyrana katehoryja asob, na jakich amnistyja nie raspaŭsiudžvajecca.

Jana nie zakranie tych, chto ŭčyniŭ zabojstva abo naŭmysnaje pryčynieńnie ciažkaha cialesnaha paškodžańnia, što paciahnuła śmierć (art. 139, č. 3 art. 147); złačynstvy, źviazanyja ź niezakonnym abarotam narkatyčnych srodkaŭ (č. 3 i 4 art. 328). Pad amnistyju nie trapiać vadzicieli, jaki kiravali transpartam u stanie ałkaholnaha ap`ianieńnia (art. 317-1), a taksama parušyli PDR u stanie ałkaholnaha ap`ianieńnia, što paciahnuła śmierć čałavieka (č. 4 i 5 art. 317). Nie buduć vyzvalenyja i tyja, chto ŭčyniŭ złačynstva suprać pałavoj niedatykalnaści abo pałavoj svabody ŭ dačynieńni da niepaŭnaletnich. 

Jak i papiarednija amnistyi, ciapierašniaja nie budzie raspaŭsiudžvacca na asob, da jakich na praciahu 2007—2014 hadoŭ užo prymianialisia amnistyja abo pamiłavańnie, ale jany ŭ pieryjad niaźniataj i niepahašanaj sudzimaści znoŭ učynili naŭmysnyja złačynstvy.

Nie trapiać pad amnistyju złosnyja parušalniki ŭstanoŭlenaha paradku adbyćcia pakarańnia; asabliva niebiaśpiečnyja recydyvisty; asudžanyja na pažyćciovaje źniavoleńnie; tyja, chto nie kampiensavaŭ uron ad złačynstva, a taksama raschody na ŭtrymańnie dziaciej, jakija znachodziacca na dziaržaŭnym zabieśpiačeńni, abo zapazyčanaści pa alimientach. 

Šunievič padkreśliŭ, što praviadzieńnie amnistyi nie paŭpłyvaje niehatyŭna na kryminalnuju abstanoŭku ŭ hramadstvie.

U razmovie z žurnalistami pierad pryniaćciem zakonaprajekta kiraŭnik MUS paviedamiŭ: «Napiaredadni praviadzieńnia luboj amnistyi my analizujem i vyvučajem situacyju, — skazaŭ jon. — Jość padstavy havaryć, što ŭsplosku złačynnaści ŭ suviazi z daterminovym vyzvaleńniem asudžanych pa amnistyi nie nazirajecca». 

Bolš za toje, pavodle słoŭ Šunieviča, tendencyja recydyvu złačynnaści siarod vyzvalenych pa amnistyi pamianšajecca, u tym liku siarod «zakaraniełych złačyncaŭ». Amnistyja, padkreśliŭ kiraŭnik MUS, stanoŭča ŭpłyvaje na tych, chto apynuŭsia ŭ miescach pazbaŭleńnia voli ŭpieršyniu i choča vypravicca. 

Na pytańnie, ci trapiać pad čarhovuju amnistyju tyja, kaho Zachad i pravaabaroncy ličać palityčnymi źniavolenymi, Šunievič adkazaŭ:

«Takoha terminu, jak «palitźniavoleny», u hetym zakonie niama i być nie moža. Trapiać pad amnistyju tyja, chto ŭčyniŭ złačynstva, jakoje nie ŭjaŭlaje vialikaj hramadskaj niebiaśpieki».

• 0
• 0
• 0
• 0
• 0
• 0
• 0
• 0