Kiraŭnik ukrainskaha Centru vajenna-palityčnych daśledavańniaŭ Dźmitry Tymčuk zajaviŭ u interviju Radyjo Svaboda, što nia ličyć aperacyju Rasiei va Ŭkrainie «vajnoj novaha typu», i prapanavaŭ svajo bačańnie zmahańnia z terarystami na ŭschodzie Ŭkrainy.
— Učora padčas pres-kanferencyi vykonvajučy abaviazki ministra abarony Ŭkrainy Michaił Koval zajaviŭ, što Rasieja viadzie suprać Ukrainy «vajnu novaha typu». Vy zhodnyja z takim vyznačeńniem?
— Ja nia baču vajny novaha typu. Ja b chutčej pahadziŭsia z acenkaj amerykancaŭ, jakija nazyvajuć hetuju aperacyju «hibrydnaj vajnoj». Na samaj spravie bajavyja dziejańni takoha typu daŭno viadomyja. Hibrydnaja vajna — tamu što idzie praca dyversijnych hrup razam ź miascovymi terarystyčnymi hrupoŭkami. Ale kali brać asobna praniknieńnie dyversijnych hrup z Rasiei i asobna dziejańni miascovych separatystaŭ, to ni ŭ adnym, ni ŭ inšym niama ničoha novaha.
Tut treba havaryć pra toje, što ŭkrainskija siłaviki akazalisia nie hatovymi da takoha miksavanaha padychodu z boku praciŭnika. Choć uvohule hety fakt vyhladaje vielmi dziŭna. Navat niahledziačy na toje, što Ŭzbrojenyja siły Ŭkrainy ciapier uznačalvaje Michaił Koval, jaki 15 hadoŭ tamu dasłužyŭsia da zvańnia namieśnika kamandzira korpusa, a paśla słužyŭ u pamiežnaj słužbie, i jaki, adpaviedna, naŭrad ci vielmi dobra vałodaje sytuacyjaj u vajskovaj sfery, ukrainskija siłaviki majuć dobry dośvied udziełu ŭ miratvorčych aperacyjach, u tym liku ŭ Iraku, Kosava, Aŭhanistanie, krainach Afryki, dzie jany nieadnarazova sutykalisia z absalutna analahičnymi dziejańniami. Našyja siłaviki navat pravodzili vybary ŭ Iraku padčas vajennych dziejańniaŭ. U tym ža Iraku va ŭkraincaŭ była cełaja zona adkaznaści — pravincyja Vasid — dzie ŭžyvałasia taja samaja taktyka: načnyja abstreły z žyłych kvartałaŭ z užyvańniem minamiotaŭ — taktyka bajevikoŭ Bližniaha Ŭschodu.
Takim čynam, armija maje dośvied dziejańniaŭ u takich sytuacyjach. Na žal, zaraz my nia bačym, kab hety dośvied byŭ vykarystany choć niejkim čynam. Chacia paśla kožnaha dziejańnia ŭ haračych kropkach składalisia vielmi padrabiaznyja spravazdačy i vypracoŭvalisia rekamendacyi. Napeŭna, tut prablema vajskovaj biurakratyi, što ničoha z hetaha nie vykarystoŭvajecca.
— Michaił Koval ahučyŭ dva śćvierdžańni, jakija supiarečać adno adnamu. Z adnaho boku, jon skazaŭ, što ŭ armii raźviazanyja ruki dla adporu terarystam, a z druhoha — što armija nia moža nanosić udary, bo zbroja nie vysokadakładnaja, i mohuć paciarpieć mirnyja žychary…
— Tak, ja całkam zhodny, što tut piarečańnie samomu sabie. Ale taksama ja b skazaŭ, što navat z terarystami, jakija vykarystoŭvajuć mirnych žycharoŭ u jakaści žyvoha ščyta, možna zmahacca. Jość taki mižnarodny dośvied. Heta ciažkaja zadača, ale całkam vykanalnaja.
— Jak vy aceńvajecie baraćbu z terarystami na ŭschodzie Ŭkrainy?
— Tut składanaść u tym, što my zaraz staim na parozie hramadzianskaj vajny. Paśla padziejaŭ u Adesie 2 traŭnia my ŭsio čaściej i čaściej bačym, što na akcyi separatystaŭ vychodziać nia tolki miascovyja žychary, jakim zapłacili, i pradstaŭniki prarasiejskich arhanizacyj, jak heta było raniej, ale i zvyčajnyja hramadzianie, atručanyja rasiejskaj prapahandaj i aburanyja biesparadkami ŭ svaich haradach. Heta vielmi niebiaśpiečny praces, u jakim pavialičvajecca kolkaść mirnaha nasielnictva, jakoje sapraŭdy pavieryła ŭ lozunhi terarystaŭ. My bačyli takuju sytuacyju ŭ Maryjupali, dzie siłaviki byli vymušanyja prosta pakinuć horad, kab nie pieratvarać padziei ŭ miasarubku. Jak zmahacca z terarystami? Stratehija takaja: treba adździalać terarystyčnyja hrupy ad mirnaha nasielnictva; pieršych prosta źniščać, a z druhimi vieści pieramovy i vyjaŭlać hramadzkich lideraŭ, mahčyma, šlacham praviadzieńnia niejkich vybaraŭ.
— Čamu heta składana?
— Usio ŭskładniajecca tym, što za 23 hady niezaležnaści Danbas tak i nie naradziŭ hramadzkich lideraŭ, aproč tych, jakija stali častkaj miascovaha kryminalitetu, i vieści dyjaloh ź jakimi niama sensu. Tamu dla ich vyjaŭleńnia patrebnyja niejkija vybary, što składana technična. Ale znoŭ ža — składana, ale vykanalna. Zaraz ža vieści dyjaloh Kijevu niama z kim.
— Ci hatovyja ludzi da partyzanskaj vajny va ŭmovach faktyčnaj adsutnaści stratehii ŭkrainskaj armii?
— Partyzanskaja vajna — heta kali mirnyja žychary pierastajuć być mirnymi i kansalidujucca vakoł niejkaj idei. Ciapier mirnyja žychary zdolnyja tolki vychodzić na niejkija akcyi pratestu, ale jany nia zdolnyja na doŭhaterminovaje ŭzbrojenaje supraćstajańnie. Mirnyja žychary nia buduć farmiravać atrady, jakija sychodziać u les. Tyja, chto ciapier takim zajmajecca, — heta terarysty, jakimi kirujuć z Maskvy, jakija adtul atrymlivajuć patoki zbroi i mahutnaje finansavańnie. Ale my nia bačym, kab prosty ślesar dziadźka Vasia braŭ dvuchstvołku i išoŭ zmahacca.
Kamientary