U Mahilovie pravasłaŭnaja carkva prosić viarnuć joj budynak dziciačaj tvorčaści, baćki kateharyčna suprać
U Mahilovie baćki vychavancaŭ centra techničnaj tvorčaści pa zavułku Darvina 1, vystupili suprać pieradačy budynka pravasłaŭnaj carkvy.
Pytańnie ab pieradačy budynka centra abmiarkoŭvałasia 23 červienia na sustrečy pradstaŭnikoŭ abłvykankama, pravasłaŭnaj carkvy, kiraŭnictva centra, baćkoŭ vychavancaŭ. Pieradaču budynka inicyjavaŭ pravasłaŭny klir Mahiloŭskaj vobłaści sumiesna z najbolej aktyŭnymi viernikami. Akramia ŭład, jany źviarnulisia da vykładčykaŭ i baćkoŭ navučencaŭ struktury dadatkovaj adukacyi.
«Budynak, u jakim znachodzicca ciapier centr techničnaj tvorčaści, źjaŭlajecca pravasłaŭnaj śviatyniaj — chramam u honar śviatych Kanstancina i Aleny (da 1917 hoda heta była carkva vajennych śviataroŭ (kapiełanaŭ), viadomaja jak «Kanstancinaŭskaja»)», — havorycca ŭ zvarocie viernikaŭ.
Jany vykazvajuć padziaku ŭsim, chto ŭsie hetyja hady spryjaŭ zachavańniu budynka, ale prapanoŭvajuć ciapierašnim vykładčykam i navučencam pierajechać u inšaje miesca. «Ciapier źjaviłasia realnaja mahčymaść viarnuć chram chryścijanam i adradzić śviatoje miesca. Pačać pieraškadžać hetamu — značyć, pamianiać pazicyju zachavalnika śviatyni na pazicyju adkrytaha bohaborcy», — adznačajecca ŭ dakumiencie, jaki, pavodle słoŭ pradstaŭnika viernikaŭ, padpisali kala 1.500 čałaviek.
Da pazicyi carkvy dobrazyčliva pastavilisia abłasnyja ŭłady, jakija prapanavali raźmiaścić hurtki i siekcyi centra ŭ inšych miescach Mahilova, uhledžvajučy ŭ hetym mahčymaść aptymizacyi tvorčaha i adukacyjnaha pracesu.
Baćki navučencaŭ vystupili kateharyčna suprać rasfarmiravańnia adzinaj struktury, uhledzieŭšy ŭ hetym źniščeńnie jak samoha centra, tak i jaho kalektyvu, jaki vychavaŭ mnohija pakaleńni zachoplenych technikaj dziaciej.
Va ŭstanovie kala 60 hadoŭ zajmajucca avija-, aŭta-, sudamadeliravańniem, stvarajuć techničnyja vyraby, jakija zatym udzielničajuć u roznych konkursach i spabornictvach; trenirujucca junyja kartynhisty. Usie jany, pavodle słoŭ baćkoŭ, hodna pradstaŭlali vobłaść na roznych spabornictvach, u tym liku mižnarodnych.
«My nie suprać taho, kab hety budynak byŭ pieradadzieny carkvie, ale dajcie adekvatnaje miesca, kab usie hurtki raźmiaścilisia ŭ adnym miescy, kab byŭ zachavany centr techničnaj tvorčaści, nie byŭ raskidany pa ŭsim horadzie», — zajaŭlali baćki, adznačajučy, što inakš «budzie stračana ŭsio, što stvarałasia na praciahu 60 hadoŭ».
Paśla amal hadzinnaha abmierkavańnia pytańnia načalnik upraŭleńnia adukacyi abłvykankama Uładzimir Ryžkoŭ zajaviŭ, što, uličvajučy mierkavańnie baćkoŭ, budynak zastaniecca centram techničnaj tvorčaści. U toj ža čas, pavodle jaho słoŭ, pytańnie ab pieradačy budynka carkvy zastajecca adkrytym.
Kamientary