Niaviestka Bekchemaŭ. Što viadoma pra Nikołu Pelc, jakaja pasvaryłasia z Devidam i Viktoryjaj
Aktrysa. Scenarystka. Režysiorka. I abaronca sabak. Mienavita tak Nikoła Pelc Bekchem apisvaje siabie ŭ svaim profili ŭ Instagram.
31‑hadovaja žonka Bruklina Bekchema niadaŭna apynułasia ŭ epicentry miedyjnaha skandału paśla rezkaha dopisu jaje muža ŭ sacyjalnych sietkach, skiravanaha suprać jaho zornych baćkoŭ — Devida i Viktoryi Bekchem, paviedamlaje Bi-bi-si.
Chacia šyrokaja publika daviedałasia pra Nikołu pieradusim paśla jaje šlubu sa starejšym synam znakamitaj pary, nasamreč jana ŭžo daŭno žyvie ŭłasnym, całkam samastojnym žyćciom — jak aktrysa, aŭtarka i spadkajemnica adnoj z samych upłyvovych siemjaŭ Amieryki.
Siamja, hrošy i dziacinstva ŭ Ńju-Jorku
Baćka Nikoły — miljarder Nelsan Pelc, adzin z zasnavalnikaŭ inviestycyjnaha fondu ŭ Ńju-Jorku i były člen rady dyrektaraŭ šerahu mižnarodnych karparacyj, u tym liku Heinz. Maci — Kłaŭdyja Hiefnier, paśpiachovaja madel 1980— 1990‑ch hadoŭ.
U siamji Pelcaŭ vosiem dziaciej, a baćki razam užo bolš za 40 hadoŭ.
Nikoła vyrasła ŭ Ńju-Jorku i, jak jana raspaviadała ŭ intervju 2019 hoda, šlach da aktorskaj karjery byŭ dla jaje nie takim prostym — spačatku baćki byli suprać.
«U dziacinstvie ja hulała ŭ chakiej na lodzie, i tata vielmi chacieŭ, kab ja zasiarodziłasia mienavita na hetym. Jon ličyŭ heta nievierahodna krutym, — uspaminała jana. — Ja hulała na pazicyi centralnaha i pravaha forvarda.
Muzyka, moda, kino
Cikavaść da aktorstva ŭ Nikoły Pelc źjaviłasia ŭ 11 hadoŭ — dziakujučy školnym zaniatkam dramatyčnaha mastactva, jakija chutka stali jaje ŭlubionymi.
«Ja paprasiła mamu dazvolić mnie pasprabavać siabie ŭ aktorstvie. Spačatku baćki byli kateharyčna suprać, bo prosta nie razumieli, navošta mnie heta», — uspaminała Nikoła.
Z časam baćki źmiralisia ź jaje vybaram i padtrymali dačku.
U 2005 hodzie jana atrymała svaju pieršuju teatralnuju rolu ŭ śpiektakli «Čorny drozd» na scenie teatralnaha kłuba Manchetena.
A za hod da hetaha adbyŭsia jaje kinadebiut u kaladnaj kamiedyi «Sardečna zaprašajem, abo Susiedziam uvachod zabaronieny».
Dalej byli roli ŭ maštabnych i viadomych prajektach: «Apošni ŭładar stychij» režysiora M. Najta Šjamałana (2010), sieryjał «Matel Bejtsa» (2013), u jakim jana syhrała kachanuju Normana Bejtsa, błokbaster «Transformiery: Epocha vyniščeńnia» (2014), dramatyčny sieryjał «Kali zapalvajucca vuličnyja lichtary» (2017).
Nastupnym krokam u karjery Nikoły staŭ niezaležny mastacki film «Pryma», u jakim jana vykanała hałoŭnuju rolu baleryny. Pobač ź joj na ekranie źjavilisia łaŭreatki «Oskara» Fej Danaviej i Mira Sarvina. Asablivaść prajekta ŭ tym, što scenar byŭ stvorany na asnovie historyi i piersanaža, prydumanych samoj Pelc Bekchem.
Nikoła taksama zdymałasia ŭ muzyčnych klipach, u tym liku ŭ Zejna Malika (It's You) i Majli Sajrus (7 Things).
Akramia taho, jana pracavała madellu dla roznych brendaŭ, u pryvatnaści dla italjanskaha doma Genny.
U 2024 hodzie Nikoła debiutavała jak režysiorka ź filmam «Łoła», jaki jana nie tolki źniała, ale i napisała scenar, a taksama vykanała hałoŭnuju rolu. Jaje hierainia — maładaja žančyna, jakaja sprabuje zarabić hrošy, kab vyratavać brata i vyrvać jaho z taksičnaj siamiejnaj atmaśfiery.
Nikoła nieadnarazova pryznavałasia, što z-za svajho pryvilejavanaha stanovišča sutykajecca z žorstkaj krytykaj.
«Mnie časta pišuć złyja kamientary ŭ Instagram — i tak, ja ich čytaju. Ludzi kažuć: «Jana naohuł nie pracuje»», — raspaviadaje jana.
«Ja razumieju, čamu jany tak dumajuć. Ja, naprykład, nie pakazvaju kožny krok pracy nad filmam «Łoła», ale na samoj spravie jon stvaraŭsia šeść hadoŭ. Heta byŭ vielmi doŭhi i źniasilvajučy praces».
Stužka atrymała źmiešanyja vodhuki: rejtynh hledačoŭ na Rotten Tomatoes — 56%, a The Guardian adznačyŭ, što film «ekspłuatuje temu čałaviečych pakut».
Akramia karjery, Nikoła padtrymlivaje dohlad za žyviołami z prytułkaŭ. U 2022 hodzie arhanizacyja PETA adznačyła jaje za ŭkład u papularyzacyju adkaznaha staŭleńnia da žyvioł.
Šlub z Bruklinam i kanflikt ź siamjoj Biekchiemaŭ
I ŭsio ž mienavita adnosiny z Bruklinam Bekchemam zrabili Nikołu pastajannaj hierainiaj tabłoidaŭ — asabliva paśla ich raskošnaha viasiella ŭ 2022 hodzie. Bruklin raspaviadaŭ vydańniu Glamour, što ŭpieršyniu sustreŭ Nikołu na fiestyvali Coachella, a paźniej jany zblizilisia paśla viečarynki na Chełoŭin.
Nikoła nieadnarazova padkreślivała, nakolki dla jaje važnaja siamja — i rodnaja, i siamja muža.
U 2024 hodzie ŭ intervju Brydie jana ščyra dzialiłasia: «Siamja dla mianie — heta ŭsio, i ja kažu heta ad usiaho serca. Ja vielmi blizkaja sa svaimi rodnymi i ź siamjoj Bruklina. Niama ničoha lepšaha, čym viedać, što pobač jość ludzi, na jakich možna abapiercisia. Heta sapraŭdnaje błahasłaŭleńnie, za jakoje ja zaŭsiody ŭdziačnaja».
Chacia Nikoła dahetul publična chvalić svaju siamju ŭ sacyjalnych sietkach, niadaŭna stała viadoma, što jana vydaliła sa svajho profilu dopis ź vinšavańniem śviakruchi Viktoryi Bekchem z 50-hodździem.
Ciapier Nikoła i Bruklin apynulisia ŭ centry hučnaha kanfliktu z Devidam i Viktoryjaj paśla taho, jak Bruklin u Instagram zajaviŭ, što nie maje namieru mirycca ź siamjoj na fonie surjoznaha razryvu.
Ciapier čytajuć
«Siadzieŭ užo 50 sutak, zatrymali jaho dziaŭčynu i brata». Sukamiernik raskazaŭ pra radyjoamatara, aryštavanaha za zdradu dziaržavie3
Kamientary