Kamasutra, kiroŭcy z žaleznymi jajcami i palitviaźni. U Biełarusi vybrali najlepšuju rekłamu na rodnaj movie
Piaty fiestyval biełaruskamoŭnaj rekłamy i kamunikacyi AD.NAK! staŭ vybitnym i pa kolkaści zajavak, i pa jakaści prac. Hetu dumku vykazvajuć jak arhanizatary konkursa, tak i sami rekłamisty. Što ž i jak prasoŭvajuć u narod na rodnaj movie?
Temy pieramožcaŭ: biaśpieka ruchu, padvyšeńnie naradžalnaści, kursy biełaruskaj movy
Sioletni fiestyval AD.NAK! sabraŭ amal 200 udzielnikaŭ, jakija padali na sud žury kala 400 zajavak. Piać hadoŭ tamu, kali konkurs pravodzili ŭpieršyniu, zajavak było 105, a udzielnikaŭ 59. Arhanizatary fiestyvalu ŭpeŭnienyja, što taki rost zaznačaje padvyšeńnie cikavaści da mierapryjemstva. U adroźnieńni ad inšych fiestyvalaŭ rekłamy ŭdzieł ŭ AD.NAK! biaspłatny, a adna z asnoŭnych metaŭ – pašyryć užytak biełaruskaj movy i rolu rodnaj kultury.
- My nie robim mižsabojčyk. Pavinny trymać vysokuju płanku, - kaža Siarhiej Skarachod, kiraŭnik prajekta marketing.by i adzin z arhanizataraŭ mierapryjemstva, nakont taho, jak adbiralisia lepšyja pracy.
Adzinuju prablemu, jakuju vyłučyŭ Skarachod na hetym fiestyvali, – nieadkaznaje staŭleńnie niekatorych udzielnikaŭ da afarmleńnia i padačy prac.
- Pahladzicie, jak padajuć pracy na inšyja fiestyvali, – raić jon i praciahvaje apaviadać pra ciažkuju dolu žury. - Niezrazumieła było, što za prajekt i jaki ŭ jaho rezultat. U členaŭ žury ŭźnikali pytańni: «Nu zrabili karcinku - i što? Kolki pierapostaŭ, kolki čałaviek jaje ŭbačyli? Nadrukavali i paviesili ŭ siabie na kuchni - i heta realizavany prajekt? Ci paviesili na ŭvachodzie ŭ halereju «Ŭ» - i ŭsio? Jak žury pracavać i prymać rašeńnie? Niezrazumieła.
U hetym hodzie na fiestyvali była 21 naminacyja. Viadučyja ŭračystaj cyrymonii ŭznaharodžańnia aktrysa i akcior Nacyjanalnalnaha akademičnaha teatra imia Janki Kupały Hanna Chitryk i Pavieł Charłančuk-Južakoŭ navat žartavali, što buduć ahučvać pryzioraŭ «chutčej i pabolej», kab paśpieć na mietro, pakul jano nie skončyła pracu. Praŭda, padčas cyrymonii Charłančuk pierapytvaŭ ŭ zali, ci nie zanadta jon «kulamiotny». Zala nie demanstravała supracivu.
Samaja vysokaja ŭznaharoda fiestyvalu – Hran-pry. U hetym hodzie takich uznaharod było šeść. Kožnaja ź ich patrabuje asablivaj ŭvahi.
1. Hran-pry ŭ naminacyi «Indoor-rekłama, postar» uziaŭ prajekt «Vielikodnyja bitki» aŭtarki Taćciany Švarckopf z brendynhavaj kampanii AIDA Pioneer.
Taćciana Švarckopf raspaviała, što tema prajekta – biaśpieku ruchu na darohach krainy padčas vielikodnych vychodnych. Klijentam prajekta vystupiła DAI.
- My z dapamohaj alehoryi pakazali, jakija byvajuć sutyknieńni na darozie. Słohan «Žaleznyja jajcy - ŭ ćviarozych kiroŭcaŭ» zapomniŭsia ludziam, - kaža Taćciana i zaznačaje, što dziakujučy fiestyvalu daviedałasia, što pa-biełarusku słovo «voditiel» – «kiroŭca».
2. Hran-pry ŭ naminacyi «Sacyjalna aryjentavany prajekt, kampanija» atrymaŭ prajekt «Sałamianaja Kamasutra» rekłamnaha ahienctva NEF\TBWA & Dranik Style. TUT.BY pisaŭ pra hety prajekt raniej. Na pohlad aŭtaraŭ pracy, rolik pavinien pryciahnuć uvahu da prablemy vykarystańnia rodnaj movy i pavialičyć kolkaść nasielnictva krainy. Słohan prajekta - «Kachajciesia pa-biełarusku».
3. U naminacyi «Stryt-art» Hran-pry atrymaŭ prajekt Hanna Radźko i Aleny Baj «Upeŭnienaść na darozie».
4. Hran-pry ŭ naminacyi «Intehravanyja miedyjaprajekty» atrymała praca Romy Śviečnikava i časopisa 34mag.net «Roma jedzie».
5. U naminacyi Direct Marketing Hran-pry ŭznaharodzili getbob digital agency «Prostyja rečy».
6. Hran-pry u «Hramadska značnych prajektach» atrymali Hleb Łabadzienka i Alesia Litvinoŭskaja z prajektam biaspłatnych kursaŭ biełaruskaj movy «Mova Nanova».
Siarod astatnich pryzieraŭ treba adznačyć prajekt, pryśviečany palitviaźniam ŭ Biełarusi. Naprykład, u naminacyi «Indoor-rekłama, postar» druhoje miesca zaniaŭ postar Julii Laškievič, nad dyzajnam pracavali Aleh Minič, Mikałaj Chalezin i «Svaboda».
56% biełarusaŭ pazityŭna aceńvajuć biełaruskuju movu ŭ rekłamie
Siarhiej Skarachod adznačaje, čto biełaruskamoŭnych kamiercyjnych rekłamnych prajektaŭ u nas nie staje: na fiestyvali bolš prac z sacyjalnym uchiłam. Ź inšaha boku, zhodna daśledavańniu mižnarodnaj kampanii sacyjalnych i markietynhavych daśledvańniaŭ MAŚMI, jakoje zamoviła hramadskaja kulturnickaja kampanija «Budźma biełarusami!» nakont vykarystańnia biełaruskaj movy: 56% biełarusaŭ pazityŭna aceńvajuć biełaruskuju movu ŭ rekłamie, 60% padtrymlivajuć vykarystańnie rodnaj movy ŭ afarmleńni haradoŭ i vitryn.
Alena Makoŭskaja, kaardynatar «Budźma biełarusami!» i pradstaŭnik arhanizatara fiestyvala, dla paraŭnańnia raspaviadaje, što u 2009 hodzie taksama pravodziłasia apytanka biełarusaŭ. Adno z pytańniaŭ datyčyłasia taho, u jakich śfierach, na pohlad ludziej, treba bolš šyroka vykarystoŭvać biełaruskuju movu. Tady tolki 37% apytanych vykazalisia za toje, kab rodnaja mova sustrakałasia ŭ rekłamie čaściej. Makoŭskaja robić zaŭvahu, što, biezumoŭna, paraŭnoŭvać ličby 2009 hoda i 2014 niekarektna, bo ludziam zadavali roznyja pytańni.
- Ale my ličym, što cikavaść da biełaruskaj movy raście. Heta trend, - padkreślivaje jana.
Taksama zhodna daśledavańniu MAŚMI hetaha hoda, bolšaść biełarusaŭ daviarajuć praduktam charčavańnia i śpirtnym napojam biełaruskaj vytvorčaści. Zamiežnaj - kali razmova idzie pra vopratku, bializnu i pobytavuju techniku.
Na pohlad ekśpiertaŭ, vykarystańnie biełaruskaj movy ŭ rekłamie vyłučaje kampaniju. Vital Zacharaŭ, kreatyŭny dyrektar rekłamnaha ahienctva BRAMA branding, z hetym zhodny. Ale sa svajho boku dadaje, što kali ŭ asnovie prajekta - dobraja ideja, mova nie maje vyklučnaha značeńnia.
- Vykarystoŭvać biełaruskuju movu u rekłamie tolki dziela taho, kab vyłučycca, niapravilna, - kaža jon. - Pavinna być usio ŭ suvakupnaści: ideja, mova, kamunikacyja… I na fiestyval pavinny padavać mienavita takija pracy.
Pašyryć užytak movy ŭ rekłamie možna praz uviadzieńnie abaviazkovaha pracenta dla jaje ŭ miedyja
Illa Kucharaŭ, kreatyŭny dyrektar digital-ahienctva getbob, ličyć fiestyval dobraj inicyjatyvaj i krokam na šlachu da adradžeńnia rodnaj movy. Da taho ž zaznačaje, što siońnia jość kampanii, jakija z radaściu vykarystoŭvajuć movu ŭ rekłamnaj kamunikacyi. Naprykład, za apošni hod ahienctva getbob raspracavała čatyry biełaruskamoŭnyja prajekty.
Sa svajho boku Zacharaŭ ličyć mifam toje, što biełaruski spažyviec nie hatovy da biełaruskamoŭnaj rekłamy. Nieadnarazova na praktycy rekłamist bačyŭ advarotnuju situacyju, kali ludzi dziakavali kampanii za toje, što taja karystajecca rodnaj movaj. Ale i klijenty, i rekłamnyje ahienctvy, pa jaho słovach, majuć zababony nakont taho, što spažyviec nie zrazumieje biełaruskamoŭny pasył.
Pašyryć užytak biełaruskaj movy ŭ rekłamie surazmoŭca prapanoŭvaje praz uviadzieńnie abaviazkovaj kvoty biełaruskamoŭnaj rekłamy u miedyja.
- Čamuści 75% biełaruskaj muzyki hraje na radyjo. Čamu nie ŭvieści niejki pracent i dla biełaruskamoŭnaj rekłamy? U hetym niama ničoha strašnaha. Bo narod, jaki zabyvaje svaje karani, pierastaje isnavać, - kaža jon.
Jašče adzin varynt pašyreńnia ŭžytku movy, na jaho dumku, – raspracoŭka rekłamnaj kampanii, dzie mova padajecca jak štości modnaje.
Pakul vyšejpieraličanyja idei - tolki mary. Ale ž i fiestyval AD.NAK! kaliści taksama nie byŭ realnaściu. A siońnia tolki ŭznaharoda pieramožcaŭ zajmaje kala troch hadzin.
Kamientary