Scenar polskaha kinafilmu «Kiler» chojnickija šerłaki chołmsy ŭziali na tvorčaje ŭzbrajeńnie. U vyniku i zamoŭca zabojstva zatrymany, i sprava pa zabojstvie jość, a samoha zabojstva nie było.
Supracoŭniki Homielskaha abłasnoha ŭpraŭleńnia pa baraćbie z arhanizavanaj złačynnaściu i karupcyjaj (UBAZiK) raskryli zakaznoje zabojstva, jakoje płanavałasia ŭ Chojnickim rajonie. Ab hetym paviedamiŭ načalnik upraŭleńnia Valeryj Kruhlakoŭ.
Va ŭpraŭleńnie pastupiła apieratyŭnaja infarmacyja ab tym, što 58‑hadovaja žycharka Chojnikaŭ nastojliva šukaje vykanaŭcaŭ zakazu na zabojstva 36‑hadovaha žychara vioski Streličava Chojnickaha rajona. Pry praviercy źviestki paćvierdzilisia. Vyjaviłasia, što 75‑hadovaja maci hetaha mužčyny raniej aformiła hienieralnuju davieranaść na rasparadžeńnie adnapakajovaj kvateraj, atrymanaj u Chojnikach, na pradprymalnuju piensijanierku. Apošniaja abiacała dapamahčy ŭ pryvatyzacyi žylla. Adnak syn staŭ nastojvać na prodažy kvatery, i heta, pa ŭsim vidać, padšturchnuła žančynu da rašučych mieraŭ.
«Vykanaŭcami» zakazu vystupili supracoŭniki ŭpraŭleńnia, jakija i zmadelavali zabojstva mužčyny. Pakazaŭšy zakazčycy fatazdymki, jakija paćviardžajuć vykanańnie zakazu, u abmien jany atrymali Br2 młn — u stolki piensijanierka acaniła žyćcio achviary. Akramia taho, pasredniku jana paviedamiła, što nastupnym abjektam raspravy pavinna stać pažyłaja ŭładalnica kvatery.
U ciapierašni čas padazronaja va ŭčynienni złačynstva zatrymana i znachodzicca ŭ izalatary časovaha ŭtrymańnia. Pa hetamu faktu ŭzbudžana kryminalnaja sprava pa artykułu 139 «Zabojstva». U bližejšyja dni žančynie budzie pradjaŭlena abvinavačańnie.
Kamientary