Sioleta pavodle prahramy Kalinoŭskaha dla vučoby ŭ polskich VNU nabrana bolš za 50 biełarusaŭ

Pavodle prahramy Kalinoŭskaha sioleta dla vučoby ŭ polskich VNU nabrana bolš za 50 čałaviek, paviedamiła staršynia Kamiteta abarony represavanych «Salidarnaść» Ina Kulej.

Pavodle jaje słoŭ, udzielnikami prahramy stali represavanyja maładyja ludzi abo dzieci represavanych. Represijami ličacca kryminalnaje, administracyjnaje pakarańnie pavodle palityčnych matyvaŭ, štrafy, vobyski, źbivańni, zvalnieńni, adznačyła Kulej. Hetyja fakty paćviardžajucca pratakołami, sudovymi pastanovami, vypiskaj štrafaŭ i materyjałami ŚMI. Taksama prymajucca da ŭvahi rekamiendacyi hramadskich dziejačaŭ i palitykaŭ, jakija paćviardžajuć aktyŭnaść tych, chto jedzie pa prahramie, abo ich baćkoŭ. 

Jak paviedamiła Kulej, sioleta ź biełaruskich univiersitetaŭ pavodle palityčnych matyvaŭ adličana 12 čałaviek. Heta było źviazana «z udziełam studentaŭ u toj ci inšaj formie ŭ miascovych vybarach, a taksama z publičnymi vykazvańniami studentaŭ nakont najaŭnaści ŭ Biełarusi palityčnych źniavolenych». 

Usiaho za siem hadoŭ pracy prahramy praź jaje prajšli bolš jak 600 čałaviek, bolšaść jakich viarnulisia ŭ Biełaruś, paviedamiła Kulej. Vypuskniki, jak praviła, pracujuć u pryvatnym biźniesie. «Uładkavacca na pracu ŭ dziaržaŭnyja struktury paśla vučoby pavodle prahramy Kalinoŭskaha niemahčyma, –– skazała jana. –– I vielmi kiepska, što dziaržava nie hatovaja vykarystoŭvać patencyjał vypusknikoŭ dobrych jeŭrapiejskich univiersitetaŭ. Hetyja ludzi źjaŭlajucca ŭładalnikami kampietencyj i viedaŭ, jakija mohuć prynieści karyść Biełarusi. Adnak ŭsiamu svoj čas». 

Kulej padkreśliła, što prahrama Kalinoŭskaha –– adna z najlepšych u Jeŭropie prapanoŭ adukacyjnych prahram dla biełarusaŭ. Studenty, navučajučysia ŭ Polščy, udzielničajuć u akademičnych abmienach, tamu niekalki siemiestraŭ pravodziać va ŭniviersitetach inšych jeŭrapiejskich krain i ZŠA. 

Prahrama Kalinoŭskaha dla biełaruskich studentaŭ była zasnavanaja 30 sakavika 2006 hoda ŭ Varšaŭskim univiersitecie premjer-ministram Polščy i rektarami vyšejšych navučalnych ustanoŭ hetaj krainy. Pieršy nabor u polskija ŭniviersitety adbyŭsia ŭ lipieni taho ž hoda. Tady na vučobu było pryniata bolš za 200 čałaviek. 

Metaj prahramy źjaŭlajecca davańnie mahčymaści zakančeńnia vučoby ŭ Polščy tym studentam ź Biełarusi, jakija byli adličanyja ź biełaruskich VNU, aryštavanyja abo z-za palityčnych pryčyn nie mohuć tam vučycca. Kaardynataram prahramy źjaŭlajecca Centr vyvučeńnia Uschodniaj Jeŭropy Varšaŭskaha ŭniviersiteta. Nabor tradycyjna pravodzicca štohod u mai—červieni.

• 0
• 0
• 0
• 0
• 0
• 0
• 0
• 0