Jak ułady Minska zrazumiejuć, u kaho žyvuć niezarehistravanyja sabaki? Raźlik na nieabyjakavych susiedziaŭ

Faktyčna ŭ stalicy startuje ekśpierymient pa lehalizacyi chatnich hadavancaŭ. Pra toje, jak budzie pracavać hety miechanizm i jakim čynam stanie viadoma pra pražyvańnie žyvioły ŭ kvatery, piša sb.by.

Kolkaść chatnich hadavancaŭ u krainie nie paddajecca ŭliku. A pavinna b: zhodna z patrabavańniami zakanadaŭstva, katy i sabaki ŭ žyłych pamiaškańniach padlahajuć rehistracyi. Pryčym za vałodańnie sabakam treba jašče i płacić padatak. Ale ci ŭsie pastupajuć pavodle zakona?

Tolki ŭ stalicy, pavodle słoŭ hiendyrektara arhanizacyi «Minskaja haradskaja žyllovaja haspadarka» Maryny Toŭścik, de-jure pražyvaje 1,5 tysiačy chatnich katoŭ i 13,8 tysiačy sabak. De-fakta ž, pavodle acenak śpiecyjalistaŭ, prykładna ŭ piać razoŭ bolš. A heta nieparadak. Tamu ŭ stalicy vyrašyli stymulavać amataraŭ žyvioł da vykanańnia ich abaviazkaŭ — rehistracyi hadavancaŭ i vypłaty padatku na sabak.

— Užo ŭ sakaviku ŭ papiarovych i elektronnych rachunkach-apaviaščeńniach na apłatu ŽKP budzie raźmieščana napaminańnie pra nieabchodnaść zarehistravać chatniuju žyviołu, — raskazała hiendyrektar MHŽH.

— Da 1 lipienia, padčas tak zvanaha pierachodnaha pieryjadu, my budziem nahadvać pra nieabchodnaść vykanańnia normaŭ zakanadaŭstva. A ŭžo ŭ rachunku-apaviaščeńni za lipień płanujem, z ulikam najaŭnaj infarmacyi pra niezarehistravanych chatnich žyvioł, uklučać u žyroŭki padatak dla ŭładalnikaŭ sabak — niezaležna ad taho, zroblena rehistracyja ci nie.

Adkul infarmacyja?

Kab naličyć padatak na niezarehistravanaha sabaku, nieabchodna ŭstanavić, što žyvioła pražyvaje ŭ kvatery. Adpaviednaja rabota ŭžo viadziecca. Tatalnyja pravierki i masavyja rejdy kamunalniki, zrazumieła, pravodzić nie buduć. U ich svaje mietady atrymańnia infarmacyi, zajaŭlajuć u MHŽH. Naprykład, jana pastupaje ź miescaŭ — jak z žyllova-ekspłuatacyjnych učastkaŭ, tak i z administracyj rajonaŭ i vieterynarnych klinik. Pilnyja susiedzi — čamu b i nie?

— Padmohaj źjaŭlajucca ŭ tym liku zvaroty hramadzian, — kaža Maryna Toŭścik. — Naprykład, niadaŭna my razhladali zvarot, jaki ŭ vyniku padšturchnuŭ ludziej zarehistravać troch chatnich žyvioł u adnym padjeździe.

Pavodle słoŭ hiendyrektara, kali pastupaje infarmacyja pra najaŭnaść sabaki ŭ kvatery, ŽEU abaviazana na praciahu 15 dzion zafiksavać hety fakt i ŭdakładnić va ŭładalnika, ci jość u žyvioły aficyjnaja rehistracyja. Kali jość, značyć, padatak užo naličvajecca. Kali paćviardžalnych dakumientaŭ niama, uklučajecca režym prafiłaktyki i papiaredžańnia. I kali ŭładalnik hadavanca praihnaruje prapanovu prajści rehistracyju, budzie zapuščana pracedura spahnańnia padatku.

U MHŽH nahadali: sankcyi za parušeńnie praviłaŭ utrymańnia sabak — štraf u pamiery ad 1 da 15 bazavych vieličyń (art. 16.30 KaAP). I zajmajucca hetym hałoŭnym čynam rabotniki žyllova-kamunalnych słužbaŭ. A voś kali haspadar hadavanca praihnaruje naličany padatak, u spravu ŭstupajuć pradstaŭniki inšaha viedamstva.

— Miera adkaznaści za niavypłatu padatku na vałodańnie sabakam dakładna takaja ž, jak dla luboha niepłacielščyka padatkaŭ, — tłumačyć namieśnik načalnika inśpiekcyi Ministerstva pa padatkach i zborach pa horadzie Minsku Volha Tarasievič.

— Heta štraf 15 pracentaŭ ad niavypłačanaj sumy padatku, ale nie mienš za 0,5 bazavaj vieličyni (artykuł 14.4 KaAP).

Padatak za vałodańnie sabakami ich haspadary pavinny płacić štokvartalna z momantu dasiahnieńnia žyviołaj uzrostu troch miesiacaŭ. Suma razavaj vypłaty ŭ 2026 hodzie — 14 rubloŭ (67 rubloŭ — za sabaku patencyjna niebiaśpiečnaj parody). U Minsku i taho mienš: za zvyčajnaha sabaku treba płacić usiaho 11,1 rubla ŭ kvartał.

Artykułam 309—1 Padatkovaha kodeksa ŭstanoŭleny lhoty pa padatku za vałodańnie sabakami. Ad vypłaty vyzvalajucca:

♦ invalidy, jakija vałodajuć sabakam-pavadyrom, invalidy I i II hrupy, invalidy III hrupy (tolki na adnaho sabaku);

♦ hramadzianie, jakija dasiahnuli ahulnaŭstanoŭlenaha piensijnaha ŭzrostu albo majuć prava na piensiju sa źnižanym ahulnaŭstanoŭlenym piensijnym uzrostam (tolki na adnaho sabaku);

♦ baćki (usynavicieli), jakija vychoŭvajuć dziaciej-invalidaŭ va ŭzroście da 18 hadoŭ, albo ŭ šmatdzietnych siemjach z tryma i bolš dziećmi da 18 hadoŭ (tolki na adnaho sabaku);

♦ asoby, što pražyvajuć u adnakvaternych abo błakiravanych žyłych damach (na adnaho sabaku).

— Kali lhot niama, to sumu padatku, jakaja źjavicca ŭ žyroŭcy, treba ŭnieści adnačasova z raźlikami za ŽKP, — udakładniaje Volha Tarasievič.

• 1
• 0
• 3
• 2
• 0
• 0
• 2
• 0