Strasburski sud pryznaŭ rasiejskija ŭłady vinavatymi ŭ zabojstvie troch mirnych čačenskich žycharoŭ u studzieni 2000 hodu
Mova idzie pra śmierć žychara Hroznaha Abduł‑Vahapa Tanhijeva, jaho žonki Chiržan Hadaboršavaj i jaho švahra Ismaiła Hadaboršava, jakija byli rasstralanyja ŭ Starapramysłoŭskim rajonie čačenskaj stalicy ŭ kancy studzienia 2000 hodu.
Sa skarhaj u Eŭrapiejski sud pa pravach čałavieka źviarnułasia dačka Tanhijeva i Hadaboršavaj.
U kastryčniku 2000 h. da Hroznaha padyšli federalnyja vojski. Siamja Tanhijeva chavałasia ad bambardzirovak u padvale ŭłasnaha domu na vulicy Dziaržavina.
U studzieni, jak zhadvaje dačka Tanhijeva, abstreły pačaścilisia, i častka svajakoŭ vyrašyła pierabracca ŭ padvał domu na vulicy Puhačova, jaki zdavaŭsia bolš biaśpiečnym.
Pazoŭnica kaža, što ŭ dom dla pravierki dakumentaŭ časta prychodzili sałdaty federalny sił.
11 studzienia 2000 hodu pazoŭnica viarnułasia ŭ dom na vulicy Dziaržavina i znajšła baćkoŭ i dziadźku rasstralanymi. Da taho času Starapramysłoŭski rajon kantralavaŭsia federalnymi vojskami.
Sudu ŭ Rasiei nie było
Eŭrapiejski sud pa pravach čałavieka paličyŭ, što rasiejskija ŭłady parušyli artykuły № 2 (Prava na žyćcio) i №3 (Zabarona katavańniaŭ) Eŭrapiejskaj kanvencyi ab abaronie pravoŭ čałavieka i asnoŭnych svabodaŭ.
Pavodle rašeńnia sudu Rasieja pavinna budzie vypłacić pazoŭnicy, jakaja zaraz žyvie ŭ Inhušecii, 60 tys. eŭra ŭ jakaści kampensavańnia niemateryjalnaha ŭronu i 6 556 eŭra sudovych vydatkaŭ.
Vynosiačy rašeńnie, strasburski sud asabliva adznačyŭ, što rasiejski ŭrad admoviŭsia addać nieabchodnyja dakumenty pa hetaj spravie, a taksama nia daŭ pierakanaŭčych tłumačeńniaŭ.
Jak kaža supracoŭnik čačenskaha adździaleńnia pravaabarončaha centru «Memaryjał» Kaciaryna Sakirjanskaja, nijakaha raśśledavańnia na terytoryi Rasiei pa fakcie rasstrełu mirnych žycharoŭ nie pravodziłasia. Asoby vajenasłužačych, što rasstralali mirnych žycharoŭ, nia vyjaŭlenyja.
Pavodle pravaabarončaj arhanizacyi Human Rights Watch, sa śniežnia 1999 h. pa studzień 2000 h. u Starapramysłoŭskim rajonie byli zabityja 38 mirnych žycharoŭ. Usiaho pa hetaj spravie było padadziena 17 skarhaŭ. Na siońnia vyjhrany spravy pa 12 skarhach.
Kamientary