Jak paviedamlaje MUS Biełarusi, u pole zroku milicyjanieraŭ trapiŭ žychar Minskaj vobłaści. Padazravany, dziejničajučy ŭ składzie złačynnaj hrupy, pasprabavaŭ vyvieźci troch biełarusak u Rasiju dla zaniatku prastytucyjaj.
Zatrymany paznajomiŭsia ź dziaŭčatami na adnym z sajtaŭ znajomstvaŭ. Za ich dastaŭku ŭ Rasiju jon płanavaŭ atrymać peŭny hanarar.
Ciapier padazrony źmieščany ŭ IČU i daje pakazańni, u dačynieńni da jaho raspačata sprava na padstavie č. 1 art. 14 art. 171 KK. Sankcyja hetaha artykuła praduhledžvaje pakarańnie ŭ vyhladzie pazbaŭleńnia voli terminam da 10 hadoŭ z kanfiskacyjaj majomaści.
Jak adznačyŭ namieśnik načalnika ŭpraŭleńnia pa narkakantroli i procidziejańni handlu ludźmi MUS Biełarusi Siarhiej Kaŭtun, siońnia supracoŭniki milicyi dziejničajuć na apiaredžańnie i zatrymańnie trafikieraŭ, praduchilajučy sproby vyvazu našych hramadzian dla ekspłuatacyi za miažu. Tak, u 2013 hodzie było zatrymana 11 čałaviek na miescy złačynstva, a za vosiem miesiacaŭ hetaha hoda ŭžo vosiem.
«Siońnia nie tolki zachavana, ale i prymnožana stanoŭčaja dynamika vynikovaści pracy našych padraździaleńniaŭ, — kanstatavaŭ Siarhiej Kaŭtun. — Apieratyŭniki ŭžo vyjavili 427 złačynstvaŭ, źviazanych z handlem ludźmi, u tym liku 125 ciažkich i asabliva ciažkich. Pierakryta 14 kanałaŭ vyvazu «žyvoha» tavaru ŭ try krainy śvietu, ustanoŭlena 83 paciarpiełyja».
Kamientary