Nacyja ciažkich atletaŭ. Spartovyja vyniki hodu

Spartovyja vyniki hodu ŭ ahladzie "NN"

Nieadnaznačnaść hodu: Bernd Štanhie

U červieni zbornaja Biełarusi pa futbole dvojčy biazvolna sastupiła baŭharam u ramkach adboru da čempijanatu Eŭropy. Hetyja parazy pazbavili našych chłopcaŭ šancaŭ trapić na kantynentalnaje pieršynstva.

Hałoŭny trener kamandy Jury Puntus nia staŭ čakać aficyjnaha zvalnieńnia z pasady, a sam padaŭ u adstaŭku. Pošuki novaha nastaŭnika vialisia pieravažna siarod zamiežnych specyjalistaŭ. Siarod patecyjnych kandydataŭ nazyvalisia rasiejskija, niamieckija, českija, ukrainskija trenery.

Urešcie, vybar byŭ spynieny na Berndu Štanhie z uschodniaj častki Niamieččyny. U svoj čas Štanhie źjaŭlaŭsia supracoŭnikam «Štazi», danosiačy na hulcoŭ kamand, jakija ŭznačalvaŭ. Personie niemca dadaje adyjoznaści j toj fakt, što jon treniravaŭ zbornuju Iraku časoŭ Sadama Chusejna. Štanhie zaŭsiody padkreślivaje, što futboł pa‑za palitykaj, tamu nie saromiejecca svajoj byłoj pracy.

Pieršy tavaryski matč kamanda Štanhie praviała ź izrailcianami, dzie pry kancy sustrečy pieramahła — 2:1. Paśla byli čatyry parazy zapar. Apateozam niaŭdač niemca staŭ chatni matč ź Luksemurham: 0:1. Adnak užo nastupnyja sustrečy istotna źmianili staŭleńnie zaŭziataraŭ da Bernda Štanhie. Spačatku ŭ Tyranie našyja chłopcy pieramahli albancaŭ, a paśla ŭ Miensku — halandcaŭ. Hetyja pieramohi dazvoli zaniać u rejtynhu FIFA amal rekordnaje 60‑ie miesca, a Štanhie spakojna rychtavacca da nastupnaha adboračnaha cyklu. Supierniki tamaka, darečy, buduć nia samyja lohkija — Anhlija, Charvatyja, Ukraina. Razam z tym, Štanhie nie zdymaje zadačy vychadu na Čempijanat śvietu‑2010.

Naleta ŭžo jość damoŭlenaść na tavaryskija hulni z mocnymi turkami, niemcami i arhientyncami (doma!). Napeŭna, nastupny hod i vyrašyć rolu Štanhie ŭ biełaruskim futbole.

Tryjumf hodu: bronza baskietbalistak

Biełaruskija baskietbalistki jechali ŭ Italiju na čempijanat Eŭropy absalutnymi debiutantkami top‑spabornictvaŭ. Mała chto vieryŭ, što našyja dziaŭčaty pieraadolejuć chacia b pieršy barjer. Na spravie ž akazałasia našmat lahčej, čym čakałasia.

Kamanda biez asablivych prablem vyjšła ŭ čverćfinał, dzie ich supiernicami stali čempijonki kantynentu z Čechii. Hulnia atrymałasia nia samaj pryhožaj, ale napružanaj. Tolki na apošnich chvilinach stała zrazumieła, što nervy ŭ biełarusak macniejšyja. U paŭfinale my prajhrali hišpankam, ale zmahli začapić bronzu ŭ sustrečy z łatyškami.

Zbornaja Biełarusi nia maje jarka vyražanaha lidera, jakaja b u adzinočku mahła ciahnuć za saboj cełuju kamandu. Biełaruski akazalisia mocnymi kamandnym ducham.

Upieršyniu ŭ historyi niezaležnaj Biełarusi zbornaja ŭ hulniavym vidzie sportu zavajavała medal na čempijanacie Eŭropy ci śvietu. Na Radzimie baskietbalistak sustrakali jak sapraŭdnych pieramožcaŭ. Nacyja choča adčuć siabie kamandaj.

Naleta ŭ traŭni heta samaja kamanda ŭ Madrydzie pazmahajecca za vychad na pekinskuju Alimpijadu. A na dniach stanie viadoma, ci budzie pryznanaja Natalla Marčanka najlepšaj baskietbalistkaj Staroha śvietu za 2007 hod.

Rasčaravańnie hodu: bijatlon

Zbornaja Biełarusi pa bijatlonie, jakaja zdaŭna pryvučyła nas da pieramoh, pieražyvaje najhoršyja časy ŭ svajoj historyi. Skončyli vystupleńnie za kamandu veterany, hodnaj maładoj źmieny na ich miesca nie pryjšło, lehijanery, pryviezienyja z Rasiei, taksama akazalisia nie vysokaj klasy.

Try pieršyja etapy Kubku śvietu hetaha hodu pakinuli žachlivaje ŭražańnie. Pakul pieramohi štampavali niemcy, narvehi, rasiejcy, brali medali ŭkraincy, aŭstryjcy, švedy, biełarusy zmahalisia za 40‑70 miescy, jak u žančyn, tak i ŭ mužčyn.

U Kubku nacyj našy bijatlanisty ciapier zajmajuć rekordna nizkija adzinaccatyja miescy. Nijakaha praśvietu bližejšym časam taksama nia bačna. Prykład bijatlonu pakazvaje, da čaho moža pryvieści praktyka masavaha pryvozu ŭ krainu druhasnych spartoŭcaŭ z‑za miažy.

Prahres hodu: ciažkaja atletyka

Zatoje zusim inšaja karcina nazirajecca ŭ ciažkaj atletycy. Hałoŭny trener kamandy Viktar Hančaroŭ nieadnarazova havaryŭ, što pośpiechi jahonaj kamandy najpierš hruntujucca na «nacyjanaliźmie». Zbornaja składzienaja vyklučna ź biełaruskich atletaŭ, jakich hramatna i metanakiravana viaduć da pieramoh z samaha rańniaha ŭzrostu.

Čempijanat śvietu ŭ Tajlandzie padaryŭ nam dvuch pieramožcaŭ — mahiloŭca Andreja Rybakova i barysaŭca Andreja Aramnava. Rybakoŭ vyjhraŭ pieršynstva z suśvietnym rekordam u ryŭku i rekordam Eŭropy pavodle sumy dvuch praktykavańniaŭ.

19‑hadovy Aramnaŭ — adkryćcio hodu. Nichto nie čakaŭ sioleta ad jaho takich udałych vystupaŭ. Vučań Michaiła Saładara ŭpeŭniena vyjhraŭ suśvietny čempijanat, apiaredzišy asnoŭnaha kankurenta až na 12 kilahramaŭ!

Mienavita na ciažkuju atletyku budzie rabicca adna z hałoŭnych stavak na Alimpijadzie‑2008 u Pekinie.

• 0
• 0
• 0
• 0
• 0
• 0
• 0
• 0