Hod kałychanak. Vyniki hodu ŭ muzycy

Muzyčnyja vyniki hodu + rejtynh piesień 2007 na sajcie «Tuzin hitoŭ» (pa kolkaści spampoŭvańniaŭ).

Padzieja

Biezumoŭnaja padzieja hodu — viartańni. Ale zusim nia ŭ źviazku ź vizytam rokieraŭ u administracyju. Sioleta svaje novyja numarnyja albomy pradstavili faktyčna ŭsie hieroi biełaruskaha rok‑frontu. «Štazi» ad «dziubielaŭ» i «Kapitał» ad «lapisaŭ» čakali try hady, «06» ad «eneremaŭ» vyjšaŭ praź piać hadoŭ maŭčańnia hurtu, a dysk «Usio žyćcio — dziŭny son» ad «Kramy» — źjaviŭsia naahuł praz šeść hod paśla apošniaj novaj prahramy. Kali tut zhadać jašče «Pieśniaroŭ» z albomam «Raspaviadalnaja» — pieršym ad časoŭ Mulavina, i «Pieśniu pra zubra» VIA «Suzorja», rasfarmavanaha ŭ 1983 hodzie, — dyk, naahuł, namałot 2007 hodu možna pryznać rekordnym.

Pieśni

Pieśnia hodu samavyznačyłasia jašče letaś, kali ŭ byłym harderobie, a ciapier rok‑kaviarni na 50 miescaŭ pad nazvaj «Hrafici», Lavon Volski ŭpieršyniu praśpiavaŭ: «Darahija minčanie i hości stalicy…» Na nastupnym vystupie N.R.M. hetuju pieśniu słuchačy ŭžo padpiavali ź niamienšym impetam, čym «Try čarapachi». A ŭ studyjnym varyjancyje «Miensk i Minsk» vyjšaŭ sioleta — i z chodu pa‑za kankurencyjaj pieramoh u «Tuzinie Hitoŭ» (pieśniu spampavali bolš za 20 000 čałaviek!) i ŭžo zahučaŭ u dvarach i padjezdach. Jašče tolki prezentujučy hety tvor, Volski pradkazvaŭ: «Mnie napačatku padavałasia, što pieśnia budzie nia ŭ zvykłaj rok‑stylistycy, a jak zonh z pjesy Brechta. Ale kali ŭzialisia za aranžavańnie, mižvoli atrymałasia hetkaja troški dvaravataja rok‑balada».

«Revalucyja» skončyłasia, čas śpiavać «Kałychanki». Tak možna acharaktaryzavać nastroj inšych rok‑hitoŭ 2007 hodu. «Tavaryš Maŭzer» z žorstkaj letašniaj «Biełaruś budzie volnaj» pieraklučyŭsia na cichieńkuju akustyčnuju baladu pad nazvaj «Kałychanka», jakaja zajmieła vialiki pośpiech. Svoj novy hit bieraściejskaja «Ściana» taksama vyrašyła nazvać «Kałychankaju» (choć pavodle stylistyki jana zusim dalokaja ad kałychanki). A tut jašče Naka na čale z aktorkaju rasiejskaha dramatyčnaha teatru Nastaj Špakoŭskaj zapisali pieršuju ŭ svajoj karjery biełaruskamoŭnuju pieśniu — i tuju nazvali «BY», z prypievam: «Baju‑baj, zasynaj».

Hałoŭnym ža niebiełaruskamoŭnym biełaruskim hitom vidavočna staŭ «Kapitał» z adnajmiennaha albomu «Lapisa Trubiackoha». Jakraz zhadaŭsia 1996 hod, kali ichnaje «Aŭ» dy z «Pastuškom» hučali nia tolki z kožnaha prasa, ale i z kožnaha pyłasosu, ladoŭni dy elektraplity:). «Moj pijar‑menedžer — Karł Marks», — ciapier hetak modna padpisvacca na forumach.

Prajekty

Urešcie i pa pravie ŭ šerah prajektaŭ muzyčnaha hodu možna ŭklučyć niešta aficyjnaje. Prajekt «Našy pieśni. Versija 2007» telekanału ANT vyjšaŭ sapraŭdy dušeŭnym, kreatyŭnym i …niečakanym. Paciahanyja narodnyja pieśni zahučali ŭ alternatyŭnych aranžyroŭkach, nabyli druhoje dychańnie pop‑hity 80‑ch — pačatku 90‑ch hadoŭ. Niekatoryja z vykanaŭcaŭ ź biełaruskaj teleabojmy dziakujučy henamu prajektu naahuł upieršyniu biełaruskaje słova pramovili. A da ŭsiaho hienpradusar ANT Jahor Chrustaloŭ uklučyŭ u śpis udzielnikaŭ akramia abrydłych užo tvaraŭ — śviežych, jak dla našaha TB, Źmitra Vajciuškieviča z Bahdanovičavaj «Zorkaj Veneraj» i «Kramu» ź nieŭmiručaj «Stefkaj» na novy ład. Na pytańnie, kali budzie Volski na telebačańni, Chrustaloŭ tolki chitra ŭśmichajecca: «Ŭsio moža być».

Biezumoŭnaj padziejaj možna nazvać i prajekt natchnionych «Chatynskaj apovieściu» biełaruskich pradusaraŭ pad nazvaj «Chatyń:Tacet, Sed Loquitur» z udziełam francuskich, italjanskich, rasiejskich, vuhorskich i, viadoma ž, biełaruskich muzykaŭ. Hatyčnaja muzyka, indastryeł dy embijent ci nie ŭpieršyniu zahučali ŭ našym kantekście. Kali ad prasłuchoŭvańnia pieśni — pa skury prabiahajuć murašy, značyć jaje tvorca dasiahnuŭ svajoj mety. Kali ad prasłuchoŭvańnia ŭsiaho prajektu apanoŭvaje dušeŭnaje trymcieńnie — značyć heta praca Nadzvyčajnaja.

Padzieja‑2

I ŭsio ž viartańnie. Abiacanki‑cacanki prezydenckich ideolahaŭ pad Novy hod niečakana pačali spraŭdžvacca: tak supała, što paśla vizytu ŭ administracyju «Pałac» trapiŭ na «Eŭrafest» (čytaj — u lik hałoŭnych pretendentaŭ na pajezdku na «Eŭrabačańnie»), źjaviŭsia kaladny biełaruskamoŭny prajekt na ANT. Dy jašče seryja kancertaŭ prajšła ź vialikim pośpiecham — klubnyja zali łamilisia na «Kramie», «Krambambuli», «Narodnym albomie». Neuro Dubel vymušany byŭ hrać dvojčy, bo nia ŭsie achvočyja zdoleli trapić na kancert. A ci toje jašče budzie? Tolki ŭ pieršyja try miesiacy nastupnaha hodu planujecca rok‑fest pad umoŭnaj nazvaj «Viartańnie» ŭ Pałacy sportu, zaŭždy skandalnaja i zaŭždy pryvabnaja «Rok‑Karanacyja», dabračynnaja akcyja rokieraŭ u Pałacy respubliki, a tut jašče i «BiełSat» z masaj muzyčnych prahramaŭ. Žyćcio — dziŭny son, sapraŭdy.

Siarhiej Budkin

***

Rejtynh piesień 2007 na sajcie «Tuzin hitoŭ» (pa kolkaści spampoŭvańniaŭ)

N.R.M. Miensk i Minsk
Osimira Ziaziula myja sieryja
IQ48 Schavanaje serca
B:N: DaždžamiTav.Mauzer Kałychanka
Band A Revalucyja
Krama Nieba — los arła
Zet Love story — don`t worry
Rokaš Krumkač
Troica Viedźma
PitBull Maju nadzieju
Nestary Band Ahni harać

• 0
• 0
• 0
• 0
• 0
• 0
• 0
• 0