Vytvorcy dziciačaha adzieńnia «Marusya» nie płaciać rabotnicam
U redakcyju «Našaj Nivy» praciahvajuć iści skarhi ad supracoŭnikaŭ biełaruskich pradpryjemstvaŭ. U hety raz da nas źviarnułasia žančyna, jakaja i praz dva miesiacy paśla zvalnieńnia nie moža atrymać hrošy, jakija zarabiła. Nie dapamoh navat pazoŭ u sud.
U kancy leta naša čytačka ŭładkavałasia na «Marusiu» – viadomaje minskaje pradpryjemstva pa vytvorčaści dziciačaha adzieńnia. Zarobak abiacali prymalny.
Adnak na spravie ŭsio akazałasia nie tak dobra. Pa-pieršaje, na pracy niaredka prychodziłasia zastavacca dapazna. A pa-druhoje, vyśvietliłasia, što za hetyja pierapracoŭki płaciać abiacankami. Zatrymak zarobku – zvyčajnaja sprava dla pradpryjemstva.
«Za try miesiacy majoj pracy ja atrymała tolki 1,3 miljona rubleŭ. To bok – častku zarpłaty za pieršy miesiac pracy. I ŭsio, — kaža žančyna. – Pryčym dla «Marusi» heta nie dziŭna. Ludziej pryvučyli da takoj sistemy, mnohija ŭvosień jašče nie atrymali ŭsie hrošy za maj. Pry hetym supracoŭniki pačynali ździŭlacca, kali niechta vykazvaŭ niezadavolenaść takoj situacyjaj – kazali, a jak heta tabie buduć płacić, kali ty aburaješsia? Maŭlaŭ, nie treba psavać adnosiny z načalstvam, dyk moža choć niešta zapłaciać. Kiraŭnictva «Marusi», u svaju čarhu, adkazvała prosta — što hrošaj niama».
Prajšoŭ miesiac, potym druhi. Hrošaj nie davali. Stała zrazumieła, što praca ŭ takich umovach nie maje sensu. I, praz amal try miesiacy, žančyna zvolniłsia. Ale ŭ paznačanyja zakanadaŭstvam try dni paśla zvalnieńnia jaje nie raźličyli.
«Paprasili troški pačakać. Pačakała. Prajšoŭ tydzień, druhi… Płacić nichto nie źbiraŭsia».
Tady byłaja supracoŭnica vyrašyła iści ŭ sud. Napisała zajavu, dačakałasia jaje razhledžańnia.
«Ale sami sudovyja rabotniki skazali – kali chočacie, kab vam chutčej vypłacili, to lepš padpisać z pradpryjemstvam miravoje pahadnieńnie. Bo kali patrabavać kampiensacyju za ŭsie dni čakańnia, to hrošaj budzie bolš, ale čakać pryjdziecca nieviadoma kolki, — raspaviadaje žančyna. – Tamu hetaje pahadnieńnie ja padpisała. Zhodna ź im na praciahu dvuch tydniaŭ sa mnoj pavinny byli raźličycca».
Ale «Marusia» iznoŭ praihnaravała ŭsie terminy. Praz dva tydni žančyna iznoŭ pajšła ŭ sud – bo pradpryjemstva nie vypłaciła ni kapiejčyny. Ciapier čakaje, čym heta ŭsio skončycca, ale ŭpeŭnienaści ŭ tym, što da śviataŭ joj zapłaciać jaje ž hrošy, niama.
Da taho ž, jak vyśvietliłasia, kampanija «Marusia» składajecca ź niekalkich roznych jurydyčnych asobaŭ. U adnosinach da adnoj ź ich – STAA «Marusia» – užo ŭvohule raspačata pracedura bankructva.
«Kali praz sud ničoha nie atrymlivajecca, niachaj ludzi iduć u fond sacyjalnaj abarony nasielnictva. Lepiej za ŭsio, kali jość jašče paciarpiełyja, abjadnać namahańni i pasprabavać inicyjavać pytańnie ab pracedury bankructva praz ekanamičny sud i prakuraturu. Tady zamiest isnujučaha kiraŭnictva budzie pryznačana antykryzisnaje, jakoje budzie vyrašać pytańni pa zapazyčanaściach», — paviedamiŭ Ihar Ramanionak, antykryzisny kiraŭnik STAA «Marusia», jakoha pryznačyŭ sud.
Datelefanavacca da kiraŭnictva, na žal, nie atrymałasia. Čaściej za ŭsie da telefona ŭvohule nichto nie padychodziŭ. A niešmatlikija ŭdałyja sproby kančalisia na sakratarcy, jakaja abiacała złučyć z dyrektaram. Adnak vynikam byli iznoŭ ža doŭhija hudki.
«Kali ja telefanuju, jany taksama nie padychodziać. Dla ich ja takoj ža vorah, jak i vy i ludzi, jakim jany nie płaciać», — skazaŭ Ramanionak.
Dadadzim, što ŭ 2011 hodzie kiraŭnik «Marusi» Maryna Padabied zaniała piataje miesca ŭ rejtynhu samych paśpiachovych biznesvumen Biełarusi. A na siońniašni dzień, pavodle našaj infarmacyi, Maryna i jaje muž Viktar Padabied mohuć być pryciahnutyja da adkaznaści pa pryčynie zapazyčanaści pa zajmach, jakaja składaje kala miljarda rubloŭ.
Cikava, što słohan pradpryjemstva hučyć «dla tych, chto buduć lepšymi za nas». Miarkujučy pa ŭsim, być lepšym za takoje kiraŭnictva nie vielmi i składana.
Kamientary