Ministr adukacyi Michaił Žuraŭkoŭ daŭ pieršaje intervju u siabie doma

27 śniežnia 2014 pieršy prarektar BDU Michaił Žuraŭkoŭ staŭ ministram adukacyi. Na partale Tut.by źjaviłasia pieršaje intervju ź im.

Pra vyhlad

Michaił Žuraŭkoŭ kaža, što chadzić u džynsach nie pryniata ŭ biełaruskaj prafiesury i vykładčykaŭ, i ličyć heta nie zusim pravilnym.

— Praca z moładździu praduhledžvaje bolš svabodnuju vopratku. Ja baču, jak apranajucca maje kalehi na Zachadzie, tamu nikoli nie byŭ suprać, kab, naprykład, prafiesar čytaŭ lekcyju ŭ džynsach i stylovym švedry.

Na niekatorych sustrečach u niefarmalnaj vopratcy, chutčej za ŭsio, možna budzie ŭbačyć i novaha ministra adukacyi.

— Ja zapłanavaŭ sabie sustrečy za kubkam čaju sa studentami, z maładymi nastaŭnikami i vykładčykami. I kali ramki hetych mierapryjemstvaŭ mnie dazvolać, na ich ja źjaŭlusia dakładna nie ŭ aficyjnym kaściumie. Ja chaču budavać z moładździu bolš davierlivyja adnosiny i liču, što maładyja ludzi pavinny bolš aktyŭna ŭklučacca ŭ kiravańnie śfieraj adukacyi.

«Biełaruś daŭno hatovaja da ŭstupleńnia ŭ Bałonski praces»

— Studenty chacieli b bolš pravoŭ ŭ spravach kiravańnia univiersitetam, ale im jašče krychu nie chapaje vopytu.

Michaił Anatoljevič kaža, što Bałonski praces u Biełarusi bolš patrebny studentam, čym vykładčykam. Pry hetym ŭstupleńnie tudy našaj krainy — adna z asnoŭnych zadač novaha ministra na bližejšy hod.

— Chacia mnohija krainy zaraz nieadnaznačna ŭsprymajuć Bałonski praces. Naprykład, univiersitety Hiermanii zaŭsiody vypuskali vydatnych inžynieraŭ i rychtavali ich pa piać z pałovaj hadoŭ, i ciapier jany nijak nie mohuć ŭcisnuć patrebnuju bazu ŭ čatyry hady, jakija praduhledžvaje Bałonskaja sistema. A voś Francyja i Italija vielmi lohka pierabudavalisia.

Biełaruś ža, pa słovach Michaiła Žuraŭkova, užo daŭno hatovaja ŭstupić u Bałonski praces. Tym bolš kraina niadaŭna pierajšła pa bolšaści śpiecyjalnaściaŭ na 4-hadovuju vyšejšuju adukacyju.

— Ja spadziajusia, mnie ŭdasca damovicca z usimi strukturami, kab my narešcie nazvali rečy svaimi imionami. Kab paśla 4 hadoŭ vučoby student atrymlivaŭ stupień bakałaŭra, paśla čaho moh iści na 1—2 hady ŭ mahistraturu. Hetyja źmieny nam dyktuje samo žyćcio, bo ŭžo zaraz našych vypusknikoŭ u Rasii pryraŭnoŭvajuć da bakałaŭraŭ.

Adna ź pieraškod dla ŭstupleńnia Biełarusi ŭ Bałonski praces, kaža ministr, — niedastatkovaja raźvitaść vykładańnia na anhlijskaj, kab u nas pa abmienie moh vučycca student ź luboj krainy. Choć jon pryvodzić i supraćlehły prykład: navučańnie pa adnoj sa śpiecyjalnaściaŭ u BDUIR ź pieršaha kursa viadziecca vyklučna na anhlijskaj.

— Ja jak ministr mahu skazać, što ja nie vielmi vitaju paŭsiudnaje navučańnie na anhlijskaj ź pieršaha kursa. U nas dźvie dziaržaŭnyja movy, a vyklučna na anhlijskaj ja vitaju, naprykład, mahistraturu. U toj ža Skandynavii da hetaha času ŭsia adukacyja na rodnych movach, choć tam vydatna viedajuć anhlijskuju. Ja budu staracca dakazać, što taki padychod — słušny.

Biełaruskamoŭny VNU «siońnia nie treba», «u nas ža nichto nie zabaraniaje vykładać na biełaruskaj movie»

Uvosień intelihiencyja prapanavała prezidentu stvaryć biełaruskamoŭny VNU. Hetuju inicyjatyvu Michaił Žuraŭkoŭ nie vitaje.

— Siońnia nie treba rabić vyklučna biełaruskamoŭny univiersitet. U nas ža nichto nie zabaraniaje vykładać na biełaruskaj movie, i navat, naprykład, na miechmacie BDU dastatkova takich vykładčykaŭ. Šmat i studentaŭ, jakija razmaŭlajuć vyklučna pa-biełarusku, i z-za hetaha naohuł nie ŭźnikaje nijakich prablem. Pamiž usimi chłopcami vydatnyja adnosiny.

Ministr ličyć, što z-za nasadžeńnia studenty nie stanuć lepš viedać biełaruskuju, bo heta pavinna iści ad dušy čałavieka. Michaił Anatoljevič pryvodzić prykład z Ukrainy:

— Mnie raspaviadali vykładčyki z Kijeva, što byŭ čas, kali tam chadzili i praviarali, kab usie zaniatki išli na ŭkrainskaj. Ale jany zrazumieli, što heta nie zusim pravilna, i ciapier, naprykład, va univiersitecie Šaŭčenki bolšaść pryrodaznaŭča-navukovych dyscyplin čytajecca pa-rusku. Da taho ž jany pačali ciapier iznoŭ pierakładać svaje navukovyja techničnyja vydańnia na ruskuju, bo tak ich pračytaje vialikaja aŭdytoryja.

«Sistema profilnaj adukacyi ŭ škole pačnie ŭkaraniacca ŭ 2015-m»

Novy ministr kaža, što aktyŭna zojmiecca ukaranieńniem profilnaj adukacyi ŭ škołach. Pa hetym pytańni jon pravioŭ naradu ŭ pieršyja dni pracy.

— Da 10 kłasa heta budzie ahulnaja dla ŭsich prahrama, a voś apošnija 2 hady buduć tolki profilnymi. Adna z prapanoŭ u tym, kab dzicia, jakoje trapić u taki kłas, nie tolki zdavała ekzamieny pa profilnych pradmietach, ale i mieła peŭny bał atestata. Takim čynam, adnyja zmohuć praciahvać u škole pahłyblena vyvučać niekatoryja pradmiety, a inšyja pojduć u kaledž ci licej atrymlivać prafiesiju.

Novaja sistema, pa słovach surazmoŭcy, budzie ŭkaraniona ŭžo sioleta, ale heta zusim nie aznačaje, što ŭsie ciapierašnija dzieviacikłaśniki abaviazany vyznačycca sa svaim profilem. Michaił Žuraŭkoŭ kaža, što jon suprać revalucyjnych źmienaŭ.

— Hetaja sistema budzie ŭkaranionaja dla školnikaŭ, jakija siońnia vučacca ŭ čaćviortym kłasie. Dzicia musić razumieć, što pavinna vučycca peŭnym čynam, kab praź piać hadoŭ trapić u profilny kłas.

Pierahledziać, pa słovach Michaiła Anatoljeviča, i kolkaść hadzin pa profilnych pradmietach u hetych kłasach.

— Ale heta na pieršy pohlad lohka prybrać niejkuju adnu hadzinu i dadać inšuju. Nasamreč, dla hetaha treba pierahledzieć staŭki i navat pierapisać školnyja padručniki, što patrabuje vialikich srodkaŭ. Tamu novaja sistema budzie ŭvodzicca pastupova i ź jak maha mienšymi maralnymi stratami dla školnikaŭ. Ale kanceptualnaje rašeńnie pa hetym pytańni ŭžo pryniataje.

Asabistaje žyćcio ministra

Adkazaŭ ministr Žuraŭkoŭ na pytańni i pra asabistyja žyćcio i pra svaje husty. Pakazaŭ svaju kvateru.

Pavialičyć

Pavialičyć

Pavialičyć

Ab svajoj ža prafiesii, pryznajecca Michaił Žuraŭkoŭ, jon nie škaduje ni kropli. Jak i nie škaduje pra toje, što nie skarystaŭsia realnaj mahčymaściu źjechać u pačatku 90-ch zajmacca navukaj u Kanadu, a zastaŭsia ŭ svaim lubimym horadzie.

— Minsk — naš rodny horad, i navat z dačy my viartajemsia siudy ź vialikim zadavalnieńniem. Tut nam vielmi kamfortna, u horadzie vielmi čysta i žyvuć vydatnyja ludzi. U Minsku chočacca hulać.

Intervju całkam

Apytanka

• 0
• 0
• 0
• 0
• 0
• 0
• 0
• 0