Aftalmołahi-lehiendy. U dzień 110-hodździa Taćciany Biryč pamierła jaje dačka i pradaŭžalnica dynastyi Tamara Biryč

10 studzienia spoŭniłasia 110 hadoŭ z dnia naradžeńnia viadomaha aftalmołaha Taćciany Biryč — pieršaj žančyny-prafiesara ŭ našaj krainie. Ranicaj hetaha ž dnia raptoŭna pamierła jaje dačka, pradaŭžalnik aftalmałahičnaj dynastyi, prafiesar, zasłužany doktar Respubliki Biełaruś Tamara Biryč. Na dvaich maci i dačka 60 hadoŭ uznačalvali kafiedru vočnych chvarob Minskaha mieduniviersiteta.

Tamara Biryč naradziłasia 5 krasavika 1939 hoda ŭ Minsku. Z dynastyi miedykaŭ: maci była viadomym aftalmołaham, babula — akušerkaj.

Paśla zakančeńnia ŭ 1962-m Minskaha miedinstytuta Tamara pa raźmierkavańni dva hady pracavała akulistam u rajonnaj paliklinicy Barysava. Z 1963 hoda — ardynatar vočnaha adździaleńnia 3-j kliničnaj balnicy Minska. U 1971 hodzie, skončyŭšy zavočnuju aśpiranturu pry NDI vočnych chvarob imia Hielmholca ŭ Maskvie, abaraniła kandydackuju dysiertacyju, u 1987-m — doktarskuju.

Z 1975 pracavała ŭ BDMU spačatku na pasadzie asistenta kafiedry vočnych chvarob, zatym dacenta. Z 1985 hoda pa śniežań 2005 hoda — zahadčycy kafiedry vočnych chvarob.

Doktarskaja dysiertacyja: «Išemičnyja pracesy dyska hladzielnaha niervu ŭ patahieniezie, dyjahnostycy i lačeńni pieršasnaj adkrytavuhłavaj hłaŭkomy». Z 1988 hoda — doktar miedycynskich navuk, prafiesar z 1989 hoda.

Asnoŭny napramak daśledavańniaŭ Tamary Biryč — zasvajeńnie i raspracoŭka technałohij u apieratyŭnaj chirurhii hłaŭkomy, zachvorvańniaŭ aptyčnaha aparata voka, siatčatki, rekanstrukcyi piaredniaha adździeła voka z pryčyny zachvorvańniaŭ i traŭmatyčnaha paškodžańnia orhana zroku.

Uznačalvała rekanstruktyŭnyja kirunki ŭ aftalmachirurhii voka, upieršyniu ŭ respublicy užyŭšy ŭ praktycy chirurhičnaha lačeńnia katarakty impłantacyju štučnaha kryštalika, lačebnuju i aptyčnuju kieratapłastyki, ukaraniła novyja sposaby lačeńnia adsłojek siatčatki i inšych zachvorvańniaŭ vačej. U praktyku achovy zdaroŭja ŭkaraniła adnamomantavuju rekanstruktyŭna-adnaŭlenčuju chirurhičnuju mietodyku lačeńnia ciažkich nastupstvaŭ traŭmaŭ i zachvorvańniaŭ piaredniaha adrezka voka.

Biryč zajmałasia vyvučeńniem ŭździejańnia małych doz radyjacyi ŭ asob, jakija paciarpieli ad čarnobylskaj katastrofy.

U vyniku masavych abśledavańniaŭ nasielnictva, jakoje pražyvaje na zabrudžanych radyjonuklidami terytoryjach, byŭ znojdzieny rost zachvorvańnia kataraktaj, sasudzistych zachvorvańniaŭ vačej, pavieličeńnie pryrodžanaj patałohii i anamalij refrakcyi ŭ dziaciej u paraŭnańni z dačarnobylskim pieryjadam.

Pad kiraŭnictvam Tamary Biryč abaroniena 4 doktarskija dysiertacyi, 12 kandydackich dysiertacyj. Jana aŭtar 250 navukovych prac, u tym liku troch manahrafij, dvuch daviednikaŭ dla daktaroŭ, dvuch padručnikaŭ pa vočnym chvarobam dla siaredniaha miedpiersanała. U 2007 hodzie z udziełam T. Biryč byŭ apublikavany padručnik pa vočnych chvarobach dla studentaŭ VNU. Joj naležać try aŭtarskija paśviedčańni na vynachodnictvy SSSR, a taksama vosiem patentaŭ na vynachodnictvy ŭ Biełarusi.

Tamara Biryč była vybrana členam Mižnarodnaj arhanizacyi za praduchileńnie ślepaty ŭ śviecie, členam Jeŭrapiejskaha tavarystva aftalmołahaŭ, u 1997 hodzie była naminavanaja Amierykanskim bijahrafičnym instytutam ZŠA i Anhlii jak «Žančyna hoda».

Pachavańnie Tamary Andrejeŭny projdzie ŭ paniadziełak, 12 studzienia. Raźvitacca ź joj možna budzie ŭ rytualnaj zale Respublikanskaha kliničnaha miedycynskaha centra Kiraŭnictva spravami prezidenta pa adrasie Čyrvonaarmiejskaja, 12, a 12 hadzinie.

Pavialičyć

• 0
• 0
• 0
• 0
• 0
• 0
• 0
• 0