Suchotniki: Kali praz 5 dzion nas nie pasłuchajuć, my adnovim haładoŭku

«Praz 5 dzion, kali našyja patrabavańni nie vykanajuć, my adnovim akcyju pratestu ŭ vyhladzie haładoŭki, ci ŭ inšaj formie» — paviedamiła z balnicy pacyjentka Natalla Rahalevič, jakaja pradstaviłasia adnym z arhanizataraŭ haładoŭki. Jana padkreśliła, što akcyja pratestu nia spynienaja: «My dali hałoŭuraču čas». Pa słovach N. Rahalevič, siońnia ŭ balnicu naviedalisia čynoŭniki. Chto jany i adkul, chvorym, pa ich słovach, nie skazali. «Pryjechała delehacyja na «Volva», ich sustreŭ Doŭhal, hałoŭurač, i pavioŭ pakazvać pałaty», — raspaviadaje spn. Rahalevič. Čynoŭnikaŭ adviali ŭ pałaty, dzie znachodziacca lažačyja chvoryja. Umovy tam lepšyja, jak u inšych, havoryć arhanizatarka haładoŭki, a tamtejšyja pacyjenty ŭžo i havaryć nia mohuć, u ich navat podpisy nia brali. Jaje muž, jaki taksama lečycca ŭ «Navajelni», zaprasiŭ haściej u svaju pałatu, ale jaho zaprašeńnie praihnaravali. Pakul čynoŭniki chadzili pa pakojach, chvorym paviedamili, što duš adčynieny, ale pa śviedčańniach ludziej, vada była ledźvie ciopłaja: «Nam u takoj vadzie nielha mycca». Ale i tuju vadu adklučyli, jak tolki aŭto ź vizytantami źjechała, a duš iznoŭ začynili.

Natalla Rahalevič kaža, što za apošnija dva dni chvoryja sutyknulisia z chvalaj brudu na ich adras: «Nas i alkašami, i zekami nazyvali, ale ž tut nia tolki takija lečacca. Uvohule, haładoŭku arhanizavali žančyny, jakich i haładała pałova ad usioj kolkaści». Jana raspaviała, jakim čynam sp. Doŭhal prapanavaŭ vyrašyć prablemu atrymańnia hrošaj uładalnikami plastykavych bankaŭskich kartak: «Paabiacaŭ pasadzić u «chutkuju» 20-25 čałaviek i advieźci ŭ bank. Ale ž heta parušeńnie našych pravoŭ – my volnyja ludzi, a na nas u tym banku buduć palcam pakazvać, maŭlaŭ, hladzi – «tubikaŭ» pad kanvojem pryvieźli!» Chvoryja kažuć, što atrymali adkaz na zapyt u Ministerstva achovy zdaroŭja nakont statusu balnicy i daviedalisia, što heta nie zakrytaja lakarnia.

Niadaŭna chvorych aznajomili z zahadam ministerstva ŭstalavać u balnicy systemu videanazirańnia. «Na leki hrošaj niama, kažuć, a na videanazirańnie jość!» – aburajucca pacyjenty RTB.

Arhanizatarka akcyi pratestu kaža, što ich padtrymlivaje bolšaść pacyjentaŭ balnicy – i staryja, i maładyja. «Ciapier užo i małodšy medyčny persanał pačaŭ vykazvać salidarnaść z nami».

Nahadajem, što ŭčora ŭ Respublikanskaj tuberkuloznaj balnicy kala 100 čałaviek chvorych na suchoty nia vyjšli na śniadanak. Jany patrabavali palapšeńnia ŭmovaŭ lačeńnia. Hałoŭny ŭrač Viačasłaŭ Doŭhal nazvaŭ ich patrabavańni nieabhruntavanymi. V. Doŭhal ličyć, što pryčynaj haładoŭki stała zabarona volnaha vychadu chvorych za terytoryju balnicy. Pa jaho słovach, na terytoryi RTB jość usio nieabchodnaje, chvoryja śćviardžajuć advarotnaje — kažuć pra adsutnaść samych nieabchodnych srodkaŭ hihijeny, lekaŭ, jakasnaha charču, narakajuć na kiepskija ŭmovy ŭtrymańnia. Ranicaj 15 studzienia haładoŭka pa abjektyŭnych pryčynach była prypynienaja.

• 0
• 0
• 0
• 0
• 0
• 0
• 0
• 0