Sakretny dakumient: Pucin płanavaŭ pačać rasčlanieńnie Ukrainy z Kryma i Charkava
Redakcyja rasijskaj «Novaj haziety» apublikavała źmiest dakumienta sa scenaram Kramla pa padziejach va Ukrainie.
Dakumient utrymlivaje paetapny płan rasčlanieńnia Ukrainy. Jaho tekst raźmieščany na sajcie «Novaj haziety».
Jak adznačaje «Novaja», u cełym vysokaja stupień supadzieńnia hetaha prajekta ź dziejańniami rasiejskaj ułady kidajecca ŭ vočy, choć realny chod ukrainskaj dramy ŭnios niekatoryja karektyvy.
U pryvatnaści, płanujučy vajnu va Ukrainie, akružeńnie Pucina raźličvała pačać rasčlanieńnie Ukrainy z Kryma i Charkaŭskaj vobłaści, a nie z Danieckaj, majučy na ŭvazie «ciesnyja dziełavyja i palityčnyja suviazi miascovaj biznes-elity, jakuju uznačalvaje R. Achmietaŭ, z šeraham pradstaŭnikoŭ apazicyjnaha aliharchičnaha aljansu».
U jaho padrychtoŭcy, jak miarkujecca, moh prymać udzieł «pravasłaŭny biznesmen» Kanstancin Małafiejeŭ, dakumient byŭ pradstaŭleny Pucinu ŭ pieryjad pamiž 4 i 12 lutaha 2014 hoda — da uciokaŭ Janukoviča.
«Pa-pieršaje, režym V. Janukoviča kančatkova zbankrutavaŭ. Jaho palityčnaja, dypłamatyčnaja, finansavaja, infarmacyjnaja padtrymka Rasijskaj Fiederacyjaj ŭžo nie maje nijakaha sensu», — napisana ŭ dakumiencie.
Aŭtary padkreślivajuć, što «Rasija ni ŭ jakim razie nie pavinna abmiažoŭvać svaju palityku va Ukrainie tolki tolki sprobami ŭpłyvać na kijeŭski palityčny raskład».
«Kanstytucyja Ukrainy ŭ lubym vypadku niazdolnaja stać miechanizmam, z dapamohaj jakoha možna było b lehitymnym čynam zapuścić intehracyju ŭkrainskich uschodnich terytoryj i Kryma ŭ dziaržaŭna-pravavoje pole Rasijskaj Fiederacyi», — havorycca ŭ dakumiencie. Taksama tam paznačana, što «Rasija pavinna damahčysia zaklučeńnia dahavoraŭ ab pryhraničnym i transhraničnym supracoŭnictvie, a zatym ustalavać niepasrednyja dziaržaŭna-dahavornyja adnosiny z tymi ukrainskimi terytoryjami,»dzie majucca ŭ najaŭnaści ŭstojlivyja prarasijskija elektaralnyja simpatyi».
Siarod takich abłaściej, zhodna z dakumientam, niama Danieckaj vobłaści.
«U pieršuju čarhu — z Respublikaj Krym, Charkaŭskaj, Łuhanskaj, Zaparožskaj, Mikałajeŭskaj, Dnieprapiatroŭskaj i ŭ mienšaj stupieni — Chiersonskaj i Adeskaj abłaściami. (Z hetaha pieraliku naŭmysna — i dosyć umoŭna — vyviedzienyja Sumskaja vobłaść i Danieckaja vobłaść. Pieršaja — z pryčyny vielmi vysokaha elektaralnaha ŭpłyvu ŭ joj partyi «Baťkivŝina». Druhaja — z pryčyny ciesnych dziełavych i palityčnych suviaziaŭ miascovaj biznes-elity, jakuju uznačalvaje R. Achmietaŭ, z šeraham pradstaŭnikoŭ apazicyjnaha aliharchičnaha aljansu, jakija majuć tut svaje maštabnyja intaresy.).
Dalej publikujem uryvak dakumienta:
«Metazhodna paśladoŭnaje vyłučeńnie troch łozunhaŭ, jakija pa miery raźvićcia vynikajuć adzin z druhoha:
— Patrabavańnie «fiederalizacyi» (ci navat kanfiederalizacyi) ŭ jakaści harantyi dla hetych rehijonaŭ ad ŭmiašańnia prazachodnich i nacyjanalistyčnych sił u ich unutranyja spravy;
— Niezaležnaje ad Kijeva ŭstupleńnie ŭschodnich i paŭdniova-ŭschodnich abłaściej na rehijanalnym uzroŭni ŭ Mytny Sajuz, što zabiaśpiečyć nieabchodnyja ŭmovy dla narmalnaj pracy i raźvićcia pramysłovaści;
— Pramaja suvierenizacyja z nastupnym dałučeńniem da Rasii, jak adzinaha haranta ŭstojlivaha ekanamičnaha raźvićcia i sacyjalnaj stabilnaści.
Nieabchodna padrychtavać umovy dla praviadzieńnia ŭ Krymie i Charkaŭskaj vobłaści (a dalej i ŭ inšych rehijonach) refierendumaŭ, jakija staviać pytańnie ab samavyznačeńni i dalejšaj mahčymaści dałučeńnia da Rasijskaj Fiederacyi».
Nahadajem, Kanstancin Małafiejeŭ trapiŭ u sankcyjny śpis ES. Va Ukrainie suprać Małafiejeva raspačata kryminalnaja sprava, jaho padazrajuć u finansavańni bajevikoŭ.
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary