Vital Šuraŭka: «My raźvialisia jašče hod tamu i daŭno z usim razabralisia»

Na vychadnych biełaruskaje sieciva skałychnuła navina pra razvod viadomaj biełaruskaj biznes-pary Vitala i Ksienii Šuraŭkaŭ, jakim naležyć partał Onliner.by. Pry hetym paviedamlałasia, što «kantrolny pakiet akcyj» zastaŭsia ŭ Ksienii Šuraŭki.

Karespandent «Našaj Nivy» źviazaŭsia ź Vitalom Šuraŭkam, kab daviedacca ab abstavinach spravy:

«Ja nie razumieju, adkul uziałasia heta navina, bo my raźvialisia jašče hod tamu i pra heta ŭsio zabyli. Ja i Ksienija va ŭsim razabralisia, pa fakcie ŭ nas ničoha nie źmianiłasia. Pamiž nami dobryja adnosiny i niama nijakich prablem. Treba razumieć i toje, što «Anłajnier» nie akcyjaniernaje tavarystva i nie publičnaja kampanija, u nas niama akcyj. My jak razam pracavali, tak i pracujem. Ja adkazvaju za svaje kirunki, Ksienija adkazvaje za svaje».

Ksienija Šuraŭka taksama patłumačyła, što žurnalisty vykarystali niapravilnyja farmuloŭki: u «Anłajniery» jana vałodaje nie kantrolnym pakietam akcyj, a joj sfarmavana 51% statutnaha kapitału. Pry hetym Ksienija adnačasova zajmaje pasadu dyrektara kampanii.

Miž tym Vital Šuraŭka paviedamiŭ, što sajt Onliner užo ačuŭsia ad niadaŭniaha vymušanaha spynieńnia pracy praz vyklučeńnie sajta z damiennaj zony.by:

«Ustupili ŭ dziejańnie novyja patrabavańni Minhandlu, nam daviałosia pierarehistravać usie kramy, hety praces zaniaŭ niejki čas, ale bolšaja častka kramaŭ užo viarnułasia na handlovuju placoŭku, i ciapier my bačym, što jany viartajucca dastatkova chutka.

Naviedvalnaść taksama adnaviłasia: ciapier u nas kala miljona prahledžanych staronak u dzień, jak heta i było raniej. Pa redakcyjnych raździełach naviedvalnaść vyrasła, pa katałohu ŭpała — heta źviazana z tym, što ŭ ludziej źniziŭsia popyt na tavary praz ekanamičnuju niestabilnaść, — kaža sp.Šuraŭka.

Što tyčycca pryjarytetaŭ raźvićcia, u nas zapuściŭsia novy prajekt «Arenda žytła». Jon pakazvaje dobryja vyniki, my bačym u hetym pierśpiektyvu i aktyŭna heta raźvivajem. Navat kali paraŭnać naš raździeł z sajtami, jakija śpiecyjalizujucca na doŭhaterminovaj arendzie žylla, možna ŭbačyć, što kolkaść abjaŭ u nas u razy bolšaja», — kaža sp.Šuraŭka.

Partał Onliner.by byŭ stvorany ŭ 2001 hodzie Vitalom i Ksienijaj Šuraŭkami. Siońnia Onliner.by — naroŭni z Tut.bajem samy papularny sajt Biełarusi. U kancy śniežnia 2014 hoda sajt — nibyta praz šmatlikija parušeńni zakanadaŭstva — vyklučyli z damiennaj zony.by, tym samym pazbaviŭšy kampaniju mahčymaści lehalna pracavać u Biełarusi. Praź miesiac sajt adnaviŭ pracu, adnak z partała syšoŭ hałoŭny redaktar Dzianis Blišč, a miesca dyrektara Alaksandra Stelmacha zaniała sama Ksienija Šuraŭka.

• 0
• 0
• 0
• 0
• 0
• 0
• 0
• 0