Staršynia Biełaruskaha PEN-centra Andrej Chadanovič paprasiŭ prabačeńnia za sprečnyja vykazvańni, dapuščanyja ŭ adnym z materyjałaŭ arhanizacyi pra dyskryminacyju ruskamoŭnych litarataraŭ u Biełarusi. Adpaviedny dopis Chadanovič pakinuŭ na svajoj staroncy ŭ sacyjalnaj sietcy Facebook.
«Pa-mojmu, čas spyniać ahresiŭnyja sprečki i prasić prabačeńnia va ŭsich, kaho paśpieŭ u zapale palemiki pakryŭdzić, — adznačyŭ staršynia PEN-centra. — Šanoŭnyja piśmieńniki, pieraprašaju za niedarečna ŭžytaje ŭ penaŭskim pres-relizie słova «dyskryminacyja». Zrazumieła, nijakaha pytańnia moŭnaj dyskryminacyi na schodzie Biełaruskaha PEN-centra nie abmiarkoŭvałasia i nijakaj zajavy my z hetaj nahody nie prymali. Čym by ni kiravaŭsia moj šanoŭny kaleha, što hety reliz napisaŭ i vykazaŭ u im svajo ŭłasnaje mierkavańnie, takoha słova ŭžyvać było nie varta. Prabačcie, tak by mović, za moj niedahlad».
«Vybačajusia pierad usimi kalehami-litaratarami. Biełaruskamoŭnymi, jakich pakryŭdziła, byccam jany kahości «dyskryminujuć». Ruskamoŭnymi, kali ich abraziła, što niechta ŭziaŭsia «abaraniać» ich ad niejkaj «dyskryminacyi», tady jak jany ničoha takoha nie adčuvajuć. Zasnoŭvajučy premiju «Kniha hoda», my kiravalisia idejaj abjadnańnia biełaruskich piśmieńnikaŭ, niezaležna ad ich movy tvorčaści, idejaj uklučeńnia ich u adziny litaraturny praces. Vielmi škaduju, što prykraja pamyłka adciahnuła hramadskuju ŭvahu ad sutnaści cikavaha i pierśpiektyŭnaha prajekta, pieraklučyŭšy ŭsiu ŭvahu na ŭzajemnyja kryŭdy», — dadaŭ jon.
Sprečka ŭźnikła paśla źjaŭleńnia na sajcie PEN-centra materyjału pra ahulny schod arhanizacyi, jaki adbyŭsia 28 lutaha ŭ Minsku. Aŭtar napisaŭ, što peŭnyja pytańni delehataŭ vyklikaŭ punkt pałažeńnia novaha prajekta «Kniha hoda» pra roŭnaść moŭ, jakimi karystajucca biełaruskija piśmieńniki. Jon dadaŭ, što «nichto nie źbirajecca zabyvać pra niaprostaje stanovišča biełaruskaj movy ŭ hramadstvie, ale i ŭcisk ruskamoŭnych paetaŭ i prazaikaŭ byŭ by zusim niekarektnym krokam». «Tym bolš ruskamoŭnyja aŭtary ŭ Biełarusi naahuł nie majuć ułasnych litaraturnych uznaharodaŭ. Pastulujučy raŭnapraŭje movaŭ, pierš za ŭsio litaraturnych movaŭ, Biełaruski PEN-centr źviartaje ŭvahu na peŭnuju dyskryminacyju, jakuju varta pieraadolvać», — zaŭvažyŭ aŭtar tekstu.
Reakcyja z boku asobnych litarataraŭ nie prymusiła siabie čakać — na staronkach błohaŭ i ŭ sacyjalnych sietkach jany razharnuli pałkija dyskusii pra toje, ci jość u Biełarusi «dyskryminacyja ruskamoŭnych aŭtaraŭ».
U vyniku, nie zhadziŭšysia z takoj pastanoŭkaj pytańnia z boku PEN-centra, arhanizacyju pakinuŭ žurnalist i litaratar Siarhiej Dubaviec.
Kamientary