Piensija ŭ palaka bolšaja, čym zarobak u biełarusa

Rost piensij ad pačatku hoda byŭ faktyčna zamarožany. «Piensii buduć pavyšacca z ulikam rostu zarobkaŭ i finansavych mahčymaściej Fonda sacyjalnaj abarony nasielnictva», – patłumačyŭ namieśnik ministra pracy Valeryj Kavalkoŭ. A zarobki jakraz-taki nie rastuć.

U lutym siaredniaja piensija pa ŭzroście skłała 2 748 450 rubloŭ. Ci mnoha heta? Pražyć na takija hrošy pry biełaruskim uzroŭni cen składana, paćvierdziać piensijaniery.

A što ž u susiedziaŭ? «Naša Niva» paraŭnoŭvaje biełaruskuju dapamohu stałym ludziam z toj, što prapanujuć inšyja dziaržavy.

U dalaravym ekvivalencie biełaruskaja piensija składała $182 pa tahačasnym kursie. I ŭpieršyniu za doŭhi čas jana akazałasia vyšej za rasijskuju.

Uschodnija susiedzi mieli ŭ studzieni ŭ siarednim usiaho pa $168. Usiamu pryčynaj ekanamičny kryzis, vyklikany vajnoj va Ukrainie, padzieńniem cany nafty, a taksama sankcyjami Zachadu. Praŭda, ciapier za košt uzmacnieńnia rasijskaha rubla dalaravy ekvivalent piensij troški padros i amal zraŭniaŭsia ź biełaruskim.

Vajna nie mahła nie padkasić i ŭkrainskich piensijanieraŭ. Apošnija źviestki ab pamiery dapamohi pa ŭzroście ŭ hetaj krainie datujucca kastryčnikam 2014 hoda. Tady piensijaniery atrymlivali ŭ siarednim pa $129. Adnak pry ciapierašnim kursie piensii abrynulisia da $75.

Situacyja ŭ Małdovie jašče horšaja. Statystyka za pačatak 2015 hoda — siarednija $69 kožnamu piensijanieru.

Krainy Bałtyi pierajšli na jeŭra, tamu ŭ vyniku płaŭnaj devalvacyi ŭ adnosinach da dalara hrošy častkova abiascenilisia. Faktyčna kožny piensijanier zhubiŭ pa $40-60. Naprykład, u Litvie ŭ śniežni minułaha hoda stałyja hramadzianie atrymlivali pa $296, a ciapier ich piensii ekvivalentnyja $255.

U łatvijcaŭ u čaćviortym kvartale 2014 hoda piensija składała $338. Ciapier na $50 mienš.

Narešcie, Estonija, jakaja zastajecca samaj paśpiachovaj u rehijonie. Stałyja žychary ŭ kancy minułaha hoda atrymlivali pa $437, ale kryzis jeŭra, zrazumieła, ŭdaryŭ i pa ich.

Adnak za miežami byłoha SSSR pačynajecca zusim inšaje žyćcio. Siaredni palak-piensijanier u listapadzie minułaha hoda mieŭ $606. I navat pry ciapierašnim kursie atrymlivaje kala $520, bolš, čym siaredni zarobak u Biełarusi.

Padobnaja piensija i ŭ Čechii. U pieršaj pałovie minułaha hoda tamtejšym starym dziaržava płaciła pa $550.

Ale ŭ bolšaści krain Jeŭrasajuza heta tolki častka dachodaŭ. Miascovyja žychary karystajucca pasłuhami pryvatnych piensijnych fondaŭ, i ŭ realnaści atrymlivajuć našmat bolš.

Samyja bahatyja…

Maksimalna mahčymaja piensija ŭ Biełarusi składaje 6 434 tysiač rubloŭ. Stolki atrymlivajuć štomiesiac byłyja šachciory, jakija majuć staž pracy pad ziamloj nie mienš za 25 hadoŭ.

…i samy biedny

Byłomu staršyniu Viarchoŭnaha Savieta Stanisłavu Šuškieviču dziaržava płacić pa 3200 rubloŭ. Jahonaja pažyćciovaja piensija była pryznačanaja jašče ŭ 1996-m, ale z taho času nie indeksujecca.

• 0
• 0
• 0
• 0
• 0
• 0
• 0
• 0