Partyja BNF: Najlepšym kandydatam na vybarach-2015 byŭ by Milinkievič
Surjozna pazmahacca za pieramohu na prezidenckich vybarach 2015 hoda demakratyčnamu kandydatu nierealna, zajaviŭ staršynia Partyi BNF Alaksiej Janukievič 25 krasavika na sojmie arhanizacyi.
Jon adznačyŭ: partyja pieršapačatkova imknułasia da taho, što apazicyja zdoleje damovicca ab vyłučeńni adzinaha kandydata. Adnak hetaha nie ŭdałosia dasiahnuć u miežach usich demakratyčnych sił. Taksama vielmi vierahodnym moh być zryŭ pieramoŭ u ramkach kaalicyi «Narodny refierendum», zajaviŭ jon.
Janukievič ličyć bolš prymalnaj dla partyi ŭ miežach «Narodnaha refierendumu» kandydaturu staršyni ruchu «Za Svabodu» Alaksandra Milinkieviča.
Adnak apošni vyrašyŭ admovicca ad udziełu ŭ vybarčaj kampanii. Lidar Partyi BNF adznačyŭ, što ŭ ramkach kaalicyi prapanavali dźvie kandydatury — namieśnika staršyni partyi Ryhora Kastusiova i aktyvistki kampanii «Havary praŭdu» Taćciany Karatkievič.
«My doŭha abmiarkoŭvali jak plusy, tak i minusy hetych pretendentaŭ, i hetyja pieramovy taksama ryzykavali skončycca ničym. Tamu my vyrašyli zhadzicca padtrymać Karatkievič pry vyłučeńni kandydatam, kab prademanstravać zdolnaść damaŭlacca. U siońniašniaj situacyi demanstracyja adekvatnaści i praviadzieńnia sumiesnaj kampanii chacia b častkaj apazicyi bolš vyhadnaja», — skazaŭ jon.
Janukievič ličyć, što zaraz u Alaksandra Łukašenki vielmi vialikija šansy ŭtrymać uładu.
«U biełaruskaha režymu dastatkova ryčahoŭ, kab prosta trymać ludziej u pasiŭnym stanie dla pieramohi na vybarach. Dla hetaha im navat nie treba nakručvać rejtynh Łukašenki», — skazaŭ jon.
Palityk ličyć, što pieramoha alternatyŭnaha kandydata zapatrabavała b u tym liku zaklikaŭ da pratestnych dziejańniaŭ na vulicach. Jon adznačyŭ, što ŭzrovień pratestnych nastrojaŭ u biełaruskim hramadstvie nie vielmi vysoki, u tym liku i ŭ suviazi z padziejami va Ukrainie. Pry hetym Janukievič miarkuje, što siońnia destabilizacyja ŭ krainie była b «na ruku Maskvie». «Mienavita Kreml moh by skarystać destabilizacyju situacyi z bolšaj dolaj vierahodnaści, čym apazicyjnyja siły», — padkreśliŭ Janukievič.
Asnoŭnaj metaj dziejnaści Partyi BNF na prezidenckich vybarach Janukievič ličyć pavieličeńnie prychilnikaŭ niezaležnaści Biełarusi.
«U svajoj pracy nam nieabchodna akcentavacca na ŭzmacnieńni nacyjanalna-demakratyčnaha ruchu, uzmacnić antyimpierskija nastroi ŭ krainie. Takaja praca rana ci pozna pavinna vylicca ŭ pavieličeńnie pierśpiektyŭ niezaležnaj i jeŭrapiejskaj Biełarusi», — skazaŭ jon.
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ29
Kamientary