Aleh Trusaŭ: Jašče nie pozna abjadnacca

Adkryty list (zvarot) da ŭsich žadajučych pryniać udzieł u vybarčaj kampanii ŭ jakaści kandydataŭ u Prezidenty

9 červienia 2015 hoda

U apošni čas idzie palemika nakont situacyi, źviazanaj z budučymi vybarami Prezidenta. Uličvajučy situacyju, što skłałasia ŭ krainie i za jaje miežami, hetaja vybarčaja kampanija moža prajści zusim nie tak, jak płanuje ŭłada i apazicyja. I pieršaja łastaŭka vylecieła jakraz siońnia, bo ŭłada ahučyła novy termin praviadzieńnia vybaraŭ, što najpierš źviazana, mahčyma, z ekanamičnym stanam u krainie.

I siońnia zvyčajny čałaviek staić pierad nastupnym vybaram: udzielničać u hałasavańni ci nie? Užo zaraz zrazumieła, što bolšaść vybarščykaŭ pa roznych pryčynach prymie ŭdzieł u hałasavańni. Tamu sałodkija kazki pra «bajkot» možna zabyć. I zaraz pierad ludźmi paŭstała dylema: kali i chto źmienić siońniašniaha niaźmiennaha kiraŭnika? Bo vopyt SSSR i inšych krain pakazvaje, što čym bolš hadoŭ niaźmiennamu kiraŭniku, tym bolšy kryzis čakaje narod. Dastatkova pryhadać Leanida Brežnieva i jaho pierajemnikaŭ. Navat u siaredniavieččy, u časy absalutnych manarchij prablema zachavańnia dynastyi cikaviła litaralna ŭsich. Susiedniaja Rasija paśla zhasańnia dynastyi Rurykavičaŭ ledź nie źnikła z mapy śvietu na miažy 16-17 stst. Heta moža čakać i Biełaruś…

Tamu mienavita zaraz usim budučym kandydytam u Prezidenty treba kančatkova zrazumieć, jakuju adkaznaść jany ŭskładajuć na svaje plečy. I ja prapanuju, kab usie žadajučyja ŭdzielničać u vybarčaj kampanii sustrelisia vuzkim kołam biez presy i vypracavali ahulnuju taktyku pavodzinaŭ na vybarach. Spačatku nieabchodna stvaryć ahulnyja tezisy budučaj prahramy, pad jakoj usie jany pavinny buduć padpisacca. Hetyja tezisy mohuć składacca z troch častak: ekanamičnaj, metaj jakoj budzie vychad krainy z toj situacyi, što skłałasia za apošnija 20 hadoŭ; čarhovaje adradžeńnie našaj kultury, historyi i movy, bo tolki patryjot svajoj krainy nie biare chabaru i hatovy achviaravać svaim žyćciom, dziela taho, kab Radzima isnavała. (Situacyja va Ŭkrainie dobra heta pakazała). I treciaja častka — heta analiz budučaj źniešniaj palityki Biełarusi paśla vybaraŭ, nakiravanaj na adnolkava roŭnyja stasunki z usimi susiedziami biez vyklučeńnia. Važna padkreślić i pravavy aśpiekt, jaki zaklučajecca ŭ viartańni dziejańnia Kanstytucyi 1994 h. i admieny tak zvanych refierendumaŭ, jakija nasili, darečy, kansultatyŭny charaktar.

Paśla taho, jak buduć padpisanyja tezisy budučaj prahramy, možna pakrokava realizavać prajmieryz, što nieadnarazova prapanoŭvaŭ sp. A.Labiedźka. Pieršy krok — stvareńnie kamandy kožnym kandydatam u kolkaści 2 tysiačy čałaviek dla zboru podpisaŭ hramadzian za vyłučeńnie kandydata ŭ Prezidenty. Bo tolki 2 tysiačy čałaviek, a lepš 2,5 tysiačy mohuć sabrać realnuju kolkaść podpisaŭ u našych nadzvyčajnych umovach.

Krok druhi. Paśla zboru podpisaŭ i ich rehistracyi na palityčnaj scenie zastajecca toj kandydat, jaki sabraŭ najbolšuju kolkaść podpisaŭ. Astatnija ŭdzielniki ŭvachodziać u jaho kamandu jak davieranyja asoby.

I niavažna, kolki pracentaŭ «namaluje» jamu siońniašniaja CVK. Važna toje, što ludzi ŭbačać pierśpiektyvu svajoj krainy, navat kali jany i nie pojduć na ŭčastki dla hałasavańnia. Hety čałaviek moža stać sapraŭdnym lidaram nacyi, jaki raniej ci paźniej demakratyčnym šlacham atrymaje ŭładu ŭ Respublicy Biełaruś.

• 0
• 0
• 0
• 0
• 0
• 0
• 0
• 0