«Źviažyciesia z nami»: Prakopjeŭ napisaŭ kałonku dla «NN», u jakoj abhruntoŭvaje znachodžańnie Cichanoŭskaha ŭ Štatach i prosić hrošaj

Jaki praktyčny sens majuć słuchańni pa pravach čałavieka ŭ Kanhresie ZŠA? Pramoha efiektu ad takich słuchańniaŭ moža i nie być. Adnak ich značeńnie nie varta niedaaceńvać.

Vyzvaleńnie biełaruskich palitviaźniaŭ — praces krochki i ŭ značnaj stupieni zaležyć ad palityčnaj kanjunktury.

Amierykanskaja administracyja moža ŭ luby momant stracić cikavaść da Łukašenki. Śpiecyjalny pasłańnik Džon Koŭł moža spynić aktyŭnuju ŭciahnutaść. Sam Łukašenka taksama zdolny dapuścić pamyłku i sarvać pieramoŭnuju liniju, kali vyrašyć pavysić staŭki abo zrobić lišni krok.

U takich umovach biełaruskamu pytańniu patrebny pastajanny pradstaŭnik u ZŠA — umoŭny «dziažurny advakat», jaki budzie ŭtrymlivać temu zakładnikaŭ i palitviaźniaŭ u amierykanskim paradku dnia, nie dazvalajučy joj rastvarycca siarod inšych źniešniepalityčnych kryzisaŭ.

Na hetuju rolu, na maju dumku, najlepš pasuje Siarhiej Cichanoŭski.

Jon užo viadomy amierykanskim palitykam. Kanhresmien Krystafier Śmit, jaki staršyniavaŭ na słuchańniach, pačaŭ pasiadžeńnie z taho, što adznačyŭ: jon sočyć za Siarhiejem Cichanoŭskim i čytaŭ jaho publikacyju ŭ The Washington Post.

U palityčnym kantekście heta nie prosta žest vietlivaści, a demanstracyja ŭvahi i hatoŭnaści ŭsprymać Cichanoŭskaha jak značnaha ŭdzielnika razmovy.

Cichanoŭski nie paźbiahaje vostrych tem i ŭmieje farmulavać dumki prosta. A mienavita takija jakaści zapatrabavanyja ŭ situacyi, kali losy ludziej zaležać nie tolki ad dypłamatyčnych pieramoŭ, ale i ad palityčnaha cisku, publičnaści i ŭvahi.

Nižej — frahmienty vystupleńnia Siarhieja Cichanoŭskaha ŭ Kanhresie ZŠA:

«Isnuje tolki try realistyčnyja sposaby vyzvalić astatnich zakładnikaŭ:

— zamiežnaja vajskovaja interviencyja;

— zachop pradstaŭnikoŭ režymu za miažoj dla prymusovaha abmienu;

— abo prymusovaja dypłamatyja pad kiraŭnictvam prezidenta Donalda Trampa.

Jak realist, ja rašuča padtrymlivaju apošni varyjant».

Pavialičyć

«Łukašenka maje patrebu ŭ prezidencie Trampu značna bolš, čym prezident Tramp maje patrebu ŭ Łukašenku. Hetaja asimietryja daje Złučanym Štatam kałasalnyja ryčahi cisku i śpiecyjalnamu pasłańniku spadaru Koŭłu».

«Łukašenka ličyć, što jamu jość što pradać — i heta nie tolki zakładniki.

Pavodle našaj infarmacyi, jon aktyŭna sprabuje pryciahnuć amierykanski biznes: prapanuje nabyć dolu ŭ nacyjanalnych avijalinijach, zaprašaje da ŭdziełu ŭ zdabyčy kaliju, abiacaje elektraenierhiju dla data-centraŭ ad biełaruskaj atamnaj elektrastancyi. Jon pierakanany, što ciapierašniaja administracyja ZŠA myślić tranzakcyjna, i robić na heta staŭku.

Łukašenka pazicyjanuje siabie nie tolki jak pasrednika z Kramlom, ale i jak niefarmalny kanał suviazi ź inšymi aŭtarytarnymi režymami.

Usio heta daje Złučanym Štatam surjoznyja ryčahi ŭpłyvu — kali vykarystoŭvać ich stratehična i paśladoŭna».

Cichanoŭski taksama paviedamiŭ kanhresmienam, što maje dadatkovyja rekamiendacyi, adnak ich lepš abmiarkoŭvać kanfidencyjalna, a nie ŭ miežach publičnych słuchańniaŭ.

Možna mierkavać, što havorka idzie pra mahčymyja ŭraźlivaści Łukašenki i jaho atačeńnia. Patencyjnyja vahary cisku sapraŭdy isnujuć, adnak dla ich vykarystańnia nieabchodnaja palityčnaja vola z boku ZŠA.

Hetuju palityčnuju volu možna i treba padtrymlivać. Pryčym rabić heta davodzicca ŭ niaprostych umovach: Biełaruś nie ŭvachodzić u lik pryjarytetnych napramkaŭ amierykanskaj źniešniaj palityki. Abo, jak moh by skazać Donald Tramp: «Biełaruś — nie samaja haračaja kraina ŭ śviecie».

Niahledziačy na zajavy Dziarždepa pra padtrymku demakratyčnych imknieńniaŭ biełarusaŭ, realnaść takaja: pakul amierykanskuju administracyju ŭ Biełarusi ŭ pieršuju čarhu cikaviać suviazi i mahčymaści samoha Łukašenki.

U dačynieńni da krainy ŭ mnohich amierykanskich palitykaŭ isnuje ŭstojlivaja ŭstanoŭka: biełaruskaja prablema nibyta nie maje samastojnaha rašeńnia i źjaŭlajecca častkaj bolš šyrokaha kanfliktu z Rasijaj.

Hety naratyŭ abjektyŭna pieraškadžaje pierśpiektyvie svabodnaj Biełarusi i patrabuje paśladoŭnaha abviaržeńnia.

Jakim čynam heta mahčyma? Praź niefarmalnuju asabistuju dypłamatyju, vystupleńni ŭ Kanhresie, pracu z ekśpiertnaj supolnaściu, pastajannuju prysutnaść u miedyja i realistyčnuju palityčnuju stratehiju.

Taki łabizm patrabuje surjoznych resursaŭ.

Pry hetym važna, kab biełaruski pradstaŭnik u ZŠA nie zaležaŭ ad hrantavaha finansavańnia, pakolki heta niepaźbiežna stvaraje kanflikt intaresaŭ i abmiažoŭvaje samastojnaść. Akramia taho, u administracyi Trampa vyrazna prajaŭlajecca alerhija na «industryjalna-pramysłovy kompleks NDA» i źviazanych ź im palitykaŭ.

U našym vypadku stanoŭčuju rolu adyhryvajuć viadomaść i bijahrafija Siarhieja Cichanoŭskaha. I toj fakt, što padtrymku jamu akazvaje biełaruski biznes u emihracyi.

«Svabodny bajec. Finansava niezaležny» — heta najlepšaja charaktarystyka dla reputacyi ŭ ZŠA.

Važna ŭličvać i bolš šyroki kantekst. Resursy ZŠA nie biaźmiežnyja, a klučavy vyklik dla Vašynhtona siońnia farmujecca ŭ Cichaakijanskim rehijonie.

Adsiul zakanamiernaje pytańnie: ci nie źjaŭlajecca prasoŭvańnie biełaruskaj paviestki ŭ ZŠA zahadzia druharadnaj zadačaj?

My ciapier žyviom u liminalnaj zonie. Adna epocha skončyłasia, a druhaja jašče nie nastupiła. Ja miarkuju, što praviły novaha suśvietnaha paradku ŭ značnaj stupieni buduć farmavacca ŭ Vašynhtonie. ZŠA, budučy abaronienymi akijanami, mohuć fizična harantavać svaju biaśpieku, adnak ekanamična jany nie mohuć dazvolić sabie izalacyjanizm.

pahraničnaj

Daktryna Manro nie vyčerpvaje novuju źniešniuju palityku ZŠA.

Dziejańni ŭ Łacinskaj Amierycy racyjanalnyja i vyhladajuć jak umacavańnie «zadniaha dvara» pierad hałoŭnym etapam supraćstajańnia ŭ novaj chałodnaj vajnie.

Pry hetym ZŠA, nasupierak raspaŭsiudžanym acenkam, nie sychodziać ź Jeŭropy. Chutčej jany «pieravychoŭvajuć» Jeŭropu, imknucca prymusić jeŭrapiejskich sajuźnikaŭ uziać na siabie bolš adkaznaści za ŭłasnuju biaśpieku. Mienavita hetym tłumačycca cisk na krainy NATA i patrabavańnie davieści abaronnyja vydatki da 5% VUP.

Intaresy svabodnaj Biełarusi nieabchodna prasoŭvać adnačasova i ŭ Jeŭropie, i ŭ ZŠA.

Moj asabisty dośvied apošnich piaci hadoŭ pakazvaje: kali Vašynhton nie hatovy dziejničać, to damahčysia istotnych rašeńniaŭ nie atrymajecca ni ŭ Kijevie, ni ŭ Varšavie, ni ŭ Vilni. Takaja hieapalityčnaja realnaść.

Vysnova: kali my sapraŭdy chočam stvaryć ustojlivaje biełaruskaje łobi ŭ ZŠA, nieabchodnaja sistemnaja arhanizacyja pracesu. Siarhiej Cichanoŭski prademanstravaŭ, što moža być frontmenam takoha prajekta. Kažučy movaj startapieraŭ, MVP pracuje.

Tamu ja skarystajusia ŭvahaj čytačoŭ «Našaj Nivy» i źviarnusia da pradstaŭnikoŭ biełaruskaha biznesu ŭ vyhnańni: źviažyciesia z nami. U Siarhieja Cichanoŭskaha jość płan, i jon adkryty da prapanoŭ.

Vadzim Prakopjeŭ.

5 lutaha 2026 hoda.

Vašynhton.

• 9
• 2
• 22
• 7
• 0
• 0
• 1
• 0