Mikałaj Čarhiniec napisaŭ list Trampu i pachvaliŭsia kuplenymi dypłomami
Na sajcie praŭładnaha Sajuza piśmieńnikaŭ Biełarusi źjaviŭsia adkryty list byłoha kiraŭnika hetaj arhanizacyi, 88‑hadovaha Mikałaja Čarhinca da prezidenta ZŠA Donalda Trampa. U im ruskamoŭny litaratar, jakomu Łukašenka ŭ 2022 hodzie prysvoiŭ zvańnie «narodnaha piśmieńnika Biełarusi», sprabuje ŭrazić Trampa rasijskim aniekdotam pra «tupych amierykancaŭ» i fejkavymi dypłomami, śpiecyjalna stvoranymi dla zadavalńnia ambicyj postsavieckich słavalubcaŭ.
Nahodaj dla napisańnia Čarhincom lista da Trampa stała nakiravańnie apošnim mahutnaj armady karabloŭ da bierahoŭ Irana.
U vialikim tekście, čamuści nie raźbitym na abzacy i padadzienym adnoj sucelnaj «cahlinaj», a tamu nadzvyčaj składanym dla čytańnia, adstaŭny milicejski hienierał dzielicca z prezidentam ZŠA «baradataj historyjaj», jakaja «ŭžo šmat hadoŭ chodzić pa roznych ŚMI». Kab nadać hetamu apaviadańniu ŭ vačach Trampa vahi, Čarhiniec piša, što niekali
«daŭ jaho pačytać dziaržaŭnamu sakrataru Sajuznaj dziaržavy Paŭłu Paŭłaviču Baradzinu. Pračytaŭšy, jon pakazaŭ vialiki palec i skazaŭ: «Uruču Zadornavu, chaj zabaŭlaje publiku!»
Hałoŭny siužet hetaha aniekdota, vytrymanaha sapraŭdy ŭ styli sumnaviadomych zadornaŭskich manałohaŭ pra «tupych amierykancaŭ» — u tym, što kamandzir amierykanskaha avijanosca «Aŭraam Linkaln» nibyta ŭ 1997 hodzie pierahavorvaŭsia sa słužboŭcami raźmieščanaha na bierazie ispanskaha majaka, patrabujučy, kab majak sastupiŭ jamu darohu, i nie moh zrazumieć, čamu toj nie moža hetaha zrabić. Iran Čarhincom paraŭnoŭvajecca z tym samym majakom, ab jaki amierykanskaja armada moža raźbicca, nie razumiejučy praz svaju niedalokaść, što heta niesakrušalnaja skała.
Zaviaršaje ž svoj list Čarhiniec ekskursam va ŭłasnuju bijahrafiju:
«Ja ŭ svoj čas na praciahu 12 hadoŭ uvachodziŭ u skład delehacyi Respubliki Biełaruś dla ŭdziełu ŭ pracy Hienasamblei AAN. Pamiataju, jak amierykanskaja delehacyja ŭniesła na razhlad Hienasamblei «Akt ab demakratyi ŭ Biełarusi», zapatrabavaŭšy asudzić našu krainu. Nakiravańnie armady nahadała mnie tuju historyju ŭ AAN. Mnie tady daviałosia vystupić z arhumientavanaj pramovaj, u jakoj ja pakazaŭ absurdnaść hetych abvinavačvańniaŭ. U vyniku bolšaść delehataŭ padtrymali Biełaruś i delehacyi ZŠA daviałosia źmianić kurs. […]
Pryjemna, što maju racyju ŭ Hienasamblei ŭchvaliła bolšaść dziaržaŭ i navat hramadskaść ZŠA i Anhlii, pra što śviedčać ich dypłomy».
Kab nie być hałasłoŭnym, da tekstu Čarhiniec dałučaje i skany tych dypłomaŭ. Heta kurjoznyja «dakumienty», masavaj vydačaj jakich zarablajuć sabie na chleb stvaralniki šmatlikich «bijahrafičnych instytutaŭ» z hučnymi nazvami. Pry žadańni luby prahny da słavy, ale zusim nie krytyčny ni da samoha siabie, ni da rečaisnaści čałaviek moža atrymać u takim «instytucie» zvańnie kštałtu «čałavieka hoda», prosta zapłaciŭšy za heta peŭnuju sumu. Za heta jamu vypisvajuć dypłom, vartaść jakoha roŭna takaja, kolki kaštujuć papiera i druk. Ni amierykanskaja, ni brytanskaja, ni choć by jakaja-niebudź inšaja hramadskaść da hetaha nijakaha dačynieńnia nie majuć.
Tramp ściahnuŭ da bierahoŭ Irana mahutnuju armadu, i ciapier vyrašaje, što ź joju rabić
Tramp vystaviŭ Iranu ultymatum na fonie nabližeńnia da jaho bierahoŭ «vializnaj armady»
U minskaj škole imia praŭładnaha piśmieńnika Čarhinca adkryli muziej, pryśviečany Čarhincu. Pry jahonym žyćci
Upieršyniu zvańnie «narodnaha piśmieńnika Biełarusi» prysvoili ruskamoŭnamu litarataru
Praŭładny sajuz piśmieńnikaŭ choča vydać zbor tvoraŭ Łukašenki i pryniać jaho ŭ svaje šerahi
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary