Vital Cyhankoŭ: Raduje niesumniennaje ŭmacavańnie instytutu siamji

Kali zadumacca, to heta niejmavierna, jak chutka adbyvajucca źmieny ŭ śviecie. Jašče jakich 30 hadoŭ tamu za adnapołyja adnosiny sadžali navat na Zachadzie i na pytańnie pra hiej-šluby 95 pracentaŭ adkazali b «Vy što — chvory?» A siońnia heta mejnstrym i bolšaść žycharoŭ zachodnich krainaŭ, pavodle sacyjolahaŭ, padtrymlivaje hiej-šluby.

Čałaviectva za 30 hadoŭ prajšło zruch u śviadomaści, na jaki raniej patrabavalisia b stahodździ, źmianiła normu, jakaja isnavała tysiačy hadoŭ. Chtości skaža — «heta zachaplaje i natchniaje», chtości skaža — «heta dakazvaje tolki toje, što ciapier ludzki statak razvaročvać na 180 hradusaŭ našmat praściej». Mahčyma, iścina niedzie pasiaredzinie, ale mnie (jak čałavieku, jaki jašče hady try tamu pisaŭ u artykule, što ja vystupaju za hiej-šluby i svajoj pazycyi nie mianiaŭ) časam prykolna nazirać, jak ludzi ŭ adzinym paryvie pišuć «ja jašče niadaŭna byŭ suprać, ale ciapier ja prazreŭ i zrazumieŭ…»

Mnie tolki škada, što na fonie bitvy emocyjaŭ nichto nie zajmajecca spakojnym analizam taho, jakija sacyjalnyja, maralnyja dy inšyja nastupstvy dla čałaviectva niasie hety praces. U toj čas jak adny šalona kryčać «ura, svaboda» i mianiajuć avatarki na Fejsbuku (zabaŭlaje hety «parad lajalnaści»), inšyja, jak šalonyja, kryčać «kaniec śvietu nastupaje» — ale nichto nie sprabuje (ci nia moža) spakojna acanić, što ž niasie hety praces. I ja nie vaźmu na siabie takuju rolu, nie chapaje viedaŭ i infarmacyi. Ale pieršaje, što možna zaśviedčyć – heta vidavočnaje źnižeńnie hradusu «maskulinnaści» va ŭsich sferach zachodniaha hramadztva, razmyvańnie hiendarnych rolaŭ, stvareńnie precedentu «varyjantnaści», jaki nieviadoma jakim bokam moža paviarnucca, jakaja «varyjacyja» budzie lehitymizavanaja nastupnaj.

Što mnie adnaznačna nie padabajecca — dyk heta niepryhožaja padmiena paniaćciaŭ, kali luboha čałavieka, jaki nie prymaje hiej-šlubaŭ, pačynajuć nazyvać «hamafobam». Jak čałavieku, jaki vystupaje za hiej-šluby, mnie zdajecca heta prymityŭnym i nizkim. Pavodle takoj łohiki, «hamafobami» možna nazyvać 99 pracentaŭ usich ludziej, što žyli na Ziamli da apošnich 30 hadoŭ — bo nikomu ź ich nie pryjšło b u hałavu vystupać za hiej-šluby. Ja mahu nie lubić sacyjalizm, ale heta nijak nie značyć, što ja nienavidžu tych ludziej, jaki vystupajuć za sacyjalizm. Ludzi mohuć całkam narmalna i pazytyŭna stavicca da hiejaŭ, ale być suprać hiej-šlubaŭ z-za svaich palityčnych, relihijnych ci kaštoŭnasnych pierakanańniaŭ. Ci prosta pavodle zvyčcy.

U lubym vypadku, raduje niesumniennaje ŭmacavańnie instytutu siamji:). Niekatoryja pamyłkova dumali, što hiejam treba seksualnaja raźniavolenaść i svabodnaje kachańnie. Jak jany pamylalisia! Akazałasia, što prasunutym hiejam, jak i hieteraseksuałam, patrebny štampik u pašparcie.

• 0
• 0
• 0
• 0
• 0
• 0
• 0
• 0