Palicyjaj Rasii zatrymany 14-hadovy padletak, jaki prapanoŭvaŭ minakam čaj pad vyhladam narkotykaŭ. Jak vyśvietliłasia, niepaŭnaletni adšukvaŭsia apieratyŭnikami kryminalnaha vyšuku Partyzanskaha RUUS Minska pa padazreńni va ŭčynieńni rabavańnia.
Jak paviedamlaje HUUS Minharvykankama, u stalicy niepaŭnaletni taksama vykarystoŭvaŭ schiemu prodažu čaju pad vyhladam narkotykaŭ. Tak, 34-hadovamu minčaninu chłopiec prapanoŭvaŭ kupić kurylnuju sumieś. Zabaronieny pradukt jon prademanstravaŭ u karobcy ad zapałak. Kali ž pakupnik pačaŭ dastavać hrošy, kab zapłacić, padletak vychapiŭ z ruk kašalok i ŭciok. U kašalku byŭ prykładna 1 młn. biełaruskich rubloŭ. Mužčyna źviarnuŭsia ŭ Partyzanskaje RUUS stalicy. Apieratyŭniki pačali pošuki padazravany.
Padčas praviedzienych apieratyŭna-vyšukovych mierapryjemstvaŭ supracoŭnikam kryminalnaha vyšuku stała viadoma, što padazravany — žychar Viciebska. U stalicu pryjechaŭ z metaj nielehalnaha zarobku. Paśla rabavańnia 14-hadovy chłopiec, jaki staić na ŭliku ŭ inśpiekcyi pa spravach niepaŭnaletnich, staŭ chavacca ad minskaj milicyi i źjechaŭ u Rasiju da baćki. Tam byŭ zatrymany palicyjaj za anałahičnaje złačynstva.
U dačynieńni da złamyśnika raspačata kryminalnaja sprava na padstavie art. 206 KK (rabavańnie). Jamu pahražaje pazbaŭleńnie voli na termin da čatyroch hadoŭ. Ciapier vyrašajecca pytańnie pra ekstradycyju.
Kamientary