Na pieramovach u Vienie dasiahnuta damoŭlenaść pra abmiežavańnie iranskaj jadziernaj prahramy ŭ abmien na admienu sankcyj suprać Tehierana, paviedamlajuć ŚMI sa spasyłkaj na dypłamatyčnyja krynicy.
Jak paviedamiła krynica, jakuju cytuje ahienctva Asašyejted pres, usie finalnyja roznahałośsi byli vyrašany.
Dva inšyja dypłamaty taksama paviedamili, što ździełka była dasiahnutaja. «Usia heta ciažkaja praca apraŭdała siabie i my dasiahnuli damoŭlenaści», — kaža adzin ź ich.
Damoŭlenaści pamiž «šaściorkaj» i Iranam pa iranskaj jadziernaj prahramie praduhledžvajuć admienu sankcyj u dačynieńni da Tehierana, havorycca ŭ tekście pahadnieńnia, dasiahnutaha na pieramovach u Vienie.
«Pahadnieńnie praduhledžvaje admienu ŭsich sankcyj Rady biaśpieki AAN, a taksama šmatbakovych i nacyjanalnych sankcyj, źviazanych ź iranskaj jadziernaj prahramaj, uklučajučy miery pa dostupie ŭ śfiery handlu, technałohij, finansaŭ i enierhietyki», — havorycca ŭ dakumiencie.
U abmien na admienu sankcyj Iran abaviazvajecca na praciahu 15 hadoŭ nie pravodzić navukovyja raspracoŭki pa pierapracoŭcy jadziernaha paliva. Akramia taho, zhodna z dakumientam, zapasy nizkaŭzbahačanaha uranu ŭ Iranie na praciahu 15 hadoŭ nie pavinny pieravyšać 300 kh.
«Iran zapeŭnivaje, što ni pry jakich umovach nie budzie imknucca da vałodańnia, raspracoŭvać abo atrymlivać dostup da luboha vidu jadziernaj zbroi», — havorycca ŭ tekście pahadnieńnia.
U vypadku parušeńnia Iranam hetych abaviazacielstvaŭ sankcyi mohuć być adnoŭlenyja praz hałasavańnie ŭ Radzie Biaśpieki AAN.
Raniej šeść krain — udzielnic pieramovaŭ (ZŠA, Francyja, Vialikabrytanija, Hiermanija, Kitaj i Rasija) i Iran padrychtavali 100-staronkavy dakumient, u jakim detalova raspracavany ŭmovy skaračeńnia iranskaj jadziernaj prahramy i źniaćcia mižnarodnych sankcyj.
Tym časam na fonie navin ź Vieny ceny na naftu ranicaj źnizilisia na 2%.
U tym vypadku, kali pieramovy sapraŭdy prajšli ŭdała, ź Irana mohuć źniać sankcyi, a heta paciahnie za saboj pavieličeńnie prapanovy na naftavym rynku, a značyć — dalejšaje padzieńnie cenaŭ.
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary