Uładalnik «Adnakłaśnikaŭ», Mail.ru i «UKantakcie» vydatkavaŭ 100 młn dalaraŭ na pošuk inšapłanietnikaŭ

Rasijski miljarder Juryj Milnier, suuzasnavalnik i saŭładalnik Mail.Ru Group i fondu DST Global, vydatkavaŭ 100 młn dalaraŭ z asabistych srodkaŭ ułasnaha dabračynnaha fondu na pošuk nieziamnych cyvilizacyj, raspavioŭ jon haziecie «Viedamaści».

Ideołaham prajekta Milnier nazyvaje słavutaha fizika Styviena Chokinha, a navukovymi lidarami i kaardynatarami — Frenka Drejka i Džefa Marsi. U miežach prajektu navukoŭcy arhanizujuć zbor, apracoŭku i volny dostup da infarmacyi pra mahčymyja sihnały, što pastupajuć na Ziamlu z kosmasu.

Užo zaklučanyja pahadnieńni na piać hod z apieratarami najbujniejšych u śviecie radyjoteleskopaŭ Green Bank Telescope i Parkes Telescope dy aptyčnaha teleskopa Lick Observatory. Teleskopy buduć razhladać miljon bližejšych da nas zorak u centralnaj častcy Mlečnaha Šlachu i sotniu bližejšych da nas hałaktyk. Na nastupnym etapie pietabajty infarmacyi buduć raźmieščanyja ŭ volnym dostupie ŭ internecie, ich budzie apracoŭvać sietka z 9 młn kampjutaraŭ (mierkavana, u daśledčym centry Bierkli).

U miežach prajektu buduć šukać sihnały ŭ formie radyjochvalaŭ (500 MHc – 15 Hc) i łaziernaje vypramieńvańnie. Vyjavić inšyja sihnały, praź jakija z nami mohuć źviazvacca nieziamnyja cyvilizacyi, sučasnaja technika nie dazvalaje. Miljarder taksama abiacaje vydatkavać hranty navukoŭcam ź blizkimi celami.

Sam Milnier aceńvaje šancy atrymać u bližejšaj budučyni niejkija vyniki jak nievysokija. Ale adznačaje, što ŭ našaj hałaktycy jość niekalki miljardaŭ płaniet, blizkich pa pamiery da Ziamli, na ich pavierchni moža być vada ŭ vadkaj formie — a značyć i arhaničnaje žyćcio.

***

Juryj Milnier — rasijski biźniesmien, pa acenkach Forbes maje ŭ kišeni 3,4 młrd dalaraŭ. U 2000 hodzie zasnavaŭ Mail.ru razam z dvuma inšymi biźniesoŭcami. Na siońnia Mail.ru Group naležać ułasna Mail.ru, «UKantakcie», «Adnakłaśniki», «Moj śviet», ICQ, 70% polskaj sacsietki «Nasza Klasa» i inšyja aktyvy. Paźniej stvaryŭ mižnarodnuju kampaniju DST Global, što ŭ 2009 hodzie nabyła 10% akcyj sacsietki Facebook, zatym inviestavała ŭ Twitter, AirBNB, Snapchat, Alibaba, Xiaomi i inšyja IT-kampanii. U 2012-2013 hh braŭ udzieł u stvareńni premij pa fundamientalnaj fizicy, miedycynie i matematycy z pryzami pa 3 młn dalaraŭ u kožnaj.

Z 1959 hoda pa ŭsim śviecie dziejničaje prajekt SETI, nakiravany na pošuk sihnałaŭ ad nieziamnych cyvilizacyj i vychad na suviaź ź imi. Za bolš čym paŭstahodździa adnaznačnych vynikaŭ atrymana nie było, chacia navukoŭcy nie raz «łavili» sihnały, što pry žadańni možna było interpretavać jak pasłańni inšych cyvilizacyj.

• 0
• 0
• 0
• 0
• 0
• 0
• 0
• 0