Hienadź Fiadynič: Idzi, Ryhoravič, na «vybary» adzin: sam zavioŭ krainu ŭ tupik — sam vyvodź
Usie pretendenty na prezidenckaje kresła ljuć vadu na młyn režymu. «Vy ljacie vadu na młyn taho, chto krucić młyn, a potym budziecie aburacca: dyktatar falsifikavaŭ vybary! A čym vy adroźnivajeciesia ad dziejnaha režymu, kali śviadoma padyhryvajecie jamu?» — zadaje rytaryčnaje pytańnie lidar Biełaruskaha prafsajuza rabotnikaŭ radyjoelektronnaj pramysłovaści (REP) Hienadź Fiadynič.
— Ja da hetaha času nie mahu zrazumieć pretendentaŭ-kandydataŭ i ci jość u ich hramadzianskaja pazicyja. Jak kažuć, sumleńnie albo jość, albo jaho niama. Chto pavažaje Biełaruś, chto pavažaje biełaruskich hramadzian, chto pieražyvaje za palitviaźniaŭ, jakija siadziać u turmach, pavinny prosta źniacca. A chto «nie zaŭvažaje» taho, što adbyvajecca vakoł i padyhryvaje ŭładzie, chaj zastajecca z uładaj. Ułada namaluje im 110 tysiač podpisaŭ — chaj hulajucca ŭ «vybary».
Vy bačycie, jakaja apatyja panuje siarod ludziej. Nie tamu što na dvary zaraz leta — i ŭvosień, i ŭzimku adbyvałasia b toje ž samaje; pieranos kampanii na miesiac raniej nijakaj roli nie adyhraŭ. Užo jość infarmacyja, što ŭ instytutach prymušajuć supracoŭnikaŭ padpisvacca za Łukašenku. Siońnia vučony padpišacca z-za strachu stracić pracu, ale jak jon prahałasuje ŭ dzień «vybaraŭ»? A kali jon ŭpiša ŭ biuleteń proźvišča Statkieviča, Ivanova, Sidarava — kolki takich biuleteniaŭ akažacca? Mnohija ludzi nie viedajuć, jak supracivicca hvałtu nad asobaj: ja nie chaču hałasavać za Łukašenku, ale mianie prymušajuć. Ja budu supraciŭlacca lubymi dastupnymi srodkami. Biezumoŭna, my nie daviedajemsia kankretnych ličbaŭ pa vynikach hałasavańnia, ale staŭleńnie ludziej da hetaha cyrku my daviedajemsia.
Kali ty adčuvaješ siabie prezidentam, viedaješ, jak kiravać krainaj i viedaješ vychad z kryzisu — čaho ty tak baišsia prajhrać? Nabiareš nie 87 i nie 98% hałasoŭ, a 51% — na Zachadzie sotyja doli vyznačajuć prezidenta. A kali nie nabraŭ — značyć, narod nie padtrymaŭ: ty zasłuhoŭvaješ taho, čaho zasłuhoŭvaješ.
27 lipienia my adznačyli Dzień Niezaležnaści, jaki Łukašenka admianiŭ. Ci adčuvaje siabie niezaležnym hramadzianin Biełarusi? Dy jon zaležny ad usiaho siońnia. Rana ci pozna hety absurd skončycca. Ale chaciełasia b, kab adbyłosia heta dosyć mirnym šlacham. Ułada, mahčyma, zadumvajecca nad prablemaj, ale pracuje pa raniejšym scenary.
Da čaho my pryjdziem? Pakaža tolki čas. Ale ja b skazaŭ: Ryhoravič, idzi na «vybary» adzin — tvajo proźvišča samaje viadomaje, tamu što ŭsich astatnich narod naohuł nie viedaje. Zavioŭ krainu ŭ tupik — vyvodź jaje! Ščyra pryznajsia narodu: ja zavioŭ ekanomiku ŭ tupik, ale ja viedaju, jak jaje vyvieści.
— Što paraicie pretendentam ad apazicyi, jakija, niahledziačy ni na što, udzielničajuć u prezidenckaj honcy?
— Chaj prymuć čarku čaju, siaduć pierad lusterkam i pahladziać na siabie. Tady, mahčyma, ich mazhi naviedaje dumka: navošta siońnia klikać ludziej za saboj, chaj navat pad bieł-čyrvona-biełymi ściahami? Čamu nie pajšli na «vybary» bolš hodnyja? Vy ljacie vadu na młyn taho, chto krucić młyn, a potym budziecie aburacca: dyktatar falsifikavaŭ vybary! A čym vy adroźnivajeciesia ad dziejnaha režymu, kali śviadoma padyhryvajecie jamu?
Kamientary