Pamior biełaruski sacyjołah i fiłosaf Uładzimir Abušenka. Jamu było 58 hadoŭ.
Uładzimir Abušenka naradziŭsia 22 krasavika 1957 u Pinsku. Skončyŭ adździaleńnie fiłasofii histfaka BDU (1979), zatym pracavaŭ vykładčykam kafiedry fiłasofii Biełaruskaha politechničnaha instytuta.
U 1985 hodzie abaraniŭ dysiertacyju kandydata fiłasofskich navuk na temu «Prablemy pabudovy sistemy pakazčykaŭ duchoŭnaj dziejnaści asoby ŭ kancepcyi sacyjalistyčnaha ładu žyćcia. (Tearetyka-mietadałahičny aśpiekt)». Z krasavika 1990 hoda pa krasavik 2002 hoda — dacent kafiedry sacyjałohii BDU.
Z krasavika 2002 hoda — namieśnik dyrektara Instytuta sacyjałohii NAN Biełarusi pa navukovaj rabocie (u krasaviku-śniežni 2008 hoda vykonvaŭ abaviazki dyrektara Instytuta).
Alaksiej Łastoŭski napisaŭ u svaim fejsbuku: «I ja ž bačyŭsia ź im u minuły čaćvier, zachodziŭ da jaho na pracu. Abušenka kazaŭ, što vielmi stamiŭsia, choča prosta dapracavać da piensii. Na zdaroŭje nie skardziŭsia, jak zvyčajna, žaliŭsia na administratyŭnuju rucinu, jakaja nie daje jamu rabić karysnyja i cikavyja rečy. Svaju knihu, pra jakuju jon daŭno maryŭ, i jakoj ad jaho čakali, jon tak i nie dapisaŭ.
Dy i ahułam, šmat što i nie zrabiŭ — choć byŭ adnoj z najbolš śvietłych i hłybokadumnych fihur u biełaruskaj sacyjałohii. Bajusia, što budziem pamiatać jaho nie pa tekstach, a pa vychavańni bliskučaj plejady vučniaŭ.
Ja-to takim nie byŭ, ale što jość - Abušenka zaŭždy mnie dapamahaŭ i padtrymlivaŭ. Ad samaha pačatku, kali ja ŭ jakaści viaskovaha nastaŭnika historyi zavaliŭsia ŭ Instytut sacyjałohii — i pieršym chto mianie sustreŭ na kalidory i realna dapamoh byŭ Abušenka. Vielmi škada, što takija vybitnyja ludzi tak rana sychodziać. Spadziajusia, u vyrai jaho ŭžo čakaje Hrycanaŭ z kiliškam harełki».
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ20
Kamientary