25 krasavika a pałovie na siomuju viečara 15 chłapcoŭ i dziaŭčat pryjšli da budynka Akademičnaha teatra imia Jakuba Kołasa sa śviečkami i skrutkami papiery. Na vačoch u minakoŭ, apranuŭšy na tvary reśpiratary, jany malavali plakaty, pryśviečanyja trahiedyi ŭ Čarnobyli.
Hetuju akcyju moładź nazvała taksama «akcyjaj salidarnaści», bo niašmat chto ź viciebskich studentaŭ dy navučencaŭ maje mahčymaści pajechać zaŭtra ŭ Miensk na «Čarnobylski šlach». Pra heta raspavioŭ adzin z udzielnikaŭ akcyi ŭ Viciebsku.
(Chłopiec:) «My nia možam tam być zaŭtra, tamu vyrašyli zrabić heta tut – dziela pamiaci zahibłych ad avaryi na Čarnobylskaj AES, dziela pamiaci zahibłych ad palityki zamoŭčvańnia nastupstvaŭ avaryi. A taksama na znak salidarnaści z tymi studentami, jakija musiać jechać u zabrudžanyja rajony pavodle raźmierkavańnia. Chacia heta nielahična i niezrazumieła, navošta našyja ŭłady heta robiać. Biełarusi patrebnaja svaboda, Biełarusi patrebny novy prezydent i novaja palityka!»
Udzielnikami akcyi stalisia studenty roznych viciebskich navučalnych ustanovaŭ i siabry roznych hramadzkich ab»iadnańniaŭ, u tym liku j tych, što pakul nia majuć nia toje što rehistracyi ŭ Miniuście, ale navat nazvy.
Minaki pačali źviartać uvahu na kupku maładych ludziej, častka jakich malavała plakat, a častka – prosta siadzieła ŭzboč z zapalenymi śviečkami. I niechta z «pilnych hramadzianaŭ», vierahodna, patelefanavaŭ ŭ milicyju, bo nieŭzabavie adniekul źjaviŭsia milicejski patrul.
Milicyjanty čamuści adrazu źviarnulisia da žurnalistaŭ, jakija nazirali za padziejami. I pakul achoŭniki paradku vyśviatlali, chto jość arhanizatarami niesankcyjanavanaj akcyi, moładź paśpieła raźbiehčysia. Takim čynam, nikoha z udzielnikaŭ nie zatrymali, ale akcyja doŭžyłasia ŭsiaho kala 20-ci chvilinaŭ.
Kamientary