Šeście na Dziady budzie dazvolenym

Kansiervatyŭna-chryścijanskaja partyja — BNF atrymała dazvoły Minskaha haradskoha i Minskaha abłasnoha vykanaŭčych kamitetaŭ na praviadzieńnie 1 listapada vuličnaj akcyi, prymierkavanaj da dnia pamiaci prodkaŭ Dziady.

Pavialičyć

Ab hetym paviedamiŭ namieśnik staršyni partyi Juryj Bieleńki 27 kastryčnika na pres-kanfierencyi ŭ Minsku. 

Pavodle jaho słoŭ, ułady dazvolili praviadzieńnie akcyi ŭ tym farmacie, jaki prapanavali zajaŭniki.

Zbor udzielnikaŭ akcyi budzie prachodzić z 11.00 da 11.30 na placoŭcy pierad budynkam TAA «Minski hadzińnikavy zavod». Z 11.30 da 14.30 adbudziecca demanstracyja pa tratuary pa maršrucie: pr. Niezaležnaści — vuł. Kalinoŭskaha — vuł. Siadych — vuł. Karbyšava — vuł. Hamarnika — vuł. Mirašničenki — Minskaja kalcavaja aŭtamabilnaja daroha (padziemny pierachod pad MKAD da ŭročyšča Kurapaty). Z 14.30 da 17.00 na terytoryi ŭročyšča, dzie prachodzili masavyja pachavańni achviar stalinskich represij, zapłanavana praviadzieńnie mitynhu. Zajaŭlenaja kolkaść udzielnikaŭ akcyi — da piaci tysiač čałaviek. 

Bieleńki paviedamiŭ, što ŭ rasparadžeńni, padpisanym staršynioj Minabłvykankama Siamionam Šapiram, utrymlivajecca patrabavańnie padčas mitynhu «harantavać achovu hramadskaha paradku, miedycynskaje absłuhoŭvańnie, supraćpažarnuju biaśpieku, naležny sanitarny stan miesca praviadzieńnia mierapryjemstva», zaklučyŭšy adpaviednyja dahavory. Bieleńki ličyć heta patrabavańnie niepravamiernym jak z zakanadaŭčaha, tak i z maralnaha punktu hledžańnia.

U pryvatnaści, jon paviedamiŭ, što letaś jaho aštrafavali za toje, što nie apłaciŭ pasłuhi milicyi, jakaja zabiaśpiečvała paradak na mierapryjemstvie. Pry hetym, pavodle jaho słoŭ, na sudzie vyśvietliłasia, što z BRSM hrošy pry praviadzieńni ich mierapryjemstvaŭ ułady nie biaruć. Takim čynam, ličyć palityk, ułady parušajuć artykuł 190 Kryminalnaha kodeksa (parušeńnie raŭnapraŭja hramadzian). Akramia taho, na dumku Bieleńkaha, dziejańnie abłasnych uład padpadaje pad artykuł 426 KK (pieravyšeńnie ŭłady ci słužbovych paŭnamoctvaŭ), bo rašeńnie pra nieabchodnaść apłaty pasłuh pavinna było prymacca kalehijalnym orhanam, a nie zaćviardžacca rasparadžeńniem staršyni. 

Bieleńki adznačyŭ, što zajaŭniki akcyi źviernucca ŭ abłvykankam, kab ich vyzvalili ad apłaty pasłuh dziaržaŭnych słužbaŭ. Kali hetaha nie adbudziecca, palityk maje namier źviarnucca ŭ prakuraturu.

• 0
• 0
• 0
• 0
• 0
• 0
• 0
• 0