Pieršy virtualny bank moža źjavicca ŭ Biełarusi ŭ 2017-2018 hodzie. Takoje mierkavańnie vykazaŭ siońnia žurnalistam namieśnik hienieralnaha dyrektara IT-kampanii «SoftKłub» Dźmitryj Filimonaŭ.
«Usie pieradumovy dla stvareńnia virtualnaha banka ŭ Biełarusi ŭžo jość», — upeŭnieny Dźmitryj Filimonaŭ. Heta i raźvićcio napramku ličbavaha bankinhu ŭ Nacyjanalnym banku, i raspracoŭka stratehii na 2016-2020 hady, i padrychtavany prajekt ukaza ab ličbavych bankaŭskich technałohijach. «Łahičnym praciaham raźvićcia ličbavaha bankinhu źjaŭlajecca poŭnaja virtualizacyja ŭsich bankaŭskich servisaŭ, heta značyć stvareńnie tak zvanaha virtualnaha banka, — adznačyŭ ekśpiert. — Ja dumaju, heta pierśpiektyva 2017-2018 hoda». U śviecie takija banki ŭžo jość, u tym liku ŭ krainach SND, naprykład, u Rasii, dadaŭ jon.
Havoračy ab tym, jak budzie vyhladać hety bank, ekśpiert vykazaŭ mierkavańnie, što ŭ im u afłajnie buduć pracavać tolki staršynia praŭleńnia, hałoŭny buchhałtar i ajcišnik, a astatnija pracesy buduć aŭtamatyzavany i pojduć u anłajn. «Virtualny bank — heta absłuhoŭvańnie klijentaŭ anłajn, adsutnaść ofisaŭ abo ich minimalnaja kolkaść, pradastaŭleńnie ŭsiaho śpiektra pasłuh u rašeńni mabilnaha abo internet-banka», — rastłumačyŭ jon. Takim čynam, klijent zmoža atrymać anłajn praktyčna lubuju kansultacyju, nabyć luby pradukt — depazit, kredyt, kartku, i tut ža pačać im karystacca. Naprykład, atrymlivać pracenty pa depazicie, karystacca hrašovaj sumaj, kali heta kredyt. Heta pavysić uzrovień absłuhoŭvańnia klijenta i zakryje tuju klijenckuju patrebnaść, jakaja siońnia ŭžo jość, padkreśliŭ ekśpiert.
Mnohija biełaruskija banki ŭžo ciapier abjaŭlajuć ab imknieńni stać vyklučna virtualnymi. Adzin z asnoŭnych faktaraŭ, jaki tarmozić praces — niehatoŭnaść da hetaha bolšaści ciapierašnich klijentaŭ, kanstatavaŭ ekśpiert. «Adnak moładź pakaleńniaŭ Y i Z, jakaja padrastaje, užo hatova absłuhoŭvacca ŭ poŭnaściu virtualnych bankach, — padkreśliŭ pradstaŭnik IT-kampanii. — I my taksama hatovy — jak raspracoŭščyki. Adpaviednaje prahramnaje zabieśpiačeńnie ŭ nas užo jość».
Pry hetym rašajučaje značeńnie dla paśpiachovaj virtualizacyi bankaŭskich pracesaŭ maje technałahičnaja hatoŭnaść bankaŭ apracoŭvać infarmacyju, jakaja pastupaje anłajn-šlacham, 24 hadziny ŭ sutki 365 dzion u hodzie, źviarnuŭ uvahu Dźmitryj Filimonaŭ. «My pierajšli toj rubiež, kali klijenty chacieli i mahli čakać, — padkreśliŭ jon. — Mahčymaść pravieści ŭsie patrebnyja bankaŭskija apieracyi anłajn u luby čas sutak asabista dla mianie — pakazčyk, što bank aktyŭny, inavacyjny, realna pracuje».
Bolš taho, ciapier ekśpierty ažyŭlena abmiarkoŭvajuć taki pierśpiektyŭny trend u płanie zachoŭvańnia i apracoŭki infarmacyi, jak vobłačnyja technałohii, źviarnuŭ uvahu ekśpiert. Vykarystańnie hetych technałohij daść mahčymaść bankam pavialičyć skoraść i jakaść absłuhoŭvańnia klijentaŭ, pradastavić novyja inavacyjnyja prajekty. «Dumaju, peŭnyja bankaŭskija prajekty ŭ śfiery vobłačnych technałohij mohuć być zapuščany ŭ Biełarusi ŭ 2016 hodzie», — adznačyŭ jon.
Jašče adzin suśvietny trend — omnikanalnaść, kali ŭsie dziejańni klijenta ŭ roznych dystancyjnych kanałach (sacsietkach, infakijosku, internet-bankinhu) uličvajucca, analizujucca i jamu apieratyŭna prapanujecca piersanalizavany pradukt. «Niekatoryja biełaruskija banki ŭžo vykarystoŭvajuć elemienty omnikanalnaści, i, uličvajučy, što heta pierśpiektyŭny suśvietny trend, dumaju, 2017-2018 hady mohuć stać ruchavikom u hetym napramku», — kanstatavaŭ ekśpiert.
Takim čynam, suśvietnaja i ajčynnaja bankaŭskaja śfiera aktyŭna transfarmujecca ŭ bok ličbavaha bankinhu, padkreśliŭ Dźmitryj Filimonaŭ. «Biełaruskija IT-kampanii, u svaju čarhu, hatovy zabiaśpiečvać banki jakasnymi i biaśpiečnymi prahramnymi rašeńniami, jakija adpaviadajuć suśvietnym trendam», — adznačyŭ pradstaŭnik «SoftKłuba».
Kamientary