Pieršyja tydni zimy ździŭlajuć svajoj ciepłynioj i adsutnaściu śniehu. Takoje zdarajecca redka — u siarednim raz na 15-20 hadoŭ, raspaviadaje Jeŭraradyjo hałoŭny sinoptyk biełaruskaha Hidramieteacentra Śviatłana Rybakova. Jana supakojvaje: bližej da Novaha hoda my narešcie ŭbačym zimu.
«Užo na nastupnym tydni stanie chaładnavata, tempieraturny fon panizicca, i jość spadziavańnie, što da Novaha hoda nas čakaje całkam zimovy piejzaž, vypadzie śnieh i tempieratura pavietra na navahodnija śviaty budzie ź nievialikim minusam», — paviedamiła Rybakova.
Pavodle papiaredniaha prahnozu, tempieratura ŭ studzieni taksama budzie krychu vyšejšaj za klimatyčnuju normu. I tolki ŭ lutym, vierahodna, karcina źmienicca.
«U lutym čakajecca, što tempieraturny fon budzie kala klimatyčnaj normy, i luty budzie bolš padobny na zimovy miesiac», — skazała sinoptyk.
Upłyŭ na nadvorje ŭ Biełarusi i ŭsioj Jeŭropie akazvaje Atłantyka. Ciopłaje i syroje pavietra idzie da nas z zachodnimi patokami. Cykłony źmiaščajucca daloka pa poŭnačy Jeŭropy i nie dajuć darohu choładu z Arktyki.
Darečy, amierykanskija sinoptyki prahnazujuć u Jeŭropie rezkija tempieraturnyja kantrasty. U paŭnočnaj častcy kantynienta budzie chaładniej, čym zvyčajna, asabliva ŭ studzieni-lutym, a ŭ paŭdniovaj — bolš miakkaje i ciopłaje nadvorje. Nizkija tempieratury, pa viersii amierykanskich śpiecyjalistaŭ, čakajucca ŭ Minsku, Bierlinie, Varšavie i Vilni.
Apošni raz śnieh na Novy hod bačyli ŭ Minsku piać hadoŭ tamu.
Kamientary