Prodaž biełaruskich «MAZaŭ» u Rasii skaraciŭsia ŭ dva razy, śviedčać źviestki rasijskaha analityčnaha ahienctva «Aŭtasta», jakoje śpiecyjalizujecca na vyvučeńni rynku transpartnych srodkaŭ RF.
Abjom rasijskaha rynku novych hruzavych aŭtamabilaŭ poŭnaj masaj bolšaj za 3,5 tony ŭ listapadzie 2015 hoda skłaŭ 4,1 tys. adzinak. U paraŭnańni z anałahičnym miesiacam 2014 hoda prodaž hruzavych aŭtamabilaŭ u Rasii źniziŭsia na 32%. Padzieńnie prodažu hruzavych aŭtamabilaŭ vytvorčaści Minskaha aŭtamabilnaha zavoda stała jašče bolšym — u listapadzie hetaha hoda ŭ paraŭnańni ź listapadam minułaha prodaž skaraciŭsia na 53,6%. U apošni vosieński miesiac u Rasiju było pradadziena 266 novych «MAZaŭ».
Usiaho za studzień—listapad 2015 hoda na rasijskim rynku byŭ pradadzieny 3.241 hruzavy aŭtamabil biełaruskaj vytvorčaści, što na 54,4% mienš u paraŭnańni z takim ža letašnim pieryjadam, paviedamlaje «Aŭtastat».
Treba adznačyć, što prodaž pradukcyi adnaho z asnoŭnych kankurentaŭ MAZa na rynku RF — rasijskaha KAMAZa — taksama źniziŭsia, ale ŭ mienšaj stupieni. Tak, za 11 miesiacaŭ hoda kamski aŭtazavod pradaŭ 15.281 hruzavy aŭtamabil na ŭnutranym rynku, što na 35,2% mienš u paraŭnańni z anałahičnym pieryjadam 2014 hoda.
Pavodle vynikaŭ prodažu za studzień—listapad dola KAMAZa na rasijskim rynku skłała 33,7% (hodam raniej — 29,8%), dola MAZa — 7,1% (9%).
Situacyja na biełaruskich mašynabudaŭničych pradpryjemstvach, u jakich istotna źniziŭsia prodaž, razhladałasia ŭ siaredzinie hoda na naradzie z udziełam Alaksandra Łukašenki. Kiraŭnik dziaržavy zapatrabavaŭ, kab na kožnym pradpryjemstvie byli vypracavanyja «hnutkija miery ŭłasnaha reahavańnia na najaŭnyja vykliki i pahrozy».
Tym časam pa stanie na 1 listapada na biełaruskich składach znachodziłasia 1.184 nierealizavanyja hruzavyja aŭtamabili, što ŭ 4,2 razu pieravyšaje siaredniamiesiačny abjom ich vytvorčaści.
Ciapier čytajuć
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ11
Kamientary