U Jaŭhiena paprasili cyharetu. Jon daŭ. Tady jamu zahadali: «Častuj usich!..»
U «Našu Nivu» źviarnułasia Zinaida Małaška sa Słonima, maci chłopca, asudžanaha za zabojstva.
Žančyna śćviardžaje, što jaje syn nie vinavaty. Situacyja jana ličyć źbieham abstavinaŭ.
10 listapada 2013 hoda dvoje jaje synoŭ, 23-hadovy Dźmitry i małodšy na dva hady Jaŭhien, vyrašyli naviedać miascovy kłub «Oskar», patančyć.
Paśla dyskateki, kala treciaj hadziny nočy, chłopcy viartalisia damoŭ. Dalej adbyłasia kananičnaja sustreča ź nieznajomaj kampanijaj. U Jaŭhiena paprasili cyharetu. Jon daŭ. Tady jamu zahadali: «Častuj usich!»
Słova za słova, pačałasia bojka — Jaŭhien atrymaŭ u tvar i samleŭ. Dźmitry taksama prapuściŭ paru ŭdaraŭ, ale jon i daŭ adpor, u svaju čarhu ŭdaryŭšy niekatorych z napadnikaŭ. Kampanija źbiehła.
Tym časam ludzi pabačyli bojku i vyklikali milicyju. Kali pravaachoŭniki pryjechali, to znajšli tolki dvuch bratoŭ Małaškaŭ. Ich zabrali ŭ adździaleńnie, ale chutka adpuścili. Zajavu pisać braty nie stali.
«Pa pakazańniach chłopcaŭ z toj kampanii, paśla jany nakiravalisia ŭ kramu. Tam nabyli vino i pili da ranicy na bližejšym prypynku. Kala 8 hadziny razyšlisia. Adzin z chłopcaŭ, 25-hadovy Vital, pryjšoŭ dachaty razam ź siabram. Tam jany razam z maci Vitala vypili jašče trochi, pra heta i maci, i siabar uzhadvali na sudzie», — kaža Zinaida Małaška.
Na nastupny dzień ničoha asablivaha nie adbyvajecca. Ale nastupnym rankam Vital pačynaje adčuvać siabie nie nadta dobra. Maci vyklikaje chutkuju, chłopca zabirajuć u balnicu. Ranicaj 14-ha listapada Vital pamiraje. Jak budzie vyznačana, z pryčyny zakrytaj čerepna-mazhavoj traŭmy i krovaźlićcia ŭ mozh.
U toj ža dzień, 14 listapada, u milicyju zabirajuć bratoŭ Małaška. Jaŭhiena ŭviečary adpuskajuć, Dźmitryja — nie. Vyśvietliłasia, što kali Vital trapiŭ u balnicu, to pra jaho traŭmy paviedamili ŭ milicyju. Jašče pakul jon byŭ žyvy, milicyjanty daprasili jaho siabroŭ i daviedalisia pra načnuju bojku.
U SIZA Dźmitry pravioŭ amal paŭhoda. Viasnoj 2014-ha ŭ Słonimie adbyŭsia sud. Dźmitryja pryznali vinavatym u zabojstvie pa nieaściarožnaści. Chłopiec atrymlivaje try hady z adterminoŭkaj, zastajecca na voli, ale pad nahladam milicyi.
Ale prakuratura padaje skarhi — prysud dla jaje zanadta miakki. Małaški pra heta nie viedajuć, śćviardžaje Zinaida, žyvuć spakojna. Dźmitry navat pastupaje ŭ Lidski kaledž, na zavočnaje.
U vyniku Viarchoŭny sud admianiaje papiaredniaje rašeńnie, spravu adpraŭlajuć na daśledavańnie. Letam 2015-ha prachodzić novy sud. Dźmitryju mianiajuć mieru pakarańnia. Chłopiec atrymlivaje try hady «chimii».
Na hety raz skarhi pišuć i prakuratura, i siamja Małaškaŭ. Pieršyja ličać, što prysud iznoŭ nadta miakki, druhija — što, naadvarot, zažorstki.
Ale nie paśpiavaje Dźmitry źjechać na «chimiju», jak hrodzienski sud admianiaje i hetaje rašeńnie słonimskaha suda. Spravu pieradajuć u Navahradak. I ŭ listapadzie prachodzić čarhovy sud, treci, užo ŭ Navahradku. Vyrašajuć, što Dźmitry vinavaty ŭ naŭmysnym pryčynieńni ciažkaha cialesnaha paškodžańnia, jakoje pa nieaściarožnaści pryviało da śmierci paciarpiełaha. A heta zusim inšy artykuł.
Adpaviedna, i pakarańnie inšaje — chłopiec atrymlivaje 7,5 hadoŭ kałonii.
Chłopiec zvyčajny, pracavaŭ naładčykam na miascovym papiarovym zavodzie. Susiedzi i znajomyja ŭzhadvajuć jaho dobrym słovam. Žychary mikrarajona Albiarcin, dzie žyvuć Małaški, navat pišuć kalektyŭny list u padtrymku Dźmitryja — bolš za 300 podpisaŭ.
«Našto z majho syna robiać zabojcu? Ja nie razumieju. Našto? — pytajecca maci Dźmitryja. — Pratest paśla pieršaha suda pisali nie baćki zahinułaha, a namieśnik hałoŭnaha prakurora respubliki. Jak heta? Čamu mienavita jon? Paśla ja razmaŭlała z bratam zahinułaha. Jon paćvierdziŭ, što ani jon, ani maci da toj skarhi dačynieńnia nie majuć».
Zinaida ličyć prysud niespraviadlivym.
«Na pieršym sudzie chłopcy z toj kampanii kazali pra niejkaha Saida, jaki, kali jany pili na prypynku, taksama ŭdaryŭ Vitala, to bok užo paśla bojki z maim synam. Heta spačatku fihuravała ŭ materyjałach spravy, potym čamuści źnikła, — kaža Zinaida Ma- łaška. — Plus u zahinułaha było bolš za 20 traŭmatyčnych paškodžańniaŭ i ŭsie jany datujucca terminam 4—7 dzion da śmierci. To bok chto tam jašče jaho biŭ, i kali — nieviadoma. Pryčym u materyjałach pravierki fihurujuć słovy maci Vitala, jakaja ŭzhadvaje bojku kala kramy. Ale ŭ kryminalnaj spravie ŭžo čamuści pra heta ničoha niama».
Zinaida śćviardžaje, što znajšła śviedku — žančynu, jakaja bačyła ŭsiu bojku.
«Taja žančyna kaža, što milicyja ź joj taksama razmaŭlała, ale skazali: «Vašyja pakazańni nie supadajuć z pakazańniami astatnich śviedkaŭ». I jaje pakazańniaŭ u kryminalnaj spravie taksama niama», — kaža Zinaida.
Ciapier Dźmitry «siadzić» pad Baranavičami. Nieŭzabavie jaho adpraviać u papraŭčuju kałoniju numar 3, bolš viadomuju jak «Vićba». Maci źbirajecca i dalej pisać skarhi, źviartacca ŭ Viarchoŭny sud. U toje, što jaje syn nie vinavaty, jana vieryć. A ŭ toje, što jaje vysiłki dapamohuć…
«Ja ŭ heta pavinna vieryć. Bo što mnie jašče zastajecca?» — pierakanana Zinaida.
Raźviedka ZŠA: Biełaruś stała pieradavym vajskovym płacdarmam Rasii24
Kamientary