Abjadnańniu Niaklajeva «Za dziaržaŭnaść i niezaležnaść!» admoŭlena ŭ rehistracyi
Ministerstva justycyi Biełarusi admoviła ŭ rehistracyi respublikanskamu hramadskamu abjadnańniu «Za dziaržaŭnaść i niezaležnaść!», paviedamiŭ adzin ź inicyjataraŭ stvareńnia arhanizacyi, kandydat u prezidenty na vybarach 2010 hoda, paet Uładzimir Niaklajeŭ.
Pavodle jaho słoŭ, u rehistracyi admoŭlena pa farmalnych pryčynach. «Farmalna ruch nazyvajecca RDAHA «Za dziaržaŭnaść i niezaležnaść!» (tak u statucie i ŭ pratakole ŭstanoŭčaha schodu), a voś u śpisie zasnavalnikaŭ hetaha «RDAHA» niama, tam napisana: «Hramadskaje abjadnańnie «Za dziaržaŭnaść i niezaležnaść!». U Miniuście nibyta nie zrazumieli, što heta adna i taja ž arhanizacyja, i paličyli śpis zasnavalnikaŭ niesapraŭdnym», — raspavioŭ Niaklajeŭ.
«Ale, zrazumieła, usio jany vydatna zrazumieli, — dadaŭ jon. — A kali b i nie — mahli patelefanavać, napisać, kab udakładnić. Kali pierarehistravaŭsia Sajuz piśmieńnikaŭ, ź jakimi Łukašenka raźličvaŭ u toj čas siabravać, da mianie ź Miniusta pa piać čałaviek za dzień prybiahała: «a voś tut, Uładzimir Prakopavič, nie taja litara, a voś tut nie taja zahahulinka…» I sami ŭsio pierapisvali».
Zrešty, ličyć palityk, «Miniust tut ni pry čym». «Usie my viedajem, chto ŭ Biełarusi ŭsich rehistruje ci nie rehistruje, sadžaje ci nie sadžaje. Choć Niaklajeva, choć Čyža», — skazaŭ jon.
Akramia Niaklajeva zasnavalnikami ruchu vystupili pieršy kiraŭnik niezaležnaj Respubliki Biełaruś Stanisłaŭ Šuškievič, pieršy biełaruski łaŭreat Nobieleŭskaj premii Śviatłana Aleksijevič, eks-kandydat u prezidenty, niadaŭni palitviazień Mikałaj Statkievič, prafsajuzny lidar Hienadź Fiadynič, palityk i litaratar Lavon Barščeŭski i mnohija inšyja viadomyja palityki, dziejačy kultury, hramadskija dziejačy. Adnak, jak miarkuje Niaklajeŭ, «sprava nie ŭ tym, kamu admovili».
«Sprava ŭ tym, u čym admovili, — padkreśliŭ jon. — Biełaruskaja dziaržava admoviła ŭ hramadskaj inicyjatyvie, nakiravanaj na zachavańnie dziaržaŭnaści i niezaležnaści krainy! I heta pry vidavočnaj niebiaśpiecy dla našaj niezaležnaści i dziaržaŭnaści». «Heta nie prosta paradoks. I nie prosta čarhovy plavok u bok hramadzianskaj supolnaści, čych na svabodu, demakratyju, prava. Heta kanstatacyja taho, jak my realna isnujem: hramadstva i dziaržava. Asobna. U paralelnych śvietach», — reziumavaŭ Niaklajeŭ.
Jon nie bačyć sensu pravodzić novy ŭstanoŭčy schod i znoŭ padavać dakumienty na rehistracyju ŭ Miniust. «Jak pakazvaje vopyt usich niezarehistravanych arhanizacyj, heta biessensoŭnaja chada pa kruzie. My zarehistrujem ruch «Za dziaržaŭnaść i niezaležnaść Biełarusi!» jak mižnarodnaje abjadnańnie. U Łukašenki jak by abaviazak, a ŭ nas — prava, hramadzianski abaviazak zmahacca za Biełaruś. My mnohaje možam dla jaje zrabić — i zrobim. Chto b nam ni sprabavaŭ pieraškodzić», — dadaŭ palityk.
Ustanoŭčy schod ruchu «Za dziaržaŭnaść i niezaležnaść Biełarusi!» adbyŭsia ŭ studzieni, praź miesiac dakumienty byli padadzieny ŭ Miniust. Niaklajeŭ tady mierkavaŭ, što «ŭłada nie zmoža znajści pierakanaŭčaje tłumačeńnie admovy ŭ rehistracyi patryjatyčnaha hramadskaha abjadnańnia, meta jakoha — zachavańnie i ŭmacavańnie dziaržaŭnaści i niezaležnaści krainy».
Kamientary