Аб'яднанню Някляева «За дзяржаўнасць і незалежнасць!» адмоўлена ў рэгістрацыі
Міністэрства юстыцыі Беларусі адмовіла ў рэгістрацыі рэспубліканскаму грамадскаму аб'яднанню «За дзяржаўнасць і незалежнасць!», паведаміў адзін з ініцыятараў стварэння арганізацыі, кандыдат у прэзідэнты на выбарах 2010 года, паэт Уладзімір Някляеў.
Паводле яго слоў, у рэгістрацыі адмоўлена па фармальных прычынах. «Фармальна рух называецца РДАГА «За дзяржаўнасць і незалежнасць!» (так у статуце і ў пратаколе ўстаноўчага сходу), а вось у спісе заснавальнікаў гэтага «РДАГА» няма, там напісана: «Грамадскае аб'яднанне «За дзяржаўнасць і незалежнасць!». У Мінюсце нібыта не зразумелі, што гэта адна і тая ж арганізацыя, і палічылі спіс заснавальнікаў несапраўдным», — распавёў Някляеў.
«Але, зразумела, усё яны выдатна зразумелі, — дадаў ён. — А калі б і не — маглі патэлефанаваць, напісаць, каб удакладніць. Калі перарэгістраваўся Саюз пісьменнікаў, з якімі Лукашэнка разлічваў у той час сябраваць, да мяне з Мінюста па пяць чалавек за дзень прыбягала: «а вось тут, Уладзімір Пракопавіч, не тая літара, а вось тут не тая загагулінка…» І самі ўсё перапісвалі».
Зрэшты, лічыць палітык, «Мінюст тут ні пры чым». «Усе мы ведаем, хто ў Беларусі ўсіх рэгіструе ці не рэгіструе, саджае ці не саджае. Хоць Някляева, хоць Чыжа», — сказаў ён.
Акрамя Някляева заснавальнікамі руху выступілі першы кіраўнік незалежнай Рэспублікі Беларусь Станіслаў Шушкевіч, першы беларускі лаўрэат Нобелеўскай прэміі Святлана Алексіевіч, экс-кандыдат у прэзідэнты, нядаўні палітвязень Мікалай Статкевіч, прафсаюзны лідар Генадзь Фядыніч, палітык і літаратар Лявон Баршчэўскі і многія іншыя вядомыя палітыкі, дзеячы культуры, грамадскія дзеячы. Аднак, як мяркуе Някляеў, «справа не ў тым, каму адмовілі».
«Справа ў тым, у чым адмовілі, — падкрэсліў ён. — Беларуская дзяржава адмовіла ў грамадскай ініцыятыве, накіраванай на захаванне дзяржаўнасці і незалежнасці краіны! І гэта пры відавочнай небяспецы для нашай незалежнасці і дзяржаўнасці». «Гэта не проста парадокс. І не проста чарговы плявок у бок грамадзянскай супольнасці, чых на свабоду, дэмакратыю, права. Гэта канстатацыя таго, як мы рэальна існуем: грамадства і дзяржава. Асобна. У паралельных светах», — рэзюмаваў Някляеў.
Ён не бачыць сэнсу праводзіць новы ўстаноўчы сход і зноў падаваць дакументы на рэгістрацыю ў Мінюст. «Як паказвае вопыт усіх незарэгістраваных арганізацый, гэта бессэнсоўная хада па крузе. Мы зарэгіструем рух «За дзяржаўнасць і незалежнасць Беларусі!» як міжнароднае аб'яднанне. У Лукашэнкі як бы абавязак, а ў нас — права, грамадзянскі абавязак змагацца за Беларусь. Мы многае можам для яе зрабіць — і зробім. Хто б нам ні спрабаваў перашкодзіць», — дадаў палітык.
Устаноўчы сход руху «За дзяржаўнасць і незалежнасць Беларусі!» адбыўся ў студзені, праз месяц дакументы былі пададзены ў Мінюст. Някляеў тады меркаваў, што «ўлада не зможа знайсці пераканаўчае тлумачэнне адмовы ў рэгістрацыі патрыятычнага грамадскага аб'яднання, мэта якога — захаванне і ўмацаванне дзяржаўнасці і незалежнасці краіны».
Каментары