Ekśpierty miarkujuć, što novy ŭkaz ab elektrasuviazi zabaronić pieravod internet-zvankoŭ u telefonnuju sietku

Ukaz prezidenta № 98 «Ab udaskanaleńni paradku pieradačy paviedamleńniaŭ elektrasuviazi» nie aznačaje poŭnaj zabarony na karystańnie Skype, Viber i inšymi padobnymi da hetych miesendžarami. Da takoj vysnovy schilajucca śpiecyjalisty ŭ śfiery elektrasuviazi.

U kamientaryi BiełaPAN techničny dyrektar kampanii «Atłant Telekam» Aleh Haŭryłaŭ vykazaŭ mierkavańnie, što ŭkaz nie zakranie hałasavy trafik, jaki pieradajecca vyklučna praź internet. «Zabarona ŭstanoŭlena na maršrutyzacyju takoha trafiku ŭ telefonnuju sietku, naprykład, kali abanient praź internet telefanuje na mabilny abo stacyjanarny telefon. U Biełarusi zafiksavany vypadki, kali takoj dziejnaściu zajmajucca pryvatnyja asoby abo kampanii biez rehistracyi i licenzijnych abaviazacielstvaŭ. Z ulikam rostu popytu na pasłuhi IP-telefanii ich biźnies, biezumoŭna, kvitnieje», — skazaŭ Haŭryłaŭ.

Jon padkreśliŭ, što pad ukaz traplaje t.zv. «šery» telefonny trafik. «Chutčej za ŭsio, Nacyjanalny centr abmienu trafikam budzie fiksavać pieravod internet-zvankoŭ u telefonnuju sietku, a apieratary pavinny buduć błakavać niadobrasumlennych abanientaŭ i paviedamlać ab parušeńniach dziaržaŭnym orhanam. Inšymi słovami, ukaz stvorany dla baraćby ź nielehalnaj dziejnaściu z halinie elektrasuviazi», — skazaŭ jon.

Zasnavalnik partała TUT.by Juryj Zisier taksama vykazaŭ zdahadku, što ŭ Biełarusi «budzie pierakryta» mahčymaść patelefanavać na biełaruskija numary (stacyjanarnyja abo mabilnyja) praz Skype, Viber abo pa mižnarodnych telefonnych kartkach ci servisach. «I «Biełtelekam» viernie sabie manapolnaje stanovišča na rynku mižnarodnaj telefonnaj suviazi», — napisaŭ jon na svajoj staroncy ŭ Facebook.

U toj ža čas, na dumku Zisiera, karystalniki zmohuć telefanavać sa Skype na Skype, z Viber na Viber i h.d. «U vyniku vyrastuć vydatki tych zamiežnych karystalnikaŭ, jakija praciahnuć telefanavać u Biełaruś tym, chto tut nie karystajecca internetam», — adznačyŭ jon.

U Apieratyŭna-analityčnym centry pry prezidencie (AAC) BiełaPAN 16 sakavika paviedamili, što nie ŭpaŭnavažany davać tłumačeńni, a za vykanańnie ŭkaza budzie adkazvać RUP «Nacyjanalny centr abmienu trafikam» (NCAT). Akramia taho, u najbližejšyja dni adbudziecca pres-kanfierencyja dla tłumačeńnia normaŭ dakumienta. Na zaŭvahu ab tym, što ŭkaz nadzialiŭ pravam rastłumačvać normy dakumienta mienavita AAC, u centry adkazali, što hetym pytańniem budzie zajmacca padviedamnaje im pradpryjemstva — NCAT.

U Nacyjanalnym centry abmienu trafikam zajavili, što nie rychtujuć tłumačeńniaŭ i paraili źviarnucca ŭ AAC. Pry paŭtornym zvarocie ŭ AAC BiełaPAN prapanavali nakiravać zapyt, ale adkaz na jaho jašče nie pryjšoŭ.

Mabilnyja apieratary novy ŭkaz nie kamientujuć. Na RUP «Biełtelekam» taksama nie stali abmiarkoŭvać hetuju temu, spasłaŭšysia na toje, što nie ŭpaŭnavažany davać aficyjny kamientaryj da dakumienta.

Hod tamu ministr suviazi i infarmatyzacyi zajaviŭ, što viedamstva šukaje instrumienty dla atrymańnia prybytku ad takich servisaŭ, jak Skype i Viber. «U nas jość rabočaja hrupa, i my budziem prapanoŭvać uradu peŭnyja instrumienty dla taho, kab u niejkaj častcy manietyzavać pasłuhi Skype, Viber i inšych padobnych da hetych technałohij», — skazaŭ jon.

Ukaz № 98 stvaraje sistemu procidziejańnia parušeńniam paradku propusku trafiku na sietkach elektrasuviazi. Zhodna z dakumientam karystalnikam zabaraniajecca prymianiać prahramnyja i techničnyja srodki, u sukupnaści jakija vykarystoŭvajucca dla pieraŭtvareńnia pratakołu abmienu dadzienymi, pa jakim pieradajucca hałasavyja i inšyja paviedamleńni elektrasuviazi ad abanienta, jaki vyklikaje, i pieradačy hetych paviedamleńniaŭ vyklikanamu abanientu z vykarystańniem abanienckich numaroŭ, jakija nie naležać abanientu, jaki vyklikaje. Takaja dziejnaść budzie źjaŭlacca niezakonnaj i budzie mieć vynikam adkaznaść u adpaviednaści z zakanadaŭčymi aktami. Zhodna z ukazam apieratary abaviazanyja ažyćciaŭlać pastajanny manitorynh parušeńniaŭ paradku propusku trafiku. U vypadku vyjaŭleńnia takich parušeńniaŭ jany majuć prava prypynić akazańnie pasłuh abanientu i błakavać propusk trafiku pa IP-pratakole. 

Dakumient apublikavany 16 sakavika, jaho asnoŭnyja pałažeńni nabuduć moc praz šeść miesiacaŭ paśla apublikavańnia.

• 0
• 0
• 0
• 0
• 0
• 0
• 0
• 0