Byłomu dyrektaru šviejnaj fabryki «Viaśnianka» dali 10 hadoŭ z kanfiskacyjaj
Sudździa Leninskaha rajona Mahilova Ihar Šviedaŭ 24 sakavika pryznaŭ byłoha dyrektara ZAT «Viaśnianka» Maksima Šneka vinavatym va ŭsich inkryminavanych złačynstvach.
Maksim Šnek abvinavačvaŭsia ŭ naniasieńni škody pradpryjemstvu bolš čym na 2,5 młrd rubloŭ (prykładna 120 tysiač dalaraŭ ZŠA pa aktualnym kursie). Jamu inkryminavałasia złoŭžyvańnie ŭładaj abo słužbovym stanoviščam, šmatlikija kradziažy, vymańvańnie kredytu i słužbovy padłoh. Šnek pryznaŭ siabie vinavatym tolki ŭ słužbovym padłohu, tłumačačy ŭpryhožvańnie statystyčnych źviestak žadańniem zachavać pradpryjemstva.
Dziaržabvinavačańnie patrabavała prysudzić abvinavačvanaha da 12 hadoŭ kałonii ŭzmocnienaha režymu. Advakaty prasili sud apraŭdać ich padabaronnaha pa ŭsich artykułach, akramia artykuła 421 Kryminalnaha kodeksa (słužbovy padłoh).
Zała sudovych pasiadžeńniaŭ, u jakim začytvaŭsia prysud, siońnia była całkam zapoŭniena ludźmi.
«Pryznačyć Šneku pakarańnie ŭ vyhladzie 10 hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach ŭzmocnienaha režymu, z kanfiskacyjaj majomaści, pazbaŭleńniem prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ, terminam na 5 hadoŭ», — začytaŭ prysud sudździa Šviedaŭ.
U termin vykanańnia pakarańnia zaličany čas, praviedzieny Šnekam pad vartaj, z 29 vieraśnia 2014 hoda.
Pavodle prysudu, ZAT «Viaśnianka» maje prava na zadavalnieńnie hramadzianskaha pazovu da padsudnaha ab kampiensacyi škody, pamier jakoha vyznačycca ŭ paradku hramadzianskaha sudavodstva.
«Ja prymaju vaš prysud», — zajaviŭ Šnek sudździ. Na pytańnie karespandenta BiełaPAN, ci budzie jon padavać skarhu, padsudny adkazaŭ śćviardžalna.
«Prysud budziem abskardžvać. My ź im nie zhodny», — zajaviŭ advakat Šneka. Rodnyja byłoha dyrektara ZAT «Viaśnianka» nazvali prysud niespraviadlivym.
Sud razhladaŭ dziejnaść Šneka z krasavika 2012 hoda pa listapad 2014 hoda, heta značyć u pieryjad, kali jon pracavaŭ na pradpryjemstvie, u tym liku dyrektaram (z krasavika 2014 hoda). U ciapierašni čas «Viaśnianka» ličycca siarod samych prablemnych pradpryjemstvaŭ Mahiloŭskaj vobłaści. Tym nie mienš za 15 śniežnia 2015 hoda pazačarhovy schod akcyjanieraŭ pryniało rašeńnie nie adkryvać praceduru bankructva.
Pa spravie prachodziła kala 40 śviedak jak ź Biełarusi, tak i z Rasii - bolšaj častkaj indyvidualnych pradprymalnikaŭ. Na dumku abvinavačańnia, da ich išła pradukcyja «Viaśnianka», a hrošy viartalisia daloka nie ŭsie.
***
«Viaśnianka» - byłaja šviejnaja fabryka imia Vaładarskaha, zasnavana 1 lipienia 1929 hoda. Uvachodzić u skład kancerna «Biellehpram» i źjaŭlajecca adnym z najbujniejšych subjektaŭ haspadarańnia pa vypusku šviejnych vyrabaŭ u Biełarusi i krainach SND.
Kamientary