U Mazyry futbolnaje pole i zonu adpačynku chočuć pieraarać i zasiejać, žychary suprać

U Mazyry žychary mikrarajona Zarečny (Pchoŭ) sprabujuć adstajać futbolnaje pole i zonu adpačynku kala Prypiaci, jakija miascovaje sielskahaspadarčaje pradpryjemstva «Radzima» vyrašyła pieraarać i zasiejać.

Jak paviedamiŭ dyrektar ekałahičnaha fondu «Za čystuju Prypiać» Siarhiej Kazłoŭ, futbolnaje pole na hetym miescy isnuje ŭžo kala piacidziesiaci hadoŭ, da jaho prylahaje zona adpačynku — ulubionaje miesca špacyraŭ žycharoŭ mikrarajona. U płanach miascovych žycharoŭ było stvareńnie Muzieja viarby pad adkrytym niebam. 16 sakavika pa pierymietry futbolnaha pola, byli vysadžanyja pieršyja drevy.

«Kali ja ŭbačyŭ, što pole źbirajucca pieraarać traktaram, — vyklikaŭ milicyju. A ciapier apuścilisia ruki prosta, — prakamientavaŭ situacyju Siarhiej Kazłoŭ. — My stolki zrabili dla ekałahičnaha vychavańnia školnikaŭ, pravodzili tut, kala raki Prypiać, pastajannyja uborki śmiećcia, akcyi, śviaty, futbolnyja matčy, pryciahvali znakamitaściaŭ, płanavali stvaryć Muziej viarby, vysadzili drevy dla pieršaj čarhi muzieja. U akcyi pa vysadcy vierbaŭ uziali ŭdzieł viadomyja ŭ krainie ludzi: alimpijski čempijon pa viesłavańni Raman Pietrušenka, trenier žanočaj zbornaj pa viesłavańni Hienadź Halicki, školniki. Zaraz usio moža prapaści. Dziela mahčymaści atrymać siena dziaciej pazbavić futboła?»

Pavodle jaho słoŭ, dziejnaść fondu nakiravanaja na ekałahičnuju adukacyju školnikaŭ, i ŭ akcyjach «Za čystuju Prypiać» dzieci brali aktyŭny ŭdzieł. «My nie prosta prybirali śmiećcie ŭ Prypiaci, my pravodzili daśledavańni, sieminary, arhanizoŭvali śviaty, uručali dzieciam padarunki, pravodzili sustrečy ź viadomymi ludźmi, futbolnyja matčy», — dadaŭ dyrektar fondu.

Jon patłumačyŭ, što na stadyjonie nie tolki prachodziać spabornictvy, ale i adpačyvajuć žychary Pchova cełymi siemjami, tut, na aziorach, — «raj dla rybakoŭ». «Hetaja ziamla nikomu nie była patrebnaja, pakul žychary mikrarajona nie vyrašyli jaje dobraŭparadkavać», — adznačyŭ Kazłoŭ.

Namieśnik staršyni Mazyrskaha rajvykankama Fieliks Haluk adznačyŭ, što jon viedaje pra situacyju, jakaja skłałasia, i padkreśliŭ, što pakul nie pryniataje kančatkovaje rašeńnie ab razvorvańni futbolnaha pola. Pavodle jaho słoŭ, miascovaja ŭłada zacikaŭlenaja, kab dzieciam było dzie hulać u futboł, ale nie abaviazkova ŭ hetym miescy. Kančatkova pytańnie moža być vyrašanaje da kanca tydnia.

Načalnik Mazyrskaj harrajinśpiekcyi pryrodnych resursaŭ i achovy navakolnaha asiarodździa Jury Zbaroŭski prakamientavaŭ situacyju łakanična: «Tam pryrodaachoŭnaje zakanadaŭstva nijak nie parušajecca, nie parušana ni ŭ jakich sensach». «Heta nie da mianie pytańnie, da ekałohii tam pytańniaŭ niama», — dadaŭ jon.

Dyrektar fondu «Za čystuju Prypiać» Siarhiej Kazłoŭ sabraŭ podpisy žycharoŭ Pchova pad kalektyŭnym zvarotam da miascovych uładaŭ z prośbaj dapamahčy zachavać futbolnaje pole i zonu adpačynku.

• 0
• 0
• 0
• 0
• 0
• 0
• 0
• 0